1 Corintios 8 - Biblia Dc en Mixe de Quetzaltepec

Jë'kxy mëti'ipë yajtukwintsë'këpën ja awinax

¹ Tyamës nnikajpxa'any wi'ix yajtunëtyën ja kääky uuky mëti'ipë ënety të yajtukwintsë'ëkën ja awinax. Tëy ja ayuk y'ënä'äny: Ko ëëtsajtëm aak nnija'awëm winë. Je'eyëp ko tii yajjaty yajnijawë, amëj akëjxm ja ja'ay tyaj'awinpity; e ja tsojkën ja'awën yajmëjnajxyp ja naax kajpn.

² Pën jää pën y'ënä'äny ko tii tjaty tnijawë, ka'anëm tnijawë ijxtëm pyaat'atyën.

³ Pën ja Dios tsyojkpy jya'ap, nija'awëyëp ja Dios.

⁴ Mëëtpë ja winma'any ko ja kääky uuky yajjë'kxy mëti'ipë ënety të yajtukwintsë'ëkën ja awinax, ëëtsajtëm wa'ats nnija'awëmë ko ya'atë awinax ka'ap tii mëk'ajtën tmëëtëty yaa naaxwiiny ets nija'awëm ko tu'ukyë ja Dios je'eyë.

⁵ Oy jam tsajpjotm ets naaxwiiny tää ja tios jyajatyë, paatykyëjxm ja'ay t'ëwtatë.

⁶ Mëët ëëts'ajtëmë, tu'ukyë je'eyë ja Dios, ja Dios Teety yë'ë winë të tyajtso'ontakta'ay ets yë'ë ëëts nnijuuky'ajtëmë. Näy tu'ukyë ja Wintsën Jesukristë, paaty tu'kë'ëyë winë jää yajpata'ay näjyëtu'un ëëts'ajtëmë.

⁷ E ka'ap ya'atë tëyajtën ja'ay ni'ëmukë tnijawëtë. Mëti'ipë të tmëyujtën ets twintsë'ëkëtë ja awinax ets ënät tjë'kxtë ja kääky uuky mëti'ipë të yajtukwintsë'ëkën ja awinax, ok kë'ëm twiinkjawëtë jä'äkyëjxm ko kë'ëm tmëmay tmëtajtë ko ka'ap y'oyëty ko të tjë'kxtë.

⁸ Ka'ap yë'ëkyëjxm ja Dios xykyakupëjkmëty ko tii një'kxmëty, ni yë'ëkyëjxm ja Dios xykyakupëjkmëty ko tii nkajë'kxmëty.

⁹ Miits ko tii xyjyë'kxtëty mnäkyëwent'atëtëp këtiipë wiink t'ixtëty ja mmëku'uk mëti'ipë ka'ap oy myëpëktën.

¹⁰ Jä'ä ko pën mijts mjanija'ap ya'atë, ets mtëkëty kääpyë ukpë ma ja awinax ënety të yajtukwintsë'ëkën ja kääky uuky ets m'ixëtëty ja mmëku'uk mëti'ipë ka'ap oy myëpëkyën, tsojk nëjkx näjyëtu'un y'ëtëtstä'äky ets tkayëty mëti'ipë ënety ja awinax të yajtukwintsë'ëkën.

¹¹ Ko mijts xytyunëty mëti'ipë ja mmëku'uk ka'ap t'oy'ixëtyën, tëë ënety ja mëku'uk xyajtëkooyë ja myëpëjkën mëti'ipë ja Kristë ojts tku'ookën.

¹² Ko ja mmëku'uk xyajtëkooyëty ja wyinma'any, Kristë ënety jëtu'un mmëpokytyuuntëp.

¹³ Paaty, pën ëjts yë nmëku'ukës nyajpokytyuunpy mëët koos tii ntsu'utsy, nikë oy koos nijëna'a nkatsu'utsëty ja tsu'utsy këtiipë ja nmëku'ukës nyajpokykya'ajëtyës.