1 Corintios 3 - Biblia Dc en Mixe de Quetzaltepec

Ma ja naax kajpn kyamëtä'äkyën

¹ Mëku'uktëjkëty, ko ojts miits nyaj'ijxpëktë, ka'ap ojts jëtu'un nmëmëtya'aktë ijxtëm ja ja'ayën mëti'ipë ja Kënu'kxymyëkajtën tu'unwinwoowëpën, jëtu'un miits nyaj'ijxpëjktë ijxtëm ja ja'ayën mëti'ipë yajtuumpyën ja naaxwiinyëtë winma'any ëkë ijxtëm tu'uk ja mëxu'unkën ka'apë tii tja'akyukën ma ja Kristë.

² Ka'ap ojts miits tsip nyaj'ijxpëktë. Jëtu'un nyaj'ixpëjktë ijxtëm tu'uk ja mëxu'unk yajmo'oyën ja tsyi'tsk ko ka'ap tjaty tkayëty ja kääky uuky, jä'ä ko ka'ap miits ënety xyjyatë wi'ix xyjyä'äkyukëtëty mëti'ipëty tsipën. Tyampaat ka'ap xyjyatë,

³ jä'ä ko miitsëty ëmuumnëm xymyëët'atë ja naaxwiinyëtë winma'any. Ko tii mkanätyukmë'ixëtë, ko mtsiptuntë ets ko mnäy'ëxëëk'ixëtë nixim niyam, mmëët'ajtëpnëm ja naaxwiinyëtë winma'any ëmuumnëm ets jëtu'un mtu'uye'eytyë ijxtëm ja ja'ay tyu'uye'eytyën mëti'ipë ja naaxwiinyëtë winma'any yajtuuntëpën.

⁴ Jä'ä ko miits m'ëna'antë: Pablo yë jyä'ä npanëjkxëpës; ets ja wiinkëtypë y'ëna'antë: Apolo jyä'ä npanëjkxëpës. Jëtu'un yajja'akyukë ko miitsëty ëmuumnëm xymyëët'atë ja naaxwiinyëtë winma'any.

⁵ ¿Pën xyëëwajtyp Apolo ets pën Pablo? Dios ëëts yi'iyë nmëtuuntëp mëti'ipë miits të xymyëpëktën. Këëkjä'ä ëëts ja ntuunk ntuntë mëti'ipës ja Wintsën të xytyuknipëktën ets ntuntëtyës.

⁶ Ëjts ojts ni'ipy nkojy ets Apolo të tyajxooky, e yë Dios yë'ë të tyajyony të tyajjiitsy.

⁷ Mëti'ipë niptëpën ets mëti'ipë yaj'ujtsxo'ktëpën, ka'ap yë'ëty nätyu'uk myëta'aktë; Dios tu'uk tyuuntääpy winë, yë'ë yajyoomp ja aay ujts.

⁸ Pën kojtëp niptëp ets yaj'ujtsxo'ktëp, tu'knax yë'ëjëty, oy nëjkx këëkjä'ä yajmëjuytyë ja tyuunkëty.

⁹ Tu'ukyë ëëts ja Dios ja tyuunk ntuunëtë ets jëtu'un miitsëty ijxtëm ja kamën ma ja Dios ja tyuunk tyu'uye'eyën, jëtu'un miitsëty ijxtëm tu'uk ja mëj tëjkën mëti'ipë Dios të tkojyën.

¹⁰ Ëjts jëtu'unës të ntuny ijxtëm tu'uk yë pojtspën, maas ja Dios të xypyëjktä'äkyën ets ja potsy ëjx nyajtso'onta'akëtyës ets ja wiinkpë të myintë mëti'ipë të tjëjpëtën. Je'eyëp ko nitu'ukjaty mëk ja tyuunk tkëwent'atë.

¹¹ Ni pën mëpaat wiinkpë potsy tkapëjktä'äky ijxtëm ya'atë potsy të tsyo'ontä'äkyën. Jesukristë yajtijp potsy.

¹² Pën jää pën ja potsy yë'ë tukjëjpëja'any ja pu'ts pujxn, ja poop pujxn, tsujëtypë tsaa, kepy, mëëy ëkë waxk aay, ma ya'atë tuunk të tsyo'ontä'äkyën,

¹³ jäänëm nëjkx yaj'ixy yajnijawë ko ja näpyaye'eyë tyunëtëty pën wi'ixjaty ënety pën të tyuny, jä'ä ko jëën jää nëjkx tyuny ets tyajnikëxë'ëka'any wi'ixjaty ënety pën të tyunyën.

¹⁴ Pën ënety të tkojyën ja tëjk ta'tspëky, mëti'ipë ka'ap ja jëën myäyëtëty, yë'ë nëjkx yajkumay;

¹⁵ e pën ënety ja tëjk të tkojy mëti'ipë tooytyëkoopyën, yë'ë nëjkx winë tyajtëkooytyä'äy, oy ënety kë'ëm jyanäyatso'okyë ijxtëm ja ja'ay ja jëën tkuke'ekyën.

¹⁶ ¿Këtii xynyijawëtë ko miitsëty, jëtu'un yë Dios myajnaxëtë ijxtëm tu'uk yë tsajptëjkënë ets ko ja Kënu'kxymyëkajtën yë'ë jap tsënääpy ma miitsëtyënë?

¹⁷ Pën yajkwintëkoopy ja Dios ja tsyajptëjk, yajwintëkoopy näjyëtu'un ja Dios; jä'ä ko wa'ats ja Dios ja tsyajptëjk ets miitsëty Dios mtsajp tëjk'ajtëtëp.

¹⁸ Ni pën kë'ëm kyanäwyin'ëënëtëty: pën jää pën nyätyijyë wijy kejy ijxtëm ja naaxwiinyëtë ja'ay ja wyinma'anyëtyën, jëtu'un miits näpyëjkta'akëtë ijxtëm ja ja'ay ni'ik tsuupën mëti'ipë ka'ap tii tjaty nijawën, ënät miits myaj'ixtëty wijy kejy mëti'ipë ka'ap kyixy nyäxyën.

¹⁹ Yë naaxwiinyëtë ixpëkyajtën tsuuwinma'any yë Dios tyajnaxy, jëtu'un ja Dios ja y'aaw y'ayuk kyëxja'ayëty: Näy yë'ë kyë'ëm wijyajtën nëjkx ja ixpëkyjyä'äy Dios tyu'u'ëtukëtë ijxtëm tu'uk ja jëyujk yajtu'u'ëtukyën, jä'äkyëjxm ko tkanijawëtë ko ja y'o'kën t'anëjkxëtë.

²⁰ Ets näjyëtu'un y'ënä'äny: Nyija'awëp ja Dios ko tsuuwinma'any yë naaxwiinyëtë ja'ay wyijy'ajtën.

²¹ Paaty ka'ap miits tii mnätyukyajmëjnaxëtëty, jä'ä ko aak miits yë'ë mjä'äjëty;

²² yë Pablo, yë Apolo, yë Cefas, yë o'kën, yë xëëw po'o, yë miinpë wiinkoonpë, aak miits yë mjä'äjëty,

²³ yë Kristë miits mjä'ä'ajtëtëp, ets Kristë, Dios jä'ä'ajtëp.