Proverbios 8 - Quechua Ayacucho Bible 1987

Yachaypa qayakuyninmanta

¹ Qayakuchkaq runa hinam yachayqa qayakuchkan. Qaparichkaq runa hinam entiendeyqa qaparichkan.

² Ñanpa hichpan alto moqokunapim sayan qayakunanpaq. Ñanpa pallqankunapim sayaykun qayakunanpaq.

³ Llaqtaman yaykuna zaguankunapim payqa qaparin. Llaqtaman yaykuna punkukunapim payqa qaparin:

⁴ “Runakuna, qamkunatam qayachkaykichik. Runakuna, qamkunatam rimapayachkaykichik.

⁵ Pisi experienciayoq runakuna, qamkunapas entiendeychikyá. Sonso runakuna, qamkunapas entiendeychikyá.

⁶ Uyariychikyá, ñoqaqa sumaqllaña kaqkunatam rimasaq. Uyariychikyá, ñoqaqa Diospa munasqanman hinam rimasaq.

⁷ Cheqap kaqkunatam rimarisaq ñoqaqa. Manam munanichu mana allinmanta rimaytaqa.

⁸ Allin kaqkunallamantam rimani ñoqaqa. Manam pantachinaypaqchu rimani ñoqaqa. Manam huchallichinaypaqchu rimani ñoqaqa.

⁹ Tukuy nisqaykunaqa allinllam entiendeqkunapaqqa. Tukuy nisqaykunaqa Diospa munasqanman hinam yachay maskaqkunapaqqa.

¹⁰ Chaynaqa qollqemantapas mastaqa corregisqaytayá chaskiychik. Chaynaqa akllasqa qorimantapas mastaqa yachachisqaytayá chaskiychik.”

¹¹ Yachayniyoq kaymi alahaja rumikunamantapas aswan allinqa. Imaña munasqaykipas manam igualanmanchu chay yachaymanqa.

¹² Ñoqa yachayqa kuska kawsakuq runakuna hinam allin tanteaywan tupanakuni. Yuyaymanaspa allin consejokuna tariq runa hinam ñoqapas yachayta hatallini.

¹³ Tayta Diosta respetaq runaqa cheqninmi mana allintaqa. Ñoqapas cheqninim orgulloso runatawan hatunchakuq runataqa. Ñoqapas cheqninim mana allinlla kawsaq runatawan llullalla rimaq runataqa.

¹⁴ Ñoqallam kani allin consejo qokuqpas. Ñoqallataqmi kani yachaywan allin rurachiqpas. Ñoqallam kani allin entiendechiqpas. Ñoqallataqmi kani atiywan rurachiqpas.

¹⁵ Ñoqaraykum reykunapas allinta gobiernanku. Ñoqaraykum autoridadkunapas allinta decretanku.

¹⁶ Ñoqaraykum kamachikuqkunapas allinta kamachikunku. Ñoqaraykum munaychakuqkunapas allin arreglota ruranku.

¹⁷ Ñoqaqa kuyanim kuyawaqniykunataqa. Tariwanqakum chaylla maskawaqniykunaqa.

¹⁸ Ñoqapim tarinmanku apuyaytawan reqsisqa kaytaqa. Ñoqapim tarinmanku mana tukuy riquezatawan allin ruraytaqa.

¹⁹ Qorimantapas aswan allinqa ñoqapa qosqaymi. Qori-puromantapas aswan allinqa ñoqapa qosqaymi. Akllasqa qollqemantapas aswan allinqa ñoqapa qosqaymi.

²⁰ Allin ñanpi purichkaq runa hinam ñoqaqa purini. Derecho ñanpi purichkaq runa hinam ñoqaqa purini.

²¹ Kuyawaqniykunamanmi tupaqnin herencianta qoni. Qori-qollqewanmi paykunapa wasintapas huntachini.

²² Tukuy ima rurayta qallarichkaspanqa Tayta Diosmi hatalliwarqaña. Rurasqankunatapas manaraq rurachkaspanmi payqa-ñawpaqmantaraq hatalliwarqaña.

²³ Wiña-wiñaymantaraqmi ñoqaqa nombrasqa karqani. Kay pachapas manaraq unanchasqa kachkaptinmi ñoqaqa churasqa karqani.

²⁴ Uku-uku lamar qochakunapas manaraq kachkaptinmi rikurichisqa karqani. Achka-achka yakuyoq pukyukunapas manaraq kachkaptinmi rikurichisqa karqani.

²⁵ Orqokunapas manaraq takyachisqa kachkaptinmi rikurichisqa karqani. Moqokunapas manaraq rikurichkaptinmi rikurichisqa karqani.

²⁶ Kay pachatapas nitaq chakrakunatapas Tayta Diosqa manaraqmi unancharqaraqchu. Kay pachapa ñutu allpankunatapas Tayta Diosqa manaraqmi unancharqaraqchu.

²⁷ Cielokunatapas manaraq takyachichkaptinqa chaypiñam karqani. Uku-uku lamar qochapa muyuriqninta trazaptinqa chaypiñam karqani.

²⁸ Altokunapi puyukunata takyachiptinqa chaypiñam karqani. Kay pachapa uku-uku pukyunkunata takyachiptinqa chaypiñam karqani.

²⁹ Lindero churasqanmanta mana pasananpaq lamar qochata kamachiptinqa chaypiñam karqani. Kay pachapa cimientonkunata trazaptinqa chaypiñam karqani.

³⁰ Payta ruraysiq maestro hinam ñoqaqa karqani. Paytam sapa punchaw kusichirqani. Tukuy tiempom paypa ñawpaqninpi kusikurqani.

³¹ Paypa unanchasqan kay pachapim kusikurqani. Runakunaraykum ñoqaqa anchata kusikurqani.

³² Chaynaqa churillaykuna, uyariwaychikyá qamkunaqa. Mayna kusisqam yachachisqayman hina kawsakuqkunaqa.

³³ Corregisqayta kasukuspayá yuyayniyoqña kaychik. Yuyayta ama despreciaspayá yuyayniyoqña kaychik.

³⁴ Mayna kusisqam corredorniyman hamuspan suyapayawaqniy runaqa.

³⁵ Cheqap kawsakuytam tarirun pipas tariwaqniyqa. Tayta Diospa favornintam tarirun pipas tariwaqniyqa.

³⁶ Ichaqa ñoqamanta karunchakuq runaqa kikinpa contranpim huchallikuchkan. Ichaqa llapallan cheqniwaqniykunaqa wañuytam munachkan.