Proverbios 7 - Quechua Ayacucho Bible 1987

Pierdekuq warmipa engañakuyninmanta

¹ Churilláy, kasukuyá nisqaykunata. Sonqoykipiyá churay kamachisqaykunata.

² Kamachisqaykunata kasukuspaqa wiñaypaqmi kawsanki. Ñawi ruruykita hinam yachachikuyniykunata waqaychanki.

³ Dedoykipi anillota hinayá waqaychay. Papelpi qellqachkaq hinayá sonqoykipi qellqay.

⁴ Yachaytayá niy: “Qamqa paniymi kanki” nispa. Entiendeytañataq sutichay: “Aylluymi kanki” nispa.

⁵ Chaynapim chuchumika warmimanta librasunki. Chaynapim llampu rimaq sapaq warmimanta librasunki.

⁶ Wasiypa ventananmanta qawarispaymi, ventanaypa rejillasninmanta qawarispaymi

⁷ rikurqani pisi experienciayoq mozokunata. Paykunamantam rikurqani manaraq yuyayniyoq kaqta.

⁸ Callentam warmipa yachanan esquinaman pasarqa. Chayninta rispanmi chay warmipa wasinman pasarqa.

⁹ Inti seqaykuytaña tutaykuchkaptinñataqmi, astawan tuta chayaramuptinñataqmi

¹⁰ paywan tupaqnin huk warmi lloqsimurqa. Pachapakusqa sacre chuchumika warmim taripaykamurqa.

¹¹ Payqa rimaysapallaña warmim. Payqa mana kasukuq warmim. Wasinpipas mana takyaq warmim.

¹² Chay warmiqa callekunapiraqmi wateqachkan. Chay warmiqa plazakunapiraqmi wateqachkan. Llapa esquinