1 Corintios 5 - Biblia Dc en Mixe de Quetzaltepec

Paye'eyën ko ja'ay tëkatsy y'ëti'itsy Ijxpëjkpëtëjk tyuunkëty

¹ Jëtu'un yajnijawëy'äty ko tam ma miitsëtyën nitu'uk mëti'ipë ëtëtsnajxpën. Yë'ë mëj tëko'oyën nyäxy ko ja'ay kyutaak to'oxytyëjk'aty. Jampaat jëtu'unpë ka'ap yajkupëky ma ja ja'ayëtyën mëti'ipë ka'ap ja Dios tmëpëktën.

² Ets miitsëty ni'ikyë mëj këjxm mnäyajnajxëtëpë. Ijxtëm jeexyë mmontën mtuktën. Ja ja'ay mëti'ipë jëtu'un ëtëtspën, ixkäxtë ma miitsëtyën.

³ Oyës jam nkayajpaaty ma miitsëtyën, tamës ja njot nja'awën y'ity ma miitsëtyën, ijxtëm jeexyë jam ëjtsën; ëjts tëëjës nyajnitukë tääpë ja'ay mëti'ipë jëtu'un ëtëtspën.

⁴ Ko miits mye'eymyuktëty, tam'ataanpës ja njot nja'awën ets näjyëtu'un jyam'ata'any ja Wintsën Jesukristë ja myëk'ajtën.

⁵ Tääts ya'atë ja'ay yajkë'ëyakëty ma ja mëjku'ujën ets ka'ap t'ëktuunëty ja kyë'ëm winma'any ets kyutëkoyëty ja nyi'kx kyopk pokymyëëtpë ets ja jya'awën nyitso'okëty ko ja Wintsën myinëty.

⁶ Paaty miits ka'ap tii mnätyukyajmëjnaxëtëty mëti'ipë jam mtuuntëpën. Tëë xynyijawëtë ko ja ayuk y'ënä'äny: ja poky jëtu'un yë'ë ijxtëm ja tsajpkääky tsyooyën, yajma'tääpy ja jëtsy.

⁷ Ixmatstë tääpë ëxëëk winma'any mëti'ipë myajma'tëtëpën. Ets jëtu'un m'itëty ijxtëm ja tsajpkääkyën wa'atspë, mëti'ipë yajkääpyën ëmaay xyëëwjoty. Jä'ä ko Kristë, yë'ë jëtu'un ijxtëm ja Kupixyny U'unkën, mëti'ipë ojts xykyu'o'k xykyutëko'oyëmën.

⁸ Mëtëy ja Dios nwintsë'këmëty, ka'ap tii ntu'unmëty mëët ja ëxëëk winma'any, jëtu'un ijxtëm ja levadura tëëpë y'ëxëëkën, nikë jä'ä ntu'unmëty oypyë ijxtëm ja tsajpkääkyën mëti'ipë oyën mëti'ipë yajkääpyën ëmaay xyëëwjoty, ets ka'ap ja levadura tmëëtëty.

⁹ Ko ojts miits ja noky ntuknikäxtë, jëtu'un ojts nëëmëtë ko ka'ap mnämyäyëttëty mëët ja mëti'ipë jyot nyini'kx tyo'ktëpën.

¹⁰ Ets ko jëtu'un n'ënanyës, ka'ap xyjyä'äkyukëtëty ets ënät xytyimkukä'äktëty ja mëti'ipë jyot nyini'kx kyë'ëyäjkpyën, mëti'ipë tii kyuyu'tsypyën, mëti'ipë mä'tspën, mëti'ipë ja tsaatsetsy, kepy tsyetsy y'ëwtajtypyën. Ko jeexyë jyëtu'unëty, mtimy'ijxmajtstëp jeexyë ja naaxwiinyëtë juuky'at.

¹¹ Yë'ës ntijpy, ko ka'ap miits mëët m'ëk ye'eymyujknëtëty ja ja'ay mëti'ipë nätyijëpën ko tmëpëky ja Kristë ets tyam ja ëxëëk winma'any tpaaty; ets ameeny, wyintsë'këp ja tsaatsetsy, kepy tsyetsy; pi'tskajpxk, je'eyë y'uuky myu'ukyë ets mä'tsp. Ni xykyamëëtkaytyëty ja jëtu'unpë ja ja'ay.

¹² Ka'apës yë'ë xypyaat'aty etsës npaye'eyëty ja wiink ja'ay, Dios yë'ë paye'eyëtëp.

¹³ E miitsëty mpaat'ajtëtëp xypyaye'eytyëty mëti'ipë mëpëjktëpën, yajpëtsëmtë ya'atë pokyjyä'äy mëti'ipë jap ma miitsëtyën.