1 Corintios 12 - Biblia Dc en Mixe de Quetzaltepec

Ja mëyajtën mëti'ipë Kënu'kxymyëkajtën yäjkpyën

¹ Mëku'uktëjkëty, yë'ëjës ntsojkpy ets miits xynyijawëtëty ko ja Kënu'kxymyëkajtën tyäky kanaakjëjp ja tuunk.

² Mnija'awëtëp miitsëty, ko ijty ka'anëm xymyëpëktë ja Wintsën Jesukristë, ja awinax ijty mwintsë'këtëp, mëti'ipë ka'ap kyäjpxyën.

³ Paaty miits tyam ntuk'ëwaanëtë ko pën y'ëna'anëty: Kajpxpoky ja Jesús y'ity, ka'ap ënety ja Dios yë'ëjëty ja Jya'awënëty yajkäjpxyë ets näjyëtu'un ka'ap pën y'ëna'anëty: Jesús yë'ë Wintsën, pën ka'ap ja Dios yëë ja myëjaaw myëk'ajtën yajkäjpxyë.

⁴ Kanaakjëjp ja mëpëjkpëtëjk yajmo'otë ja tuunk, je'eyëp ko tu'uk ja Kënu'kxymyëkajtën mëti'ipë yäjkpyën.

⁵ Kanaakjëjp ja tuunk mëti'ipë ja ja'ay yajmooytyëpën, je'eyëp ko tu'uk ja Wintsën.

⁶ Kanaakjëjp ja mëk'ajtën mëti'ipë ja'ay yajmooytyëpën, je'eyëp ko tu'ukyë ja Dios, mëti'ipë tyuunpyën winë ets mëti'ipë winë yäjkpyën.

⁷ Dios yäjkpy ja nyi''ijxpäjtën ets nyikëxë'ëkëty ja Kënu'kxymyëkajtën ets ni'ëmukë ntuk'oy'ajtmëty.

⁸ Mëët ja Kënu'kxymyëkajtën pënëty yajmo'otë ja wijyajtën, ets ixpëkyajtën.

⁹ Tää mëti'ipë yajmoopyën ja mëpëjkën, ets tää mëti'ipë yajmooytyëpën ja tuunk ets ja pa'amja'ay tyajtso'oktëty.

¹⁰ Tää mëti'ipë kuttujkën yajmooytyëpën ets mëj'ajtën tyaj'ixëtëty, tää mëti'ipë käjpxynyajxtëpën. Tää wiinkpë mëti'ipë yajmooytyën yë mëj'ajtën ets nijawëtëty mëti'ipë Kënu'kxymyëkajtën oy ets ka'oyën, tä mëti'ipë wiink ayuk kyajpxtëpën ets mëti'ipë je'eyë jyä'äkyujkëtëpën.

¹¹ E ya'atë, tu'ukyë ja Kënu'kxymyëkajtën mëti'ipë tyuunpyën winë ets tmo'oy ja ja'ay nitu'ukjaty mëti'ipë y'oyjya'apën.

Kanaakjëjp ja tuunk

¹² Kanaakpëky winë tmëëtëty ja ni'kx kopk, tam ja kë'ë teky ets tam ja wiinkëtypë; je'eyëp ko tu'ukyë yë ni'kx kopk. Tim näjyëtu'un ja Kristë mëët ja jyä'äy.

¹³ Yë'ëkyëjxm ko tëë ni'ëmukë nnëëpäjtëmë mëët ja Kënu'kxymyëkajtën paaty tu'ukyë nyajpatëmë ijxtëm ja ni'kx kopkën tu'ukyëpë, wä'än tjutiis ja'ayëty ëkë wä'än tkajutiis ja'ayëty, wä'än tmëtuunpëty ëkë tkamëtuunpëty.

¹⁴ Ja ni'kx kopk tu'ukpë, ka'ap atu'uk tyuny, kanaakpëky ja tyuny.

¹⁵ Ko jeexyë ja teky y'ëk'ëna'any: ka'apës ni'kx kopk xyjyä'äjëty, jä'ä ko ka'apës nkë'ëjëty, ka'ap yë'ëkyëjxmëty kyajä'ä'atyë ja ni'kx kopk.

¹⁶ Ets ko jeexyë ja tatsk y'ënä'äny: ka'apës ni'kx kopk xyjyä'äjëty, jä'ä ko ka'apës nwiinëty, ka'ap yë'ëkyëjxm ja ni'kx kopk kyajä'ä'atyë.

¹⁷ Ko jeexyë yë ni'kx kopk aak wiin, ka'ap jeexyë nmëto'owëmë; ets ko jeexyë ja ni'kx kopk aak tatsk, ka'ap jeexyë tii nxuuk'ajtëmë.

¹⁸ Tëë ja Dios tuknipëjktaakë wi'ix ja ni'kx kopk y'itëtyën, nitu'ukjaty aaktam ja tyuunkëty, wi'ix kë'ëm të tsojkën'atyën.

¹⁹ Ko jeexyë yë ni'kx kopk tu'kpëkyë tyuny, ¿ma jeexyë yë wiinkëtypë tsyoontë?

²⁰ Tëy ko kanaakpëky yë ni'kx kopk, je'eyëp ko tu'ukyë ja ni'kx kopk.

²¹ Ja wiin wintimpë ja kë'ë t'ënëëmë: ka'ap mijts nyajmëyäty, ni yë këpajk tkanëëmëty ja teky: ka'ap mijts nyajmëyäty.

²² Ets mëti'ipë ka'ap ntukmë'ijxëmën tyuny, nikë yë'ë ni'ik nyajtu'unëm.

²³ Ets tu'kpëky ja ni'kx kopk mëti'ipë ka'ap nëkoo n'oyjya'awëmën, yë'ë wäänëni'ik wintsë'ëkë nyaj'ijtëmë; ets mëti'ipë ka'ap nyajnikëxë'këmën, yë'ë wäänëni'ik nkëwent'ajtëmë.

²⁴ Jëtu'un ja Dios të xytyuknipëjktakëm ets nmëma'ay nmëtajmëty mëti'ipë ka'ap nëkoo n'oyjya'awëmën.

²⁵ Këtiipë ja ni'kx kopk nyäwya'kxëtëty. Näpyutëkëtë nixim niyam wä'än tpënëty ets tu'ukyë myajpaatëty.

²⁶ Pën jam muum tu'kpëky ja ni'kx kopk y'ëyoy, näjyëtu'un ja wiinkëtypë y'ëyowta'atë; ets pën jam muum tu'kpëky oy y'ity, tu'ukyë oy yajpata'atë.

²⁷ Jëtu'un miits ja Kristë mëët mwë'ëmtë ijxtëm ja ni'kx kopk tu'ukpën ets jëtu'un miits nitu'ukjaty ijxtëm tu'kpëky ja ni'kx kopkën.

²⁸ Dios të tuknipëjktakëtyä'äy nitu'ukjaty tiijaty tyuntëpën: tam mëti'ipë Jesús y'ijxpëjkpë'ajtypyën, käjpxynyajxpën, yaj'ijxpëjkpën; nän tää mëti'ipë ja mëj'ajtën tyuuntëpën, mëti'ipë ja pa'amja'ay yajtsoktëpën, mëti'ipë ja ja'ay pyutëjkëtëpën, mëti'ipë ënä'ämtëpën, mëti'ipë ja tuunk yajmooytyëpën ets ja wiink ayuk tkajpxtëty.

²⁹ Ka'ap ja ja'ay ni'ëmukë y'ayukkajpxnaxtë, ka'ap ni'ëmukë Dios kyäjpxynyajxpë'atë, ka'ap ni'ëmukë yaj'ijxpëktë, ka'ap ni'ëmukë tuntë mëj'ajtën;

³⁰ ka'ap ni'ëmukë ja pa'amja'ay tyajtso'oktë, ka'ap ni'ëmukë tkajpxtë ja wiink ayuk, nän ka'ap ni'ëmukë twinjawëtë ja wiink ayuk.

³¹ Yë'ë miits tsojkën'atë ets ja Dios mmo'ojëtëty ja tuunk mëti'ipë wäänë oy ets tyam miits ntuk'ëwaanëja'antë ja në'ë tu'u mëti'ipë wäänë oyën.