Proverbios 9 - Quechua Ayacucho Bible 1987

Mana yachayniyoq kaypa contranpim kachkan yachayniyoq kayqa

¹ Yachaymi wasinta hatarirachin. Qanchis pilarninkunatam llaqllarachin.

² Convidopaqmi animalkunata wañurachin. Vinotapas alistaykuspam mesata mastarachin.

³ Serviqnin sipaskunawanmi runakunata qayarachimun. Llaqtapa altonkunamantaraqmi paykunata qayarachimun:

⁴ “Pisi experienciayoqkuna, asuykamuychik” nispa. Mana ancha yuyayniyoqkunatam nichimun:

⁵ “Hamuychik mikuy preparasqayta mikunaykichikpaq. Hamuychik alistasqay vinota tomanaykichikpaq.

⁶ Manaña pisi experienciayoq kaspayá kawsaychik. Entiendeq runakuna hinayá kawsaychik.”

⁷ Burlakuq runata pipas corregispaqa despreciachikunqam. Mana allin ruraq runata pipas qaqchaspaqa insultachikunqam.

⁸ Burlakuq runata anyaspaqa cheqnichikunkim. Yachayniyoq runata anyaspaqa kuyachikunkim.

⁹ Yachayniyoq runata consejaptikiqa aswan yachayniyoqmi kanqa. Allin ruraq runata yachachiptikiqa aswan yachayniyoqmi kanqa.

¹⁰ Yachayniyoq kanapaqqa Tayta Diostam respetana tukuymanta puntataqa. Entiendeq kanapaqqa. Chuya Diostam reqsina tukuymanta puntataqa.

¹¹ Ñoqaraykum nana-nanaq punchawkunata kawsakunki. Ñoqaraykum achka-achka watakunata kawsakunki.

¹² Ancha yachayniyoq runa kaspaqa qamllapaqchá yachayniyoq kanki. Burlakuq runa kaspaykiqa kikillaykim ñakarinki.

¹³ Llumpay rimaysapa warmi hinam sonso kayqa. Mana imallapas yachaqmi sonso kayqa. Pisi experienciayoqmi sonso kayqa.

¹⁴ Chayna warmiqa wasinpa punkunpiraqmi tiyan. Llaqtapa alton patakunapiraqmá tiyan.

¹⁵ Chaypi tiyaykuspanmi qayaypaq-qayan ñannin pasaqkunata. Chaypi tiyaykuspanmi qayaypaq-qayan derecholla pasaqkunata:

¹⁶ “Pisi experienciayoqkuna, asuykamuwaychik” nispa. Mana ancha yuyayniyoqkunatam qayan:

¹⁷ “Mayna miskillañam suwakuspa tomasqa yakukunaqa. Mayna miskillañam pakakuspa mikusqa tantakunaqa” nispa.

¹⁸ Ichaqa chay qayasqankunaqa manam yachanchu chaypiqa almakuna tarikusqanta. Ichaqa chay qayasqankunaqa manam yachanchu uku pachaman risqankuta.