1 Corintios 2 - Biblia Dc en Mixe de Quetzaltepec

Ko yajnimëtyä'äky ja Kristë mëti'ipë të y'ookyën kruutskëjxm

¹ Mëku'uktëjkëty, koos ojts jam n'otsy ma miitsëtyën ets ntukmëmëtyaktë ja Dios mëti'ipë ijty ka'ap yajnijawën, ka'apës ojts nyajtuny ja aaw ayuk tsipëtypë.

² Koos jam nyajpaty ma miitsëtyën, ka'apës tii wiinkpë winma'any nmëët'ajty, yi'iyës nnikajpx ja Jesukristë ko ojts y'ooky kruutskëjxm.

³ Yaj'ayow yaj'ama'at jam nmiinyës ma miitsëtyën ets tsë'ëkë tsë'ëkë.

⁴ Ko miits ja Dios ntukmëmëtyaktë ets ntukmëpëkantë, ka'apës ojts nyajtuny ja aaw ayuk këjxmëtypë ëkë tëkatsyëtypë. Yë'ë ojts ntuk'ixtë ja Dios ja myëk'ajtën jyääntyajtën,

⁵ ets miits ja mëpëjkën xymyëët'atëty mëti'ipë jam tso'onpën ma Tiosën ets ka'ap yë'ëjëty mëti'ipë jam tso'onpën ma naaxwiinyëtë ja'ayën.

Tios yë'ë mëët tyajnikëxë'ëky ja jyot wyinma'any ja Kënu'kxymyëkajtën

⁶ E ma ja mëti'ipë tëë ënety myëpëjknëtën yajxon, nyajtuuntës ja aaw ayuk tsipëtypë. Je'eyëp ko ka'ap yë'ëjëty wijyajtën kejyajtën mëti'ipë ja naaxwiinyëtë ja'ay ets yajkutujkpëtëjk yajtuuntëpën, mëti'ipë ka'ap tii mëk'ajtën tmëët'atyën.

⁷ Yë'ë yajtijp ja Dios ja wyijy'ajtën kyejyajtën mëti'ipë ijty kayajnija'apën, mëti'ipë ja Dios tyuknipëjktakëyën tëëyëp ma ja naaxwiinyëtë ënety ka'ap tyajkojynyëmën ets ëëtsajtëm ntuk'oy'ajtmëty.

⁸ Yë'ë ya'atë mëti'ipë yë yajkutujkpëtëjk naaxwiinypë ka'ap të tja'akyukëtën. Ko jeexyë të tja'akyukëtë, ka'ap jeexyë ojts tyajkruutspätë ja Wintsën mëti'ipë myëët'ajtypyën ja mëj'ajtën jaanty'ajtën.

⁹ E jëtu'un të jyäty ijxtëm kuja'ay myinyën: Ni pën tka'ixy tkamëtoynyëm ets ni pën tkawinmaynyëm mëti'ipë ja Dios të tuknipëjktaakën.

¹⁰ Ya'atë jëtu'un ja Dios të xytyuknija'awëmë mëët ja Kënu'kxymyëkajtën, jä'ä ko ja Kënu'kxymyëkajtën, yë'ë nyija'awëtyääpy winë, yë'ëpaat mëti'ipë yë Dios myääpy tyäjpyën.

¹¹ ¿Pën jëtää y'ëknija'ap tii yë ja'ay myääpy tyäjpy, këtii yë'ëjëty kë'ëm ja ja'ayë? Näyjyëtu'un ka'ap pën nijawë mëti'ipë ja Dios myääpy tyäjpyën, yë'ë ja Dios ja Jya'awën kë'ëm nyija'ap.

¹² Ëjts, ka'apës ja njot nja'awën jyëtu'unëty ijxtëm ja ja'ayëtyën mëti'ipë yajtuuntëpën ja naaxwiinyëtë winma'any, jëtu'un ja njot nja'awënës ijxtëmës ja Dios të xytyukmëtsokyën koos të xymyo'oy etsës nja'akyukëty ja Dios ja y'oyajtën mëti'ipë ëëtsajtëm të xymyo'oyëmën.

¹³ Yë'ë nimëtyakëm ja aaw ayuk mëti'ipë ja Dios ja Jya'awën të xytyuknija'awëmën, ka'ap yë'ëty ja naaxwiinyëtë y'ijxpëjkën të xytyuknija'awëm. Jëtu'un ja ja'ay ntukmëmëtyakmëty ja Dios ja y'aaw y'ayuk mëti'ipë ja Kënu'kxymyëkajtën myëët'ajtëpën.

¹⁴ Pën ja Kënu'kxymyëkajtën ka'ap tmëëtëtyën, ka'ap tkupëky mëti'ipë ja Kënu'kxymyëkajtën jyä'ä'ajtypyën, jä'ä ko tsuuwinma'any tijy ets ka'ap tja'akyukë; ya'atë yë'ë mëët yajnijawë Kënu'kxymyëkajtën.

¹⁵ Ja ja'ay mëti'ipë ja Kënu'kxymyëkajtën myëët'ajtypyën, jyëkyejpy nikajpx nimëtya'akëty oytyiijëty ets ka'ap pën myäyëtëty tyuk'ojëtëty.

¹⁶ Jëtu'un ja Dios ja y'aaw y'ayuk kyëxja'ayëty: ¿Pën jëtää t'ëknija'ap ja Wintsën ja wyinma'any, pën jëtää tii y'ëktukni''ixëp? E ëëts'ajtëmë, nmëët'ajtëm ja Kristë ja wyinma'any.