1 Corintios 11 - Biblia Dc en Mixe de Quetzaltepec

¹ Mëti'ipës të nnajtstunën, yë'ë miits tuntë; ijxtëm ëjtsën yë'ëjës ntuunpy mëti'ipë ja Kristë të tnajtstunën.

Wi'ix jyä'äy'atëty ja to'oxytyëjk ma ja mëpëjkpëtëjk ye'eymyuktën.

² Ntukxoontäkpyës miits mëku'uktëjkëty, ko xyjyä'ämyätstës ets ko xypyatuntë ja ijxpëjkën mëti'ipë të ntuk'ëwaanëtën.

³ E ntukja'amyätsantëp näjyëtu'un ko yë Kristë yë'ë nyikëpajk'ajtyp yë ja'ay tu'uktu'uk; ets ye'etyëjk yë'ë nyikëpajk'ajtyp yë tyo'oxytyëjk, jëtu'un ijxtëm ja Dios nikëpajk'atyën ja Kristë.

⁴ Ko ja ja'ayëty kujupxë ëkë kupe'eny ja Dios tja'amyetsy ëkë ko ënety tkajpxwä'kxy ja Dios ja y'aaw y'ayuk, ja Kristë ënety kyawintsë'këp mëti'ipë këpajk'ajtpën.

⁵ Ets pën ka'ap yë to'oxytyëjk nyäkyupe'enyë ko ja Dios tja'amyetsy ëkë ko ja Dios ja y'aaw y'ayuk tkajpxwa'kxë, ja nyiye'etyëjk ënety kyawintsë'këp mëti'ipë kyëpajk'ajtypyën, jëtu'un tpaaty ijxtëm jeexyë të nyäkyukä'ptu'utyën.

⁶ Pën ka'ap ja to'oxytyëjk nyäkyupe'enyë, nikë oy ko jeexyë tyimnäkyukeepyë. Ets pën tsëtyuump ko nyäkyukeepyë, wä'än näkyupe'enyë.

⁷ Ye'eytyëjk ka'ap mëpaat nyäkyupe'enyë, jä'ä ko yë'ë ja Dios myëj'ajtën jyääntyajtën yajwinkëxë'këp ets ko nän yë'ë Dios yajmëjnajxyp. Ja to'oxytyëjk yë'ë ye'etyëjk myëj'ajtën jyääntyajtën yajwinkëxë'këp.

⁸ Ko ja Dios ojts tyajkojy ja ye'etyëjk ets to'oxytyëjk, ka'ap ojts jap ja ye'etyëjk tsyoony ma ja to'oxytyëjk ja kyätsy pyajkën, ja to'oxytyëjk jap ojts tsyoony ma ye'etyëjk yë kyätsy pyajkën.

⁹ Ja ye'etyëjk ka'ap ojts yë'ëjëty yajtukni'oytyunë ko jyää'aty ja to'oxytyëjk, ja to'oxytyëjk ojts yajtukni'oytyunë ko jyää'aty ja ye'etyëjk.

¹⁰ Mëët ko jyëtu'unëty ets ko jyää'atë yë anklëstëjkëty, yë to'oxytyëjk myëët'atëp yë kyumots ëkë kyupä'än mëti'ipë yajnikëxë'ëkëpën ko ja kuttujkën tmëët'aty.

¹¹ Oy jyajëtu'unëty, ma ja mëpëjkën, näjyëtu'un ja to'oxytyëjk tëyajtën tmëëtëty ijxtëm ja ye'etyëjkën.

¹² Tëy ko ja to'oxytyëjk ojts tsyoony ma ja ye'etyëjkën, ets tëy näjyëtu'un ko ja to'oxytyëjk yajmiimpy yajke'exyp ja pi'k ëna'k, je'eyëp ko Dios aakyë'ë nyikopk'ajtääpy winë.

¹³ Miits kë'ëm ëk'ixtë pën oy ko ja to'oxytyëjk ka'ap nyäkyupa'anëtëty ko ja Dios t'ëwtatëty.

¹⁴ Yë'ë ëëts ja naaxwiinyëtë ja'ay ja y'ënä'ämën nmëët'ajtëmë, tsëtyu'un yë'ë ko ja ye'etyëjk wyääy tyajyony.

¹⁵ Ka'ap tsyëtyu'unëty ma ja to'oxytyëjkën, tyukmëjnajxyp jä'ä ko wyääy tyajyony, jä'ä ko tëë yë wyääy yajmo'oy yony ets ja kyëpajk nyitukëty.

¹⁶ Pën jamts pën tii tjaakkajpxa'any, wä'än tnijawë ko ëëtsëty ets mëpëjkpëjkpëtëjk ka'ap tii wiinkpë winma'any yajmëëtëty.

Ko ka'ap yajmëjpëjktä'äky ja Wintsën ja y'a'ux

¹⁷ Mëti'ipë miits tyam ntuknija'ayëtëpën, ka'ap yë'ëty ets oy nimëtya'aka'antë. Ko mye'eymyuktë wäänë o'ktëy mjatë.

¹⁸ Mëtu'kpëky ëjts të nyajtukmëmëtyä'äky ko miits mye'eymyuktë, ma ja Dios xywyintsë'ëkëja'antën, këëkjä'ä xyajtu'uye'eytyë ja mtuunkëty; e ëjts nmëpëjkpyës.

¹⁹ Jëtu'un tyimjataanpë ets miits mnäpyëjkwa'kxëtëty ets yajnijawëty pën oy myëtuuntëp ja Dios.

²⁰ Ko mye'eymyuktë ets xy'atuunaxtë ja Wintsën ja y'a'ux, ka'ap jëtu'un xytyuntë ijxtëm ja Wintsën ojts tni'ënä'ämën.

²¹ Ko mkaya'antë, jënaakën jëwyiin jëyëjp kyääykyojtë, tyam jatu'kpëky ayuu y'ijtpë, jënaakën myuktëkooyënëtë.

²² ¿Këtii jëtää miits jam mjëën mtëjkëty ets jam mkaytyëty m'uuktëtyë? ¿Këtii jëtää miits xyajtsëtyuntë ja Dios ja myëpëjkpë mëti'ipë ka'ap tii tmëët'atë? ¿Wi'ixës n'ëna'anëty? Ka'ap tjëkyepy miits ntukxoonta'aktëty ko jëtu'un m'ëtë'ëtstë.

Wintsën y'a'ux

²³ Näy Wintsënës yë ijxpëjkën të xymyo'oy mëti'ipë miits të nmo'otën. Jä'ä koots ma ja Wintsën ënety yajkë'ëyaka'anyën, jää tkoonë'ky tu'uk ja tsajpkääky.

²⁴ Ets ojts ja Dios tkukajpxë, ënät ojts tujkwä'kxy ets y'ënäny: Ëjts ya'atë nxixy, mëti'ipë o'kpën ets miits xytyuk'oy'attëty. Mtuntëp ya'atë etsës xyjyä'ämyätstëty.

²⁵ Ko ënety të y'a'ux'ajta'atë, ënät ojts tkoonë'ëky ja a'ukën ets y'ënäny: Yë'ë ya'atë jempyë ja käjpxytyu'unën koos ja ne'pny tyunëty xyä'kxëty. Ko miits tëkok tëkok xy'uuktëty, jëtu'un xyjyaamyätstëtyës.

²⁶ Koonëm ja Wintsën myinëty, miitsëty yë'ë ënety mnikajpxtëp ko koo xykyäytyëty ya'atë tsajpkääky ets ko xy'uuktëty ya'atë tsatym nyëë.

Wi'ix yajtunëty ja Wintsën ja y'a'ux

²⁷ Jëtu'un, ko pën tkayëty t'uukëty ya'atë tsajpkääky ëkë ya'atë uuky ets ka'ap twinkutsë'ëkë, yë'ë ënety ja Wintsën ja nyi'kx kyopk myëtëkoopy.

²⁸ Paaty, jëyëjp xy'ixtëty xytyuntëty ja mjuukyajtënëty wi'ix myajpaatën naamka'anëm ënety xykyäytyë xy'uuktë ya'atë a'ux.

²⁹ E ko nëkoo ajotkumonë pën tkayëty t'uukëty ya'atë a'ux ets ka'ap tnijawë ko yë'ë ja Wintsën ja nyi'kx kyopk kyääpy y'ukpy, yë'ë ënety ja y'ëyo'on kyääpy jyi'kxyp.

³⁰ Paaty miits ja mmëku'uktëjkëty jënaakën pya'ampätë ets myontë tyuktë ets tää mëti'ipë të y'ooktën.

³¹ Kooxyëp jeexyë kë'ëm näyaj'o'oyëmë, ka'ap ja Dios jeexyë xytyiytyu'unëmë.

³² Ko ja Dios xytyiytyu'unëmë, oy yë'ë, ets nja'akyujkëmëty këtiipë npatmëty ja tëytyu'unën mëët ja ja'ayëty mëti'ipë yajtuuntëpën ja naaxwiinyëtë winma'any.

³³ Jëtu'un mëku'uktëjkëty, ko mkaya'an m'uuka'antëty, näy'ëwxitëtë nixim niyam.

³⁴ Ets pën jap pën yuu'ookyë, wä'än tkay jam ma tyëjkën ets ja Dios ka'ap tsyäätyunëtëty ko ënety kya'ëwxity ma ye'eymyuktën. Jäänëmës wiinkëtypë ja jotmay nyaj'oyëty ko ënety jam nëjkx nku'ixëtë.