1 Corintios 15 - Biblia Dc en Mixe de Quetzaltepec

Ko Kristë jyuukpyiky

¹ Mëku'uktëjkëty, ja'amyätstë miits ja oy aaw oy ayuk mëti'ipë të ntuk'ëwaanëtën, yë'ë ya'atë aaw ayuk mëti'ipë miits të xykyupëktën ets yë'ë tyam tu'ukyë myaj'ijtëtëp.

² Näy yë'ë miits ya'atë aaw ayuk myajnitso'okëtëp pën ëmuumtu'ukjot xymyëpëktë mëti'ipë të ntuk'ëwaanëtën; pën ka'ap, natëkë miits të mëpëktë.

³ Mëtu'kpëky, yë'ë miits të ntuk'ëwaanëtë mëti'ipës të nyajtuk'ëwaanën näjyëtu'un. Yë'ë të ntuk'ijxpëktë ko ja Kristë ja npoky'ajtëm të tku'ookë, ijxtëm ja Dios ja y'aaw y'ayuk kyëxja'ayëtyën;

⁴ ko ojts tyajnaaxtëkëtë ets jyuukpyijky kom tëkëëk xëëw, ijxtëm näjyëtu'un ja Dios ja y'aaw y'ayuk kyëxja'ayëtyën;

⁵ ko ojts nyänyikëxë'ëkyë ma ja Pedro, ma ja y'ijxpëjkpëtëjkën ja nimajkmäjtskpë.

⁶ Ok ojts nyänyikëxë'ëkyë ma ja nimëkoxk mëko'px naxypyë ja mëpëjkpëtëjkëtyën. Tää nimay jyuuky'atënëm, jënaakën tëë y'o'knëtë.

⁷ Ok nyänyikëxë'kë ma ja Santiagën ets ma ni'ëmukë ja ijxpëjkpëtëjkëtyën.

⁸ Ets ma ëjtsën tim ok ojts nyänyikëxë'kënë, jä'ä ko jëtu'unës ëjts tä pi'k ëna'kën mëti'ipë ka'ap oy të myëxu'unk'atyën.

⁹ Ëjts këjääjës nkujënäkyëty ma ja ijxpëjkpëtëjkëtyën ets ka'ap xyjyapaatyës nyajtijëtyës ayuk käjpxynyajxpë, jä'ä ko n'ëxëëk'ijxypyës ijty ja Dios ja myëpëjkpëtëjk.

¹⁰ E ja Dios tëë ja myëj'ajtën tuny, paatyës të xykyupëky ets ja mëyajtën mëti'ipë të tunyën ka'ap ja nyatëkë'aty. Nikë tëëjës wäänëni'ik ntuny këtiinëm ja wiink ijxpëjkpëtëjkëty; je'eyëp ko ka'ap y'ëjtsëty kë'ëm, Tiosës të xypyutëkë mëët ja y'oyjyot y'oywyinma'any.

¹¹ E yë'ë ni'ik tsoowpatp ma yë'ëjëtyën ets ma ëjtsën, ko miits të xymyëpëktë ja Dios mëti'ipës të nnikäjpxy të nimëtya'aktën ma miitsëtyën.

Ko o'kpë jyuukpyëktë

¹² Pën yë'ëjës nnikäjpxyp nnimëtyäkpy ko ja Kristë jyuukpyijky, ¿tii ko miits jënaakën m'ëna'antë ko ja o'kpë ka'ap jyuukpyëka'antë?

¹³ Pën ka'ap ja o'kpë jyuukpyëka'antë, nän ka'ap ja Kristë jyuukpyijky;

¹⁴ ets pën ka'ap ja Kristë ojts jyuukpyiky, ja n'aaw n'ayukëtyës nëkoopë ja nyatëkë'aty, ets nän nitii ja tkatsowëty ja mëpëjkën mëti'ipë miits mmëët'ajtëpën.

¹⁵ Ko jeexyë ka'ap ja Kristë ojts jyuukpyiky, win'ë'ënpë jeexyë ëëts n'awinpitë, jä'äkyëjxm koos n'ëna'antë ko n'ijx nija'awëtyëpës mëti'ipë ja Dios tyuunën, jä'ä ko tëëjës n'ëknikajpxtëpë ko ja Dios Teety tëë ja Kristë tyajjuukpyiky. Pën tëy ko ja o'kpë ka'ap jyuukpyëka'any, ka'ap tyiyëty ko ja Dios Teety tëë ja Kristë tyajjuukpyiky.

¹⁶ E ko ja o'kpë ka'ap jyuukpyëktëty, ka'ap ja Kristë ojts jyuukpyiky;

¹⁷ ets pën ka'ap ja Kristë ojts jyuukpyiky, ka'ap miits yë mmëpëjkën tii tsowëty, jëtu'un miits je'eyëm m'itë pokyjotm.

¹⁸ Pën jëtu'un, mëti'ipë të y'ooktën ets myëpëjktë ja Kristë, nän tëëjën ja tyimkutëkoytyë.

¹⁹ Pën ja nmëpëjkën'ajtëmë yääyë naaxwiiny kyixy nyäxy ko ja Kristë nmëpëjkëmë, ëëtsajtëm nikë wäänë o'ktëy nyajpatëmë këtiinëm ja wiink ja'ayëty.

²⁰ E yë'ë tëy'ajtën'ajtp ko ja Kristë të jyuukpyiky, yë'ë jëtu'un ijxtëm më''ëka'any pyëti'ikyën ja pëjktä'äky, yë'ë jëyëjp të jyuukpyiky.

²¹ Jëtu'un ijxtëm tu'ukpë ja ja'ay ojts tyajnaaxkëtä'äkyën ja o'kën, näjyëtu'un ja ja'ay tu'uk të myiny ets të tyajnaaxkëtä'äky ja juukyajtën ets jyuukpyëktëty ja o'kpë.

²² Jëtu'un ijxtëm ja Adán y'o'kyën, jëtu'un ja naaxwiinyëtë ja'ay të y'o'kta'atë; näjyëtu'un ko ja Kristë jyuukpyijky näjyëtu'un ja naaxwiinyëtë ja'ay të jyuukpyëjkta'atë.

²³ Tuknipëjktaakë y'ity nitu'ukjaty. Ja Kristë jëyëjp ets ok nimina'any ja jyä'äy.

²⁴ Tääts kyëxëty nyaxëty ko ja Kristë tmëmëtakta'ajëty ja wintsëntëjk, yajkutujkpëtëjk, kutuunktëjk ets ja ënä'ämpëtëjk ets tukkë'ëtëjkënëty ja kuttujkën ja Dios Teety.

²⁵ Jëtu'un ja Kristë nëjkx yë'ë y'ënä'ämnë koonëm ja myëtsip tmëmëtakta'ajëty.

²⁶ Ok nëjkx tjaak mëmëtä'äky ja o'kën.

²⁷ Ja Dios tëë winë tpëjktä'äky ma ja Kristë ja tyekpya'tkën. Ko y'ënä'äny ko tu'kë'ëyë winë të tpëjktä'äky ma ja Kristë ja tyekpya'tkën, ka'ap yë'ëjëty tijy ko ja Dios ka'ap ja kuttujkën t'ëkmëët'ajnë, jä'ä ko yë'ë tyuknipëjktakëtyääpy winë.

²⁸ E ko ënety winë ja Kristë të kyë'ëtëjkëtyä'äyë, yë'ë Kristë kë'ëm, mëti'ipë Dios U'unk'ajtpën, nëjkxëp kë'ëm nyätyukë'ëtëkëty ja Dios ets yë'ë winë t'ënä'ämta'ajëty.

²⁹ Ets pën tëy ko ja o'kpë ka'ap jyuukpyiky, mëti'ipë të yajnëëpätëtën ja o'kpë ¿tii ko të tkupëktë? pën nyija'awëtëp ko ka'ap yë o'kpë jyuukpyëka'antë ¿tii ko të tkupëktë ets yajnëëpätëtëty?

³⁰ ¿E tii ko ëëtsajtëm xëmë janaam jatsojk atsë'ëkëtuuy n'ijtëmë?

³¹ Tëy miits nëëmëtë mëku'uktëjkëty, koos janaam jatsojkës n'ity o'kënjëjp'am ets tëyës n'ëna'any ko yë'ëjës ntukjotkujk'ajtyp ko miits ja Kristë të xymyëpëktë.

³² Koos jeexyë ëjts nkë'ëmwinma'any të nyajtunyës, koos të ntsiptuny mëët ja ja'ayëty mëti'ipë jëtu'unëtyën tä ëwa'an jëyujkën, ¿tiis jeexyë të npaaty të n'ixyës? Pën tëy ko ja o'kpë ka'ap jyuukpyëktë, jëtu'un ijxtëm ja ja'ay y'ëna'antën: Tsojk nka'ayëm n'ukëmë, jä'ä ko jëpom n'ooka'anëmë.

³³ Këtii myajwin'ëëntëty, ijxtëm ja ayuk y'ënä'änyën: yë ëxëëk ja'ayëty yajma'tëp ja oypyë tsëna'ayën.

³⁴ Niwinpitë ja oy juukyajtën, ka'ap m'ëk pokytyuunëtëty, jä'ä ko ka'ap miits ja Dios jënaakën xynyijawëtë. Miits mtsëtyu'unpatëp koos jëtu'un n'ëna'any.

Wi'ix ja o'kpë jyuukpyëka'antën

³⁵ Wä'än jëtää jënaakën tyajtëwtëty: ¿Wi'ix ja o'kpë jyuukpyëka'antë? ¿Wi'ix ja ni'kx kopk tmëët'ata'antë?

³⁶ Tsuuja'ayëty. Ko tëëmt yajni'ipy, o'kp ja tëëmt ets myuxy.

³⁷ Ko ja ja'ay nyi'ipy, ka'ap ujts aay tni'ipy ets yë'ë myuxy, tëëmt nyipy, wä'än tsajpmokëty ëkë wä'än twiink ujtsëty.

³⁸ Tääts ja Dios t'oytyuny ijxtëm yë'ë tsokyën, jëtu'unts ja tëëmt tpëjktä'äky wi'ix pyaat'atyën nitu'ukjaty.

³⁹ Ka'ap yë ni'kx kopk ni'ëmukë tyu'knaxëty, wiink yë ja'ay nyi'kx kyopk ets wiink yë jëyujk jyä'ä, wiink yë joon yë jyä'ä ets wiink yë ajkx yë jyä'ä.

⁴⁰ Näyjyëtu'un mëti'ipë tsajpwinm ets naaxkëjxy ijtëpën; wiink ja tsujajtën jam tsajpwinm ets naaxwinm.

⁴¹ Wiink ja xëëw y'äny, wiink ja po'o y'äny ets wiink ja matsa'a y'äny; ets matsa'apaat tëkatsy y'antë aak yë'ëjëty.

⁴² Näyjyëtu'un jyata'any ko ënety ja o'kpë jyuukpyëktë. Ko nyaaxtëkëtë, tëkooytyëp jä'äjëty; e mëti'ipë juukpyëjkpën ka'ap ja y'ëktëkoyanë.

⁴³ Mëti'ipë të nyaaxtëkën, jä'ä mëti'ipë ka'ap yajtsokyën; e mëti'ipë juukpyëjkpën oy yajtukxoontä'äky. Mëti'ipë naaxtëjkëpën yu'unk yë'ë e mëti'ipë juukpyëjkpën ta'tspëky yë'ë.

⁴⁴ Mëti'ipë naaxtëjkëpën, jëtu'un yë'ë ijxtëm ja oy nyatiijëtyën; e mëti'ipë juukpyëjkpën kënu'kxy yë'ë. Pën jää ja ni'kx kopk nän tää ja mëjaaw mëk'ajtën.

⁴⁵ Jëtu'un ja Dios ja y'aaw y'ayuk kyëxja'ayëty: Ja ye'etyëjk mëtu'ukpë, ja Adán, myëët'ajt ja juukyajtën; je'eyëp ko ja ix'okpë Adán, ja Jesukristë yajtijp, yë'ë ja juukyajtën të tmëminy tëkatsypë, ka'ap jyëtu'unëty ijxtëm ja mëti'ipë myëmiinën ja jëwyiinpën ja Adán.

⁴⁶ Jëwyiin yajmëët'aty ja naaxwiinypë ja ni'kx kopk ets ok ja tsajpjotmëpë ja ni'kx kopk.

⁴⁷ Ja jëwyiinpë ja ye'etyëjk mëti'ipë ojts yajtuk'oytyunyën ja naax, naaxwiinyëtë ja'ay jä'ä; e ja mëmäjtskpë, tsajpjotmëpë jä'ä.

⁴⁸ Yë ni'kx kopk mëti'ipë tyam nmëët'ajtëmën, jëtu'un yë'ë ijxtëm ja ja'ay nyi'kx kyopkën mëti'ipë naax yajtuk'oytyuuntën; ets ja ni'kx kopk mëti'ipë yajmo'ojantëpën ko jyuukpyëktëty, jëtu'un jä'ä ijxtëm ja Kristë ja jyä'äjën.

⁴⁹ Jëtu'un ijxtëm nkëxë'këmën naaxwiiny naaxkëjxy; jëtu'un nkëxë'ëka'anëm jam tsajpjotm jam tsajpjotm ijxtëm jam tsajpjotmën.

⁵⁰ Mëku'uktëjkëty, yë'ëjës ntijpy, ko ja ni'kx kopk mëët ja ne'pyny ets ja xixy, mëti'ipë nmëët'ajtëmën, ka'ap nëjkx yë'ëjëty nyijkx ma ja Dios ja kyutujktaknën; ets mëti'ipë o'kpën, ka'ap nëjkx xëmëkyëjxm y'ity.

⁵¹ E yë'ëjës ntsojkpy ets miits xynyijawëtëty mëti'ipë ijty ka'ap yajnijawën, ka'ap nëjkx ni'ëmukë n'o'këmë, je'eyë nëjkx ni'ëmukë ntëkajtsëmë,

⁵² tim pojën, tu'kwinmi'kxyë je'eyë, ko ja xuxn tu'k'okyë xyu'uxëty. Jä'ä ko nëjkxëp ja xuxn xyu'uxy ets ja o'kpë jyuukpyëktëty ets ka'ap y'ëk'o'knëtëty; ets ni'ëmukë nëjkx ntëkajtsëmë.

⁵³ Ja ni'kx'ajt nkopk'ajtëmë mëti'ipë wintëkoopyën, jëtu'un ja y'awinpita'any tä jeexyë ka'ap wyintëkoyën; ja mëti'ipë o'kpën jëtu'un ja y'awinpita'any tä jeexyë ka'ap y'ookyën.

⁵⁴ Ko nëjkx ja nni'kx'ajt nkopk'ajtëm y'awinpity ijxtëm ja mëti'ipë ka'ap wyintëkoyën ets ko y'awinpitëty tä mëti'ipë ka'ap y'ookyën, jä'ä ënety yajkuuytyuunp ja Dios ja y'aaw y'ayuk mëti'ipë ënaanpën: Tëë ja o'kën yajmëmëtä'äky.

⁵⁵ Ets näjyëtu'un y'ënä'äny: Mijts o'kën, ¿ma ja mmëkajtën të nyijkxy ets myajja'ay'ookëty? ¿Maa ja mëti'ipë mtukyajja'ay'o'kpyën?

⁵⁶ Pokykyëjxm ja ja'ay y'ooktë ets ënä'ämënkyëjxm ja poky tmëëtëty ja mëk'ajtën.

⁵⁷ Yajkukajpxëp ja Dios ko ja myëk'ajtën tyäky Wintsën Jesukristë mëët ets ja o'kën ka'ap xymyëmëtakmëty.

⁵⁸ Paaty, mëku'uktëjkëty mëti'ipës ni'ik ntsojktëpën, tu'ukyë ja mwinma'any xyaj'itëty; tuun'ëtë'ëtstë mëti'ipë ja Wintsën tsyojkpyën; jä'ä ko mnija'awëtëp miits ko ka'ap nyama'ata'any ja tuunk mëti'ipë mtuuntëpën mëët ja Wintsën.