1 Corintios 14 - Biblia Dc en Mixe de Quetzaltepec

Ja winma'any mëti'ipë tuuntääpyën oymyaajëty

¹ Yajtu'uye'etyë ja oyjyot oywyinma'any, tsojkën'atë ja tuunk mëti'ipë ja Kënu'kxymyëkajtën yäjkpyën, jä'ä wäänëni'ik m'amëtowtëp ja Dios ets ja y'aaw y'ayuk xykyajpxwa'kxëtëty.

² Pën ja wiink ayuk kyajpxtëp, Dios ja myëkajpxtëp, ka'ap jyä'äyëty; ka'ap pën twinmëtoy mëti'ipë kyajpxtëpën, jä'ä ko Kënu'kxymyëkajtën yajkajpxëtëp.

³ Pën kyajpxtëp ja aaw ayuk mëti'ipë Dios yäjkpyën, yë'ë tyuuntëp ets ja wiinkëtypë jyotmëkta'aktëty ets wyimpätëty ma ja myëpëjkënëtyën.

⁴ Pën kyäjpxyp ja wiink ayuk, yë'ë kë'ëm tyuk'oy'äjtyp; pën kyäjpxyp ja aaw ayuk mëti'ipë Dios yäjkpyën, yajwinpejtyp ja mëpëjkpëtëjk.

⁵ Njatsojkpyës ets jeexyë miits ni'ëmukë wiink ayuk xykyajpxtë; je'eyëp ko nikë oy ko xynyikajpxtëty ja Dios ja y'aaw y'ayuk këtiinëm ko xykyajpxtëty ja wiink ayuk. Ko yajkajpxtë'kxy, ënät jëtu'un tyuny ko ënety yajkäjpxy ja wiink ayuk ets wyimpätëty ja mëpëjkpëtëjk ja myëpëjkënëty.

⁶ Paaty, mëku'uktëjkëty, nimaa kyatuna'any ko miits nëjkx nku'ixëtë ets nmëkajpxtëty mëët ja wiink ayuk, pën ka'apës nnikäjpxy mëti'ipë ja Dios të xytyuknija'awëmën, jä'ä ko ka'ap ënety yë'ëjëty nkajpxnaxyës mëti'ipë ja Dios të xytyuknija'awëmën; ëkë ja mëtëypyë, ëkë mëti'ipë ja Dios të tjanikäjpxyën mëët ja kyäjpxynyajxpëtëjk.

⁷ Ko jeexyë yë mxuxnëty ka'ap tëkatyëty xyu'uxy, ¿wi'ix jeexyë yajnijawë tii xuxn yajtukxuxp?

⁸ Ko ja xuxn ka'ap oy yajtukxu'uxy ko ënety ja ja'ay tsyiptuna'any, ¿pën jää ëk näjyëjp'ixëtëp?

⁹ Näyjyëtu'un miitsëty, ko xykyajpxtëty ja aaw ayuk mëti'ipë ka'ap yajwinmëtoyën, ¿wi'ix yajnijawëty tii mjanimëtyaktëp? Pojjoty ënety je'eyë m'ayuk xy'ixkajpxtë.

¹⁰ May jää ja ayuk yaa naaxwiiny, tëkokyë myëët'ajtääpy ja mëto'owën wi'ix nyiwijyën.

¹¹ Pën ka'apës nwinmëtoy ja ayuk mëti'ipë ja'ay kyajpxtëpën, jëtu'un nëjkx yajwinjawë koos wiink kajpnës ntsoony ets ja ja'ay mëti'ipës xyjyamëkajpxpën nän jëtu'unës nëjkx n'ixy tä jëpyaat jëpyo'kxyën.

¹² Paaty, ko miitsëty yë'ë mtsojkën'ajtëp ja tuunk mëti'ipë ja Kënu'kxymyëkajtën yäjkpyën, yë'ë mëmay mëët'ajtëp mëti'ipë mtukputëkëtëpën ja mëpëjkpëtëjkëty ets ja myëpëjkën wyimpätëty.

¹³ Jëtu'unts, pën kyäjpxyp ja wiink ayuk, wä'än t'amëtoy ja Dios ets tkajpxtë'kxëty mëti'ipë kyäjpxypën.

¹⁴ Pën ëjts Dios mëkajpxpës mëët ja wiink ayuk, ja njot nja'awënës ënety mëët ja Dios nja'amyetsy, je'eyëp ko ka'apës nwinmëtoy mëti'ipës nkäjpxypën.

¹⁵ ¿E tiis ntuunta'akëp? Yë'ë tsojkëp etsës Dios n'amëtow npëjktsowëty ets nja'akyukëtyës mëti'ipës nkäjpxypën.

¹⁶ Ko mijts ja Dios xy'ëwtatëty ets xyajtunëty ja wiink ayuk, ets ja wiink ja'ay tmëtowëty ko tam ja Dios xymyëkäjpxy, ka'ap tjëkyepy mpukajpxëtëty jä'ä ko ka'ap ënety tja'akyukë mëti'ipë mjakäjpxypën.

¹⁷ Wä'än jëtää oy ja Dios xyjyakukajpxëty, je'eyëp ko ka'ap nëjkx ni pën tja'akyukë.

¹⁸ Nkukajpxëpës ja Dios jä'ä koos nkäjpxyës ja wiink ayuk may këtiinëm miitsëty ni'ëmukë;

¹⁹ je'eyëp ko ma ja mëpëjkpëtëjkën, nikë oyës je'eyë mëkoxk aaw nkajpxpëtsëmëty ets yajja'akyukëp këtiinëm koos majk mil aaw ayuk nkajpxnajpxëty ets ni pën tkaja'akyukëty.

²⁰ Mëku'uktëjkëty, këtii mmaytyëty mtajtëty ijxtëm ja pi'k ëna'kën. Jëtu'un tä pi'k ëna'kën mnäyajnaxëtëty ma ja ëxëëkpën, je'eyëp ko mëmay mëtajtë winë yajxon ets xyaj'ixëtëty ko mëj ja'ay'ajnëtë.

²¹ Jëtu'un jap kyëxja'ayëty ja Dios ja y'aaw y'ayuk: Wiink ja'ay ets wiink ayukës nyajtunëp, je'eyëp ko ka'ap xymyëj'ixa'antës, jëtu'un ja Wintsën y'ënä'äny.

²² Ko ja ja'ay ja wiink ayuk tkäjpxy, jä'ä yë'ë ets ja ja'ay yajtuk'ixtëty mëti'ipë ka'ap ja Dios tmëpëktën, ka'ap yë'ëjëty ets yajtukmëtowtëty yë mëpëjkpëtëjkëty. E ko ja ja'ay yajtukmëmëtyä'äky ja Dios ja myëj'ajtën, jä'ä yë'ë ets ja mëpëjkpëtëjk yajtuk'ixtëty, ka'ap yë'ëjëty mëti'ipë ka'ap myëpëktën.

²³ E ko ënety ja mëpëjkpëtëjk të ye'eymyuktë ets ja Dios jap tja'amyätstë ets aak wiink ayuk kyajpxtëp ets ja ja'ay wiinkpë tyëkëty mëti'ipë ka'ap myëpëkyën, jëtu'un ja wyinmayëty ko tëë mlokëjajta'atë.

²⁴ E pën yë'ë ënety jap mnikajpxtëp ja Dios ja y'aaw y'ayuk ets tu'uk ja ja'ay tyëkëty mëti'ipë ka'ap myëpëkyën, nëjkxëp ja tmëpëky ko tmëtowëty wi'ix m'ëna'antën.

²⁵ Jëtu'unts nëjkx yajnijawë mëti'ipë ënety jyotmay'äjtypyën jyootjoty wyinma'anyjoty ets ja Dios nëjkx twinkoxtänë ets tmëjjaw tjaantyjawëty ets nijawëty ko ja Dios yajpaaty ma miitsëtyën.

Wi'ix kyopkpëkyëtyën ko tii oy yajtunëty

²⁶ Mëku'uktëjkëty. Ko miits mye'eymyuktëty, jyëkyejpy jam pënëty y'ëwtëty, yaj'ijxpëktëty, nimëtya'aktëty ja Dios ja y'aaw y'ayuk, tkajpxtëty ja wiink ayuk ets wiinkpë tyajniwijtëty. Je'eyëp ko yë'ë mëti'ipë ni'ëmukë yajtuk'oy'atëpën.

²⁷ E ko pën tkajpxëty ja wiink ayuk, jam'atëp nimäjtsk ëkë nitëkëëk ja ja'ay mëti'ipë jyä'äkyukëtëpën ets nätyu'ukjaty ja ja'ay kyajpxtëty ets kopkpëky ko pën tkajpxtë'kxëty wi'ix ënety nyiwijyën.

²⁸ E pën ka'ap jam mëti'ipë kyajpxtë'kxëpën ma ja mëpëjkpëtëjkëtyën, nikë oy ko ka'ap pën tkajpxëty ja wiink ayuk, këëk'ayuk tyimkajpxtëty ets ja Dios atu'ukjaty xymyëkajpxtëty.

²⁹ Näyjyëtu'un ko pën tkajpxëty ja Dios ja y'aaw y'ayuk, nimäjtsk nitëkëëk kyajpxtëty ets ja wiinkëtypë t'amëtoow'itëty pën oy ëkë ka'ap y'oyëty.

³⁰ Pën jam pën ja Dios tyukwinjawëty wi'ix nyiwijyën ja aaw ayuk, tim ëmonëp ja mëti'ipë jam kajpxpën.

³¹ Jëtu'unts nätyu'ukjaty mkajpxtëty ets yajnijawëty tii ja Dios nyikajpxäämpy ets ni'ëmukë yajjatëty ets xim yam jotkujk wyë'ëmtëty.

³² Mëti'ipë käjpxynyajxpë'ajtëpën, tu'uk ja käjpxynyajxpë kyëwent'atëtëty,

³³ jä'ä ko Dios yë'ë jotkujk'ajtën nyiTios'ajtyp, ka'ap yë'ëjëty jo'opë winma'any. Jä'ä mpatuntëp wi'ix ja mëpëjkpëtëjk tuntën ma ye'eymyuktën.

³⁴ Amonyë ja to'oxytyëjk y'itëty ma ja mëpëjkpëtëjk ye'eymyuktën, jä'ä ko ka'ap kyutukyëty ets yë'ë jap kyajpxtëty. Ja nyiye'etyëjk ënä'ämëtëp ijxtëm ja Dios ja kyutujkën y'ënä'änyën.

³⁵ Pën jam tii ja to'oxytyëjk tnijawëja'antë, wä'än tyajtëwtë ja nyiye'etyëjk jam tyëkotm, jä'ä ko ka'ap y'oyëty ets ja to'oxytyëjk kyajpxëty ma mëpëjkpëtëjk ye'eymyuktën.

³⁶ ¿Ëkë jää jëtää ja Dios ja y'aaw y'ayuk yajnija'awëtyo'ony ma miitsëty, ëkë miitsëm jëtää të myajmo'otë?

³⁷ Pën jam pën nitu'uk nyäjyawëty ko Dios käjpxynyajxpë ëkë ko Kënu'kxymyëkajtën winma'anymyooyëp, nyijawëp ko mëti'ipë yam ntuknija'ayëtëpën Dios jëtu'un të tni'ënä'ämë.

³⁸ Pën ka'ap tmëjpëjktä'äky, ka'ap näjyëtu'un yajmëjpëjkta'akëty.

³⁹ Jëtu'un mëku'uktëjkëty, yë'ë tsojkën'atë ets xykyajpxwa'kxtëty ja Dios ja y'aaw y'ayuk ets ka'ap xy'akajpxtuktëty ko ja wiink ayuk yajkajpxëty.

⁴⁰ Tuntë tu'kë'ëyë winë oy tsuj, në'ëwitsy tu'uwitsy.