Sofonías 3 - Quechua Ayacucho Bible 1987

Jerusalen llaqta castigasqa kananmanta

¹ ¡Imallapiraq rikukunqa Jerusalen llaqtayoqkunaqa! Mana kasukuqmi kachkan paykunaqa. Millakuypaqñam rikurirun paykunaqa. Runakunatam ñakarichin paykunaqa.

² Manam Tayta Diostapas kasukurqakuchu. Manam corregichikuytapas munarqakuchu. Manam confiakurqakuchu Tayta Diospipas. Manam asuykurqakuchu Diosninkumanpas.

³ Paykunapaqa jefenkupas ñawrawyaq leonkuna hinam. Kamachiqninkupas tutan lloqsiq lobo hinam. Paqarinpaqqa manam puchunkuchu imallatapas.

⁴ Pay tukuspa traicionakuqllañam kachkan Diosmanta willaqninkupas. Diospaq sapaqchasqa kaqkunatam millakuypaqtaña rurachkan sacerdotenkupas. Panta-pantallatañam rurachkanku Diospa yachachikuynintapas.

⁵ Chawpinkupi kaq Tayta Diosmi ruran allin kaqkunataqa. Payqa manapunim ruranchu mana allin kaqkunataqa. Payqa sapa punchawmi allin arreglokunata ruran. Payqa sapa madrugawmi mana faltakuspan ruran. Mana allin runam ichaqa mana penqakuspaña ruran.

⁶ Tayta Diosmi nin kaynata: Ñoqaqa nacionkunatam chinkarachiniña. Torrenkunatapas murallanmantam tuñirachiniña. Callenkunatapas pasaypaqtañam chunnirachini. Mana pipapas purinantañam chunnirachini. Paykunapaqa llaqtankupas purmasqañam kachkan. Mana pipapas *f**yachanan purmasqañam kachkan.

⁷ Chaymi Jerusalen llaqtata nirqani: Qamqa segurochá manchakuwankiña, nispa. Corregisqaytaqa chaskiwankiñachá, nispa. Chayna kaptinqa *f**yachanankutapas manach tuñichiymanchu karqa. Chayna kaptinqa lliw castigoykunatapas manach wichiykachiymanchu karqa. Ichaqa chaywanpas afanakuyllawanñam mana allinkunata rurarqaku paykunaqa.

⁸ Chayraykum ñoqa Tayta Dios kaynata nini: Contraykichikpi rimarinay punchawkamayá suyaykuwaychik qamkunaqa. Nacionkunatawan gobiernokunata huñurunaypaqmi sentenciaruniña ñoqaqa. Ancha piñakuyllawanña castigarunaypaqmi paykunataqa sentenciaruniña. Tukuy kay pachapi kaqkunaqa sientikuruptiymi rupachkaq hina piñakuyniywan kanqaku kañasqaña.

⁹ Chay tiempo chayaramuptinqa rimasqankutam agradoypaqña tikrarusaq. Ñoqa Tayta Diostaña qayakuwanankupaqmi llapallankuta rurarusaq. Hukllaña serviwanankupaqmi chaynataqa rurarusaq.

¹⁰ Cus nacion mayukunapa chimpanmantaraqmi mañakuwaqniykunaqa hamunqaku. Ñoqapa cheqerachisqay runaykunam ofrendata apamuwanankupaq hamunqaku.

¹¹ Chay punchawpiqa manam penqakunkichikñachu mana kasukuspa contraypi rurasqaykichikmantapas. Chawpikichikmantam qarqorusaq paytukuq kasqaykichikwan kusikuqkunatapas. Chaynapim sapaqchakusqay orqopiqa manaña hatunchakunkichikchu qamkunapas.

¹² Ñoqa Tayta Diospi amparakuqkunataqa chawpillaykichikpim saqeykusaq. Ñakariqkunatawan wakcha runakunataqa chawpillaykichikpim saqeykusaq.

¹³ Israel casta puchuq runakunaqa manañam mana allintaqa ruranqakuñachu. Israel casta puchuq runakunaqa manañam llullatapas rimanqakuñachu. Manañam engañakuq runaqa kanqakuñachu. Ovejakuna hinañam michiqniyoq kanqaku Mana pipapas manchachisqanñam samakunqaku.

Jerusalen llaqtarayku kusikuyllawanña takisqankumanta

¹⁴ Sion llaqtapi *f**yachaqkuna, kusikuymantayá qaparillawanña takiychik. Israel nacionniyoq runakuna, tukuy sonqowan kusikuspayá qapariychik. Jerusalen llaqtapi *f**yachaqkuna, tukuy sonqoykichikwanyá llumpayta kusikuychik.

¹⁵ Tayta Diosqa contraykipi sentenciasusqaykitapas suchurachinñam. Enemigoykichiktapas kutirirachinñam. Qamkunapa chawpikichikpim kachkan Israel nacionpa reynin Tayta Diosqa. Chaynaqa manam manchakunkichikñachu haykapipas mana allintaqa.

¹⁶ Chay tiempopiqa Jerusalentam ninqaku: Sion llaqtapi *f**yachaqkuna, qamkunaqa amayá manchakuychikchu, nispa. Qamkunaqa amayá hukmanyaruychikchu, nispa.

¹⁷ Chawpikichikpim kachkan yupaychasqaykichik Tayta Diosqa. Tukuy atiyniyoqmi payqa salvasunaykichikpaqqa. Qamkunaraykum llumpayta kusikunqa. Kuyasusqaykichikraykum mosoqyachisunkichik payqa. Qamkunaraykum takikunawan kusikunqa.

¹⁸ Tayta Diosmi kaynata nin: Fiestakunapas manaña kaptinmi llakikurqankichik. Chay llakikuytaqa ñoqam qechurusqaykichik. Chay llakikuyqa qepi hinam llasasurqankichik. Chay llakikuyqa penqaymanmi churasurqankichik.

¹⁹ Lliw ñakarichisuqnikikunapa contranpim chay tiempopiqa hatarisaq. Wisturuqkunatam salvaykusaq. Cheqeruqkunatam huñuykusaq. Pipapas alabananmanñam tikrarusqaykichik. Reqsisqa runakunamanñam tikrarusqaykichik. Tukuy hinastinpim chaynata rurasqaykichik. Penqaypi kasqaykichikmantam chaynata rurasqaykichik.

²⁰ Ñoqa Tayta Diosmi kaynata nini: Chay tiempopim kutichimusqaykichik. Chay tiempopim huñumusqaykichik. Kay pachapi lliwpa reqsisqanmanñam qamkunataqa tikraykusqaykichik. Kay pachapi lliwpa alabananmanñam qamkunataqa tikrarusqaykichik. Preso kasqaykichikmanta kutichimuspayñam qawachkaptikichik rurapusqaykichik.