1 Corintios 6 - Biblia Dc en Mixe de Quetzaltepec

Ko ja mëpëjkpëtëjk y'ëëntë ma ja yajkutujkpë ka'apë myëpëktën

¹ Ko miits jënaakën tiitsip xymyëët'atëty mëët ja mmëku'ukëty, ¿tii ko mnëjkxtëty jam ë'ënpë ma ja yajkutujkpën ka'apë myëpëktën, jëtu'un ijxtëm jeexyë jam m'ëëntën ma ja mëti'ipë mëpëjktëpën?

² ¿Ka'ap xynyijawëtë ko ja mëpëjkpëtëjk pyaye'eytyëp näjyëtu'un ja naaxwiinyëtë ja'ayë? e pën miitsëty mnija'awëtyëp ko xypyaye'eya'antë ja naaxwiinyëtë ja'ay, ¿wi'ix ko ënät mkamayëtëty ja jotmay wäänëpë?

³ ¿ka'ap xynyijawëtë ko tsajpjotmëtë kukäjpxy paat npaye'eya'anëmë? Pën jëtu'un, ¿këtii jëtää ni'ik mpaatëtë xypyaye'eytyëty ja jotmay yaapë naaxwiinyënë?

⁴ Pën tiijotmay mmëët'ajtëp, ¿tii ko xytyukpaye'eya'antë ja ja'ay mëti'ipë ka'ap pyaat'atyën pyaye'eyëty ma ja mëpëjkpëtëjkën? Jä'ä miits mtukninëjkxtëp ja jotmay mëti'ipë ka'ap ja Dios tmëpëktën.

⁵ Paaty jëtu'un n'ënëëmëtë ets xytsyëtyu'unjawëtëty ko jëtu'un m'ëtë'ëtstë, ¿wä'än jëtää ka'ap jam pën paye'epyë ma ja mëpëjkpëtëjkëtyënë?

⁶ Yë mëpëjkpëtëjkëty ka'ap jye'eyëty tsyiptuntë, näjyëtu'un ënätyë nyëjkxkojtë ma ja paye'epyën mëti'ipë ka'ap myëpëkyën.

⁷ Ko mtsiptuntë aak miitsëty, ka'ap jëtu'un y'oyëty. ¿Tii ko xykyamëmëta'aktë ko pën mkapaye'eyëtë ets tii ko xykyana'ixtë ets myajmäätstëty?

⁸ E miits aak jëëmpit tii xytyuntë, ka'ap myëtëyëty tii xytyuntë, mä'tspë mnäpyëjkta'akëtë ma ja mëpëjkpëtëjkëtyën.

⁹ ¿Ka'ap xynyijawëtë ko yë ëxëëkja'aytyëjk ka'ap jyuuky'ata'antë ma ja Dios ja kyutujktaknënë?

¹⁰ Këtii myajwin'ëëntëty, jä'ä ko jam ma ja Dios ja kyutujktaknën ka'ap yajpaata'antë mëti'ipë jyot nyini'kx yajktëpën, mëti'ipë tsaatsetsy, kepy tsyetsy y'ëwtajtypyën, mëti'ipë ka'ap yë nyiye'etyëjk ëkë tyo'oxytyëjk twintsë'ëkën, ëkë mëti'ipë ato'oxyën, ëkë mëti'ipë myëye'etyëjk pyijkpyën y'ukpyën.

¹¹ Ets jëtu'un ijty jam pënëty ma miitsëtyën jënaakën mja'ay'atë; je'eyëp ko tyam, tëë ja Dios myajwa'atsëtë, tëë mnätyukë'ëtëkëtë ja Dios. Oy të mwë'ëmtë mëët ja Dios ets mëët ja Wintsën Jesukristë.

Wi'ix ja Tios ja ni'kx kopk wa'ats ntukwintsë'këmëty

¹² Jëtu'un ja aaw ayuk y'ënä'äny: Ëjts najtspëkës n'ity, oyës tii ntuna'anëty ëxëëk. Oy jyajëtu'unëty, ka'ap oytyiijëty ntuk'oy'ajtmëty. Näyjyëtu'un ja aaw ayuk y'ënä'äny: Najtspëkës n'ity ets ntunëtyës pën tiijës ntunäämpy. Oy jyajëtu'unëty, ka'ap mëpaat tii nätyukmëmëtä'äkyës.

¹³ Näyjyëtu'un yajnimëtyä'äky: Ko ja uuky, jot tsooy je'eyë wyä'äny; ets jot yë'ë uuky të yajtuknikojë. Oy jyajëtu'unëty, Dios yajwintëkoyäämpy yë jot ets uuky. E ka'ap tyiyëty ko yë ni'kx kopk paat'ajtëp yajtook yajyakëty; yë ni'kx kopk Wintsën yë'ë jyä'ä; ets Wintsën ni'kx kopk jä'ä'ajtëp.

¹⁴ Jëtu'un ijxtëm ja Dios të tyajjuukpyikyën ja Wintsën, näjyëtu'un xyajjuukpyëka'anëm mëët ja myëk'ajtën.

¹⁵ ¿Ka'ap xynyijawëtë ko yë mni'kx mkopkëty jëtu'un yë'ë ijxtëm kanaakjëjpën winë, ets tu'ukyë yajpaaty mëët ja Kristë? ¿Mëpaat jëtää ëjts njëpëky tu'kpëky mëti'ipë ijtpën tu'ukyë mëët ja Kristë etsës ntuknini'kx'atëty ja ku'into'oxyë? Niwi'ix'äämpy.

¹⁶ ¿Ka'ap miits xynyijawëtë ko tu'uk ja ye'etyëjk nyämyukyë mëët ja ku'into'oxy, tu'ukyë nyämyukyë? Jëtu'un ja Dios ja y'aaw y'ayuk y'ënä'äny: Ja ja'ay nimäjtskpë, jëtu'un jä'ä wyimpity ijxtëm ja ja'ay tu'ukpën.

¹⁷ E ko ja ja'ay nyämyukyë mëët ja Wintsën, nän tu'ukyë wyimpity mëët yë'ë.

¹⁸ Ka'ap yë tu'u xymyo'otëty ja in'ajtën. Ko pën ja wiinkëtypë poky tuny, ka'ap ja ni'kx kopk tmëtëkoy, ets pën ëtëtsnajxpën, pokytyuunp jä'ä ma ja kyë'ëm ni'kx kyë'ëmkopkën.

¹⁹ ¿Ka'ap miits xynyijawëtë ko ja Dios mni'kx mkopk myajwa'anxëtë tä ja mëjtsajptëjkën ets ko mtsënaaytyakn'atëtë ja Kënu'kxymyëkajtën mëti'ipë ja Dios të mmo'ojëtënë?

²⁰ Jä'ä ko tëë ja Dios mkujuyëtë ko ja y'u'unk të mku'ookëtë, mmëjjaw jaantyjyawëtë ja Dios mëët ja mni'kx mkopkëty.