1 Corintios 9 - Biblia Dc en Mixe de Quetzaltepec

Wi'ix tyunëty ja Jesús y'ijxpëjkpë

¹ Oy ayuk kajpxwa'kxpës ëjts, ëwaatsëtumës n'ity jä'ä ko tëëjës n'ixy ja Wintsën Jesús, ets miitsëty mëët ko të mëpëktë yë'ë yajnikëxë'kpy ko tëëjës nmëtuny ja Wintsën Jesukristë.

² Wä'än jëtää ja wiinkpë ka'ap xy'ixkaptës koos n'ayuk kajpxwa'kxpëty, e miitsëty xynyija'awëtëp jä'ä ko tëë xymyëpëktë ja Wintsën ko të ntuk'ëwaanëtë, yë'ë yajtuknija'ap koos n'ayukkajpxwä'kxy.

³ Yë'ës nätyukuwanëp koos pën xynyikäjpxy xynyimëtyä'äky.

⁴ Nmëët'ajtëm ja tëyajtën ets nyajmo'omyëty ja ka'ayën ukën,

⁵ ets nmëët'ajtmëty tu'uk ja to'oxytyëjk mëti'ipë mëpëjkpën, ijxtëm ja wiinkëtypë ja ijxpëjkpëtëjkëtyën ets ja Wintsën Jesús ja myëkä'äxtëjk ets ja Pedro.

⁶ ¿Ëkë Bernabé ets ëjts ka'apës jëtää xypyaatë xy'ixtëtyës ja naax kajpnë?.

⁷ ¿Wä'än jëtää ja tsiptuunpë kë'ëm nyämyëjuyë? ¿Wä'än jëtää ja tsatym nyiyu'ujëpë ka'ap tjë'kxy ja tsatym kyo tyëëm'atyë? ¿Ëkë jää jëtää ja kupixyny këwent'ajtpë ka'apë t'uukyën ja lechë mëti'ipë yajma'tspën ma ja kupixyny taakënë?

⁸ Ets këtii mmaytyëty mtajtëty ko yë'ë naaxwiinyëtë ja'ay wyinma'any je'eyë, yë Moisés yë y'ënä'ämën näjyëtu'un y'ënä'äny.

⁹ Jëtu'un kyëxja'ayëty ma ja ënä'ämën nokyën: Ka'ap ja tsajpkaa xy'ajänëty ko ënety ja tsajpmok twinteeny. Ka'ap yë'ëkyëjxmëty jëtu'un y'ënä'äny ko ja Dios tmëjotmaypyääty ja tsajpkaa,

¹⁰ ëëts ja Dios xytyijëm ko jëtu'un y'ënä'äny, ëëtskyëjxm ojts jëtu'un tyajja'ayë ja ënä'ämën; jëtu'unts mëti'ipë yuup ets mëti'ipë yajpëtë'ktëpën ja pëjktä'äky, jyä'ä'atëp näjyëtu'un ja pëjktä'äky mëti'ipë paat'ajtëtëpën.

¹¹ Tëës ja Dios ja y'aaw y'ayuk ni'ipy ma miitsëtyën ets paat'ajtëp miits n'amëtowtëty mëti'ipës ntukjuuky'atëpën.

¹² Pën m'amëtoowëtëp ja wiink ja'ay ets winë xymyo'otëty, wäänëni'ik ëëts xypyaatë ets winë xymyo'otëtyës. E ka'apës ya'atë kuttujkën të nyajtuntë, tëëjës nmënax nyajnaxtë ja ëyo'on oyës tii të njayajmëyatë ets këtiipë tyu'u'ëtukëty ja aaw ayuk ma Kristë yajnimëtyä'äkyën.

¹³ Mnija'awëtëp miits ja ja'ayëty wi'ix jyuuky'atën mëti'ipë tuuntëpën jap mëjtsajptëkoty, yë'ë tyukjuuky'ajtëp mëti'ipë ja ja'ay yojxtëpën ets mëti'ipë tuuntëpën ma ja wintsë'këntyaknën; tsyu'tstëp ja jëyujk tsu'utsy mëti'ipë wintsë'kën'ajtpën.

¹⁴ Näyjyëtu'un ja Wintsën të tuknipëjktaakë ko nän yë'ë tyukjuuky'atëp mëti'ipë kyajpxwa'kxtëpën ja aaw ayuk oypyë.

