1 Corintios 10 - Biblia Dc en Mixe de Quetzaltepec

Kajpxwijën ko ka'ap yaj'ëwtatëty ja awinax

¹ Mëku'uktëjkëty, ka'apës ntsoky ets miits xyjyä'ätyëkoytyëty ko ja n'ap'ajt n'ok'ajtëm yajpatë yoots akujky ets ko ni'ëmukë ojts tuknaxtë ja Tsaptsmejy.

² Ko ojts ni'ëmukë ja mayjyä'äy mëët ja Moisés yajpaatë yootsjoty ets tuknajxtë ja Tsaptsmejy; jëtu'un ojts nyäxy ijxtëm jeexyë nyëëpäjtën. Tu'ukyë ja wyinma'any tpëjktaktë ets tuuntë wi'ix ja Moisés y'ënä'änyën.

³ Näy jä'ä ojts tkaytyë t'uuktë ja Dios ja y'oyajtën, yë myëjaaw myëk'ajtën mooyëtë,

⁴ nän yë'ë nëë y'uktë mëti'ipë tsaajoty pëtsëëmën. Ja tsaa yë'ë ja Kristë, mëti'ipë ënety mëët tyu'uye'eytyën.

⁵ Oy jyajëtu'unëty, nimay ojts ka'ap tmëmëtowtë ja Dios, paaty ojts y'ooktë jam të'ëts'itjotm.

⁶ Tu'kë'ëyë ya'atë, paaty ojts jëtu'un tyunyë jyätyë ets ja ijxpät wyë'ëmëty ets ka'ap n'atsojkmëty ja ka'apë y'oyëtyën, ijxtëm yë'ëty t'atsojktën.

⁷ Paaty miits ka'ap xywyintsë'ëkëtëty ja awinax, ijxtëm ojts jënaakën y'ëtë'ëtstën. Ijxtëm ja Dios ja y'aaw y'ayuk kyëxja'ayëtyën: Naaxwä'tstë ja ja'ayëty ets kyääytyë y'uktë ets tyëjkëtyë äjtstë pujtpë.

⁸ Ka'ap pën ja jyot nyini'kx tookëty, ijxtëm pënëty ojts y'ëtë'ëtstën, ma ojts y'ooktën i'px tëkëëk mil tu'kxëëwpë.

⁹ Ka'ap ja Wintsën nwinma'any'ijxmëty, ijxtëm yë'ë ojts jënaakën y'ëtë'ëtstën mëti'ipëty ojts ja tsa'any kyutsu'utsëtën.

¹⁰ Ka'ap ja Dios yë'ë ntukjoot'anpëjkmëty, ijxtëm jënaakën y'ëtëtstën, tyukjoot'anpëjktë ja Dios ets ojts yaj'ookëtë ja tsajpjotmëtë kukäjpxy yajja'ay'o'kpë.

¹¹ Paaty jëtu'un jyajtë ja n'ap'ajt n'ok'ajtëm ets ja ijxpäjtën wyë'ëmëty ma ëëts'ajtëmë ets ojts yajkuja'ay ma ja Dios ja y'aaw y'ayukën ets nnija'awëmëty ma tyam njaakjuuky'ajtëmën ma ja xëëw kyëxanën.

¹² Jëtu'unts mëti'ipë maaytyëp tajtëpën ko oy tsyëënëtë, wä'än mëk näkyëwent'atëtë këtiipë pyokykya'atëty.

¹³ Ka'anëm miits xypyaatë ja ëyo'on jotmay mëti'ipë ka'ap yajmëmëta'akëtyën. Jyëkyejpy miits ëmuumtu'uk ja Dios xymyëpëktëty ko ka'ap mtukpaata'anëtë ja ëyo'on wäänë mëkpë mëti'ipë ka'ap myëmëtaknëtyën ets pën jää ënety ja ëyo'on jotmay xypyaatë, Dios nëjkx mputëkëtë ets xymyënax xyajnaxtëty.

¹⁴ Paaty, mëku'uktëjkëty, këtii xy'ëwtatëty ja awinax.

¹⁵ Jëtu'un yam miits nmëkajpxtë ijxtëm ja ja'ayëtyën mëti'ipë ja'akyujkëpën: kë'ëm mëmay mëtajtë mëti'ipë yam ntuknëmaaytyëpën.

¹⁶ Ko ojts n'ukëm ja kënu'kxynyëë a'ukënjoty ets ojts nyajmëjnajxëmë ja Dios, tu'ukyë ënety tpaaty n'ijtëmë mëët ja Kristë ja nye'pyny, ko ojts nka'ayëm ja tsajpkääky mëti'ipë ojts ntujkwa'kxëmën, tsojk ni'ëmukë ntukjotkujk'ajtëmë ja Kristë ja jyot nyini'kx.

¹⁷ Oy njanimay'ajtëmë, ni'ëmukë ëëts ja tsajpkääky ojts nka'ayëmë ja tu'ukpë, paaty tu'ukyë nyajpatëmë ijxtëm ja nyi'kx kyopkën tu'ukpë.

¹⁸ Ixtë ja Israel ja'ayëty: tsyu'tstëp ni'ëmukë ja jëyujk mëti'ipë të wyintsë'kën'atyën, tu'ukyë jam yajpaatë ma ja wintsë'këntyaknën.

¹⁹ Ka'apës n'ëna'any ko ja awinax mëk'ajtën tmëëtëty ëkë ja tsu'utsy mëti'ipë ënety ja awinax të yajtukwintsë'ëkën ka'ap jyëtu'unëty ijxtëm ja wiinkëtypë ja tsu'utyën.

²⁰ Mëti'ipës yam nnikäjpxypën, yë'ë ko ja ja'ay ja wyintsë'kën tpëjkta'aktë ma ja awinaxën, yë'ë ku'oypyë tyukwintsë'këtyëp, ka'ap Tiosëty; ëjts ka'apës ntsoky ets miits mëët ja ku'oypyë myajpaatëty.

²¹ Ka'ap tjëkyepy miits xytyuk'uukëtëty ja Wintsën ja y'a'ukën ets näjyëtu'un xytyuk'uukëtë ja ku'oypyë ja jyä'ä. Ets ka'ap tjëkyepy näjyëtu'un jam myajpaatëty ma ja Wintsën ja kyääypyäjnën ets myajpaatëty näjyëtu'un ma ja ku'oypyë ja kyääypyäjnën.

²² Ëkë ¿yë'ë Wintsën nyajjoot'anpëka'anëmë? ¿Wäänë mëj jëtää ja winma'any nmëët'ajtëm këtiinëm yë'ëjë?

Ëwa'atstum'ajtën ets ja tsojkën ja'awën

²³ Jëtu'un ja ayuk y'ënä'äny: Najtspëkë ja ja'ay y'ity oy tii tuna'anëty. Tëy jëtu'un, je'eyëp ko ka'ap tjëkyepy oytyiijëty tunëty. Najtspëkë ja ja'ay y'ity ets tuny mëti'ipë tyunäämpyën, je'eyëp ko ka'ap aak'oy wyimpëtsëmy ets yajwinpätëtëty ma myëpëkyën.

²⁴ Ëëts'ajtëm ka'ap nkë'ëm oyajtën n'ixta'ayëmë, n'ixta'ayëm ja wiinkëtypë ja ja'ay ja jyä'ä näjyëtu'un.

²⁵ Tsu'utstë miits ja tsu'utsy mëti'ipë to'këp ma ja tsu'utsytyo'ktaknën, ni xykyayajtëwtëty pën maa ja tsu'utsy tsyoony ets këtiipë poky yajjawëty ko xyjyë'kxtëty,

²⁶ jä'ä ko tu'kë'ëyë winë mëti'ipë jää'ajtpën naaxwiiny, yë Wintsën yë jyä'ä.

²⁷ Pën jää ja ja'ay jënaakën mwowëtë mwitsëtë mëkääpyë mëti'ipë ka'ap myëpëkyën ets mtsojktëp miits ets mnëjkxa'antë, jë'kxtë pëktë mëti'ipë mmooyëtëpën, ni xykyayajtëwtëty tii, këtiipë yajpokyjyäwëty ko xyjyë'kxtë.

²⁸ Pën jamts m'ënë'ëmxëtë: Tëë ya'atë tsu'utsy nyiwintsë'kën yajpëjktä'äky, ka'ap xyjyë'kxtëty këtiipë wiink t'ixëty mëti'ipë ënety të mtuk'ëwa'anxëtën ets këtiipë yajpokjyawëty mëti'ipë ënety mtuuntëpën.

²⁹ Wiink ja'ay jëtu'un ntijpyës ko tpokyjyawëty, ka'ap myiits'atë. E yajtëwtëp jënaakën: ¿Tii ko jëtää ëjts ja ja'ay wyinma'any nmëjpëjktakëty etsës ja nkë'ëmwinma'any ka'ap?

³⁰ Pën nkukajpxëpës ja Dios koos nkay n'uuky, ka'ap tjëkyepy ets wiink yajnimëtya'akëty mëti'ipës ëjts ntukxoontäkpyën.

³¹ Jëtu'unës yam n'ëna'any, pën mkaaytyëp m'uktëp, ëkë pën tii mtuuntëp mkajpxtëp, jëtu'un winë tuntë ijxtëm ja Dios yajtukmëjjawëtyën.

³² Ka'ap pën xymyo'otëty ja ijxpäjtën ëxëëk, ni yë'ë mëti'ipë jutiis kajutiis, ni yë'ë mëti'ipë yajpatëpën ma ja Dios ja nyaax kyajpnën.

³³ Mëët ëjts, yë'ëjës njatuunpy etsës ja nmëku'uk jyotkujk'atëty, ka'apës ja nkë'ëm oyajtën n'ixta'ay, ja wiinkëtypë ja jyä'ä n'ixtaayëtëpës ets tpaatëty ja nitsokën.