Salmos 1 - Quechua Ayacucho Bible 1987

PUNTA KAQ LIBRO (1-41) Cheqap kusikuymanta

¹ Mayna kusisqam mana allin runakunapa consejasqankuna mana chaskiq runaqa. Mayna kusisqam huchasapa runakunapa kawsasqanpi hina mana kawsaq runaqa. Mayna kusisqam Diosta burlakuqkunawanpas mana haykapipas hukllawakuq runaqa.

² Tayta Diosllapa tukuy ima yachachisqantam kuyakuyllawanña cumplen chayna runaqa. Tuta punchawmi chayna sumaq yachachisqanpi yuyaymanaykuspan cumplen chayna runaqa.

³ Chayna runaqa yarqapapas patallanpiña sumaqllaña wiñaq sachamanmi rikchakun. Chayna runaqa tiempollanpi sumaqllataña ruruykamullachkaq sachamanmi rikchakun. Chayna runapa tukuy ima rurallasqanqa alli-allinpunim haykapipas lloqsiykun.

⁴ Manam chaynachu pasaypaqpas kallanqariki mana allinllata kawsakullaq runaqa. Qopa wayrapa aparisqan hinaraqmiki kanqa mana allinkuna ruraq runaqa.

⁵ Chayna runaqa juicio ruray chayamuptinpas manapunimriki allinraqqa kanmanchu. Justo runapa kasqanmanqa manataqmiki huchayoqkunaqa pasaypaqpas rinmanchu.

⁶ Tayta Diosniyqa reqsichkanmi justokunapa kawsakuynillanqa allinpuni kallasqanta. Mana allinlla ruraqkunam ichaqariki kawsasqankupipas tarinqaku wañuyllata.