¹⁵ E nijëna'a ya'atë tëyajtën të nkayajtunyës, nijëna'a miits të nka''amëtowtë tii ets të xymyo'otës. Nikë oyës ntimy'ookëty naamka'anëmës pën xypyëjkë ya'atë jotkujk'ajtën mëti'ipës nmëët'ajtypyën

¹⁶ Koos nnikäjpxy ja oy aaw oy ayuk ka'apës nnätyukmëjpëjktä'äkyë. Jëtu'unës npëjktä'äky ijxtëm ja tuunk akwanëpën mëti'ipës të xytyuknipëktën. Mon tukës jeexyë të nyajpaaty koos jeexyë ka'ap të nkajpxwä'kxy.

¹⁷ Pën kë'ëmtsojkën ya'atë ntunyës, njëjp'ixëpës ja nkuma'ayën; ets pën ka'ap, oy jyajëtu'unëty, kopkpëky koos ya'atë tuunk ntuny jä'ä ko Tiosës të xytyuknipëky.

¹⁸ Yë'ës nkuma'ayën'ajtyp koos namëyajtën nkajpxwä'kxy ja oy aaw oy ayuk oyës ja tëyajtën njamëët'aty ets jeexyë n'amëtowtë ja nmëju'unyës koos jëtu'un ntuny.

¹⁹ Oyës pën xykyatuunpë'aty, tëëjës näpyëjktä'äkyë ijxtëm ja mëtuunpën ets ja ja'ay may tpaatëty ja Kristë.

²⁰ Koos ja jutiis ja'ay mëët tu'ukyë të n'ity, näjyëtu'unës jam të näyajnaxyë ijxtëm yë'ë tsyëënëtën ets ja Kristë tmëpëktëty; yë'ëjës ntijpy koos näjyëtu'un të näpyëjktä'äkyë ijxtëm ja Moisés ja y'ënä'ämën tyajkutukyën. Paatyës jëtu'un näpyëjktä'äkyë ets ja Kristë tmëpëktëty, oyës ja Moisés ja y'ënä'ämën yë'ë xy'ëktuunpë'aty.

²¹ Jatu'kpëky etsës nmëmëta'aktë mëti'ipë ja Moisés ka'ap ja y'ënä'ämën tpatuunëtën, näjyëtu'unës të näpyëjktä'äkyë ijxtëm yë'ëjëtyën, oyës ëjts ja Dios njamëtuny ets ja Kristë ja y'ënä'ämën njapa'ap'ijtëyë.

²² Koos të nyajpaaty ma ja ja'ayëtyën mëti'ipë ka'ap oy myëpëktën, jëtu'unës të näpyëjktä'äkyë ijxtëm yë'ëjëtyën ets nmëmëta'aka'antës ets tmëjjaw tjaantyjawëtëty ja Kristë. Paatyës jëtu'un të näpyëjktä'äkyë ijxtëm yë'ëjëtyën, ets oy tyimtu'uk tyimmäjtskëty tpaatëty ja nyitsokën.

²³ Paatyës ya'atë jëtu'un ntuny koos ja aaw ayuk oypyë nkajpxwä'kxy, etsës ëjts näjyëtu'un npaatyës ja kënu'kxën.

²⁴ Mnija'awëtëp miits ko ja'ay pyëyë'kijpxtë, ni'ëmukë pyëyë'ëktë ets tu'uk ja mëti'ipë mëtakpën. Jëtu'un miits mtu'uye'eytyëty ets mmëta'aktëty.

²⁵ Mëti'ipë näjyëjp'ijxëtëpën ko y'ëyë'ëka'antë, ka'ap nëkooyë tii tjë'kxtë mëti'ipë pa'amtuunëtëpën. E paaty miitsëty jëtu'un winë tuntë jä'ä ko yë'ë pyaatantëp ja kuma'ayën mëti'ipë tëtspën mëti'ipë xo'tspën; e ëëtsajtëm yë'ë nitsiptu'unemë ko n'ëxajëja'anëm ja kuma'ayën mëti'ipë ka'ap tsyi'itsyën ets ka'ap xyootsyën.

²⁶ Mëët ëjts, ka'apës winpi'its npëyi'iky ets ka'apës nëkoo nitsuu nipoj ntsiptuny.

²⁷ Ni'ikyës ja ni'kx nkopk ntëytyuny etsës winë mëtëy ntuny ijxtëm pyaat'atyën, këtiipës nwë'ëmtëty tukxi'iky ma ja ja'ayëtyën mëti'ipës të nyaj'ijxpëktën.