Rutwan Sutichasqa Libro 1 - Quechua Ayacucho Bible 1987

Moab nacionman Elimelec ripukusqanmanta

¹ Israel casta runakunapa jefenkunapa gobiernasqan tiempopim yarqay karqa Israel nacionpi chaymi Juda law Belen llaqtayoq runa Moab casta runakunapa allpanman ripukurqa hinaspam chaypi *f**yacharqa warminwan hinaspa iskaynin qari churinkunawan.

² Chay ripukuq runapa sutinmi karqa Elimelec, warminpañataqmi karqa Noemiy, iskaynin churinkunapa sutinñataqmi karqa Mahalon hinaspa Quelion. Juda law Belen llaqtamantam paykunaqa karqaku, chay llaqtapa huknin sutinqa Efratam. Paykunamá ripukurqaku Moab casta runakunapa allpanman.

³ Ichaqa Noemiypa qosan Elimelec wañukuptinmi Noemiyqa sapallanña qeparurqa iskaynin qari wawankunapiwan.

⁴ Paykunam Moab nacionniyoq warmikunawan casarakururqa, chay huknin warmipa sutinmi karqa Orfa, huknipañataqmi karqa Rut. Yaqa chunka wataña chaypi yacharuptinkum

⁵ wañukurqataq Mahalonwan Quelionpas chaymi Noemiyqa sapallanña qeparullarqa qosanpas hinaspa wawankunapas wañukuptin.

Noemiywan Rut Belen llaqtaman risqankumanta

⁶ Chaymantam Moab nacionpi kachkaspan Noemiy uyarirurqa llaqtamasinkunaman Tayta Dios allin cosecha qosqanta chaymi Noemiyqa Moab allpamanta iskaynin llumchuyninkunawan kutikurqa.

⁷ Chay *f**yachasqanku sitiomantamá lloqsirqaku Juda lawman pasanankupaq.

⁸ Ichaqa richkaptinkum Noemiy nirqa iskaynin llumchuyninkunata: —Kutikuychikyá sapakama mamaykichikpa wasinman. Tayta Diosyá qamkunata favorecesunkichik imaynam qamkunapas ñoqawan chaynataq wañukuq wawaykunawan rurasqaykichikpi hina.

⁹ Hina kikin Tayta Diostaqyá huk qaritapas sapakamaman qosunkichik chaynapi casarakuspa wasikichikpi hawkayayta tarinaykichikpaq —nispa. Chaynata nispamá Noemiyqa iskayninta muchaykarirqa chaymi qaparispa waqarqaku.

¹⁰ Llumchuyninkunam nirqaku: —Ñoqaykuqa qanwanmi ripusaqku llaqtaykiman —nispa.

¹¹ Hinaptinmi Noemiyñataq nirqa: —Kutikuychikyá wawallaykuna. ¿Imapaqtaq riwaqchik ñoqawanqa? Ñoqapaqa manañam kanqachu wawaypas casarakunaykichikpaqqa.

¹² Chaynaqa kutikuychikyá wawallaykuna, qosayoq kanaypaqqa payañam kani. “Wawayoqraqmi kasaq” nispay kunan tuta qosaywan puñuruyman hinaspa qari wawakunata wachakuruyman hinaptinpas

¹³ ¿suyawaqchikraqchu hatunyanankama? ¿Paykunata suyaspachum mana casarakuwaqchik? ¡Manam, wawallaykuna! qamkunamantam aswanraq llakikuni Tayta Diospa piñakuynin ñoqapa contraypi kasqanrayku —nispa.

¹⁴ Chaymi paykuna huktawan qaparispa waqarqaku. Chaymantam suegranta Orfa muchaykuspa pasakurqa, Rutñataqmi suegranwan qeparurqa.

¹⁵ Hinaptinmi Noemiyñataq nirqa: —Waqaya llumchuymasikiqa kutikun llaqtanman hinaspa diosninkunaman, chaynayá qampas kutikuy —nispa.

¹⁶ Ichaqa Rutmi nirqa: —Ama ruegawaychu qanmanta rakikuspa kutikunaypaq. Maymi risqaykimanmi ñoqapas risaq, maymi yachasqaykipim ñoqapas *f**yachasaq, aylluykikunam ñoqapa aylluy kanqa, Diosnikipas ñoqapa Diosniymi kanqa,

¹⁷ maypim wañukusqaykipim ñoqapas wañukusaq, chaypitaqmi pampakusaqpas. Sichu kawsananchikkama qanmanta rakikuptiyqa Tayta Diosyá llumpayta castigawachun —nispa.

¹⁸ Rutqa manaña saqeyta munaptinmi Noemiyqa chayta yacharuspan manaña hikutarqachu.

¹⁹ Chaynapimá iskayninku ripukurqaku Belen llaqtaman, chayaruptinkum lliw llaqtantin runakuna admirakurqaku paykunamanta, warmikunam ninakurqaku: —¿Noemiychus wak warmiqá? —nispa.

²⁰ Chaymi Noemiyñataq nirqa: —Amaña Noemiywanqa sutichawaychikchu aswanqa Marawanña sutichawaychik Tukuy Atiyniyoq Dios sinchita llakichiwasqanrayku.

²¹ Kaymantam lloqsirqani tukuy imayoq aswanqa kunanmi mana imayoqtaña Tayta Dios kutichimuwan. Chaynaqa ¿imanasqamá Noemiy nisparaqqa sutichawankichik? Tayta Diosmi contraypi sayarirqa, Tukuy Atiyniyoqmi llakichiwarqa —nispa.

²² Chaynapimá Noemiyqa kutirqa Moab casta llumchuynin Rutpiwan, Moab nacionmantam kutimurqa hina Belen llaqtanman. Chaynapim paykunaqa chayarurqaku cebada rutuy qallariyta.