1 Corintios 13 - Biblia Dc en Mixe de Quetzaltepec

Oyjyot oywyinma'any

¹ Oyës njakäjpxy ja ayuk mëti'ipë ja naaxwiinyëtë ja'ay kyajpxtëpën, ëkë oyës njakäjpxy ja ayuk mëti'ipë ja tsajpjotmëtë kukäjpxy kyajpxtëpën, pën ka'apës ja njëëky nmëku'uk ntsoky njawë, jëtu'un tpaaty ijxtëm pujxn ja'ay twinwopyën ëkë ijxtëm pujxntexy je'eyë nëkoo nye'emyën.

² Oyës ja Dios ja y'aaw y'ayuk njanikajpxë ëkë oyës njaja'akyujkëtyä'äy mëti'ipë ja ja'ay nyija'awëtëp kyanija'awëtëpën, ets oyës mëk njamëët'aty ja mëpëjkën ets ja kopk nyajnëjkxëtyës wiinktsow ets pën ka'apës ja nmëku'uk ntsoky njawë, nitiijës nkakëjxmëty.

³ Ets pën npëjkwä'kxypës ja mpëjktä'äky ma ja ëyoopëja'ayën ëkë nkë'ëyäkyës ja ni'kx nkopk ets nyitoyëty, pën ka'apës ja nmëku'uk ntsoky njawë, nitiijës nkakëjxmëty.

⁴ Ko ja tsojkën ja'awën yajmëëtëty yajmëmëtakp winë; yaj'oyjyä'äy'ajtp, ka'ap pën yaj'ëxëëk'ixy, ka'ap nyämyëjpëjktä'äkyë ets ka'ap nyämyëjjaw nyäjyääntyjyawëty.

⁵ Ka'ap ëxëëk kyäjpxy, ka'ap tii aak pëky ooky tjawë; ka'ap y'ekyë, ka'ap jeky tii tsip'aty;

⁶ Ka'ap tukxoontä'äky ko ja ja'ay o'ktëy jyäty kyëpety, yë'ë tyukxoontäkpy ja tëyajtën.

⁷ Ko yajmëëtëty ja oyjyot oywyinma'any, yajku'ëyo'owëp winë, nmëpëjkmëp tu'kë'ëyë, njëjp'ijxmëp tu'kë'ëyë ets nmëtënä'ämyëp tu'kë'ëyë winë.

⁸ Ja oyjyot oywyinma'any nijëna'a kyakëxy kyanaxy. Pyaatëp ja xëëw jëmëjt ko nëjkx ka'ap y'ëkyajnikajpxnë mëti'ipë miinpën wiinkoonpën, ka'ap pën t'ëkkajpxnëty wiinkëtypë ja ayuk, ka'ap y'ëktuunëty ja ixpëkyajtën.

⁹ Ka'ap ja ja'aykyujkën mëtoowkujkën kä'pxy nmëët'ajtëm ets ka'ap ja Dios ja y'aaw y'ayuk kä'pxy nkajpxnajxëm,

¹⁰ je'eyëp ko minaanp mëti'ipë kä'pxy tii tyuunpyën, jää kyutëkoyä'äny mëti'ipë ka'ap kyä'pxyëtyën.

¹¹ Ko ijty nmutsk'atyës, kajpxpës, winmääpyës, ja'akyujkëpës, ijxtëm ja pi'k ëna'kën; ets koos të nyä'knë, tëëjës n'ëxmajtsnë wi'ixës të nmutsk'atyën.

¹² Näyjyëtu'un tyam ja Dios ja jyä'ä ka'ap wa'ats nnija'awëmë, jëtu'un n'ijxëmë ijxtëm ijxnjoty tii yajku'ixën ka'ap wa'ats yaj'ixy, jäänëm nëjkx n'ijxëm nnija'awëm ni'ëmukë ko ënety ja tiempo tpaaty. Ka'ap tyam ja n'ijxpeky'ajtënës kyä'pxyëty, je'eyëp ko nnija'awëtya'ajäämpyës winë ok, jëtu'un ijxtëm ja Dios të nijawën koos njääjëty.

¹³ Tëkëëk ja mëti'ipë tim kopkpëkyën: ja mëpëjkën, ja jëjp'ijxën ets ja tsojkën ja'awën; je'eyëp ko mëti'ipë wäänë kopkpëkyën ma ya'atë tëkëëkpën, yë'ë ja tsojkën ja'awën.