1 Corintios 16 - Biblia Dc en Mixe de Quetzaltepec

Wi'ix ja putëjkën myukyën ets yajmo'otëty ja mëpëjkpëtëjkëty

¹ Ko ja putëjkën xyajmuktëty ets yajmo'otëty ja nmëku'uk'ajtëmë, tuntë ijxtëmë të ntuk'ëwaanëtën ja mëti'ipë tsënaaytyëpën jam Galacia y'itjotm.

² Wintu'ktominkë xynyikoonpätëty ja putëjkën, jëtu'un xypyukontëty wi'ix ënety tii xypyaatën ets xypyëjkë'ëktëty. Koos nja'tëty, ka'ap jää myukëty ja putëjkën.

³ Koos nja'tëty, jääjës nkäxëty ja ja'ayëty jam Jerusalén mëti'ipë ënety miits të xywyin'ixtën, yë'ë yajmo'ojantëp ja noky ets mëët tyajnëjkxtëty ja putëjkën.

⁴ Pën kopkpëky etsës ëjts näjyëtu'un nnëjkxëty, ënätës tu'knax nnëjkxtëty.

Ko Pablo nimëtyä'äky maajëty nyëjkxa'anyën

⁵ Koos nnëjkxëty ma miitsëtyën, Macedonia y'itjotmës naxa'any, koos jam ntsoonëty Corinto nja'ta'anyës.

⁶ Wä'än nëjkx jeky nyajpaatyës ma miitsëtyën, ëkë nyajnaxëtyës jam ja potmjot, ënät miits xypyutëkëtëtyës pën maas ënety njaaknëjkxy.

⁷ Ka'apës tëyë nnaxa'any, jeky jam nwë'ëma'anyës pën yajkutujkpy ja Wintsën.

⁸ E yaa Éfeso nwë'ëma'anyës maapaat ja pentecostés xëëw tpaatyën,

⁹ jä'ä ko tëëjës ja ntu'u y'ëwa'atsy oymyaajëty etsës ja ntuunk nyajwintu'upëkëty, oy pën wiink tja'ixy.

¹⁰ Pën ja'ajtp ja Timoteo jam, ixtë mëyatë ets akujk jotkujk nyäjyawëtëty ma miitsëtyën, nän Dios yë tyuunk yajtu'uye'eyëp ijxtëm ëjtsën.

¹¹ Jëtu'unts ka'ap pën xypyäxtëty. Putëkëtë miits wäänëni'ik etsës yam xynyiminëty mëët ja myëku'uktëjk, maas yam njëjp'ixtën.

¹² Tëës ja Apolo nmënu'kxtä'äky ets nëjkx mni''ixëtë mëët ja nmëku'uk'ajtëmë, je'eyëp ko tyam ka'ap nyanëjkxa'any, jäänëm nyëjkxëty ko ënety ja tiempo tmëëtëty.

Ko ja Pablo tjaakyajnaxy ja kajpxpo'kxën

¹³ Näy'ijx'itëtë näkyëwent'atëtë ets tu'ukyë xyaj'itëty ja mëpëjkën. Amëk jotmëk myajpaatëty, këtii mtsë'ëkëtëty.

¹⁴ Ets tu'kë'ëyë mëti'ipë mtuuntëpën, winë aaw winëjot tii xytyuntëty.

¹⁵ Mëku'uktëjkëty, mnija'awëtëp ko ja Estéfanas ja myëku'uktëjk yë'ë ojts jëyëjp tmëpëktë ja Dios ja y'aaw y'ayuk jam Acaya y'itjotm ets yë'ë tyam pyutëjkëtyëp ja ja'ayëty mëti'ipë mëpëjktëpën.

¹⁶ Yë'ës ntsojkpy ets miits xymyëmëtowtëty jëtu'unpë ja'ayëty, näjyëtu'un mëti'ipë putëjkëtëpën ets mëti'ipë jëtu'unpë tuunk tyuunk'ajtëpën.

¹⁷ Jotkujkës näjyawëty ko të myintë ja Estéfanas, Fortunato ets ja Acaico. Yë'ës të xypyutëkëtë ets të xyjyotmëkmo'otës ko miits të mkamintë.

¹⁸ Tëës xyajjotmëkpëktë ijxtëm miits näjyëtu'un të myajjotmëkpëkëtën, jëtu'unpë ja'ayëty paat'ajtëtëp ets miits xyajmëjnaxtëty.

¹⁹ Mkajpxpo'kxëtëp ja mëpëjkpëtëjkëty mëti'ipë tsënaaytyëpën jam Asia. Aquila ets ja Prisca mëët ja mëpëjkpëtëjkëty mëti'ipë ye'eymyujktëpën jam ma tyëjkën, yë'ë mtuknikäjxëtëp ja kajpxpo'kxën Wintsën xyëëwkëjxm.

²⁰ Kupëktë ja kajpxpo'kxën mëti'ipë ja nmëku'uk'ajtëmë ni'ëmukë kyäjxtëpën. Näkyajpxpo'kxëtë nixim niyam wa'ats aaw wa'ats jot.

²¹ Ëjts Pablo, kë'ëmës ya'atë kajpxpo'kxën nja'ay mëët yë nkë'ës.

²² Pën jää jënaakën ka'apë tsokyën ja Wintsën Jesukristë, wä'än t'ity kajpxpoky. Min tsojk Wintsën Jesukristë.

²³ Wä'än ja Wintsën mkënu'kxëtë.

²⁴ Xëmë miits nja'amyätstë mëët ja tsojkën ja'awën mëti'ipë ja Kristë Jesús yäjkpyën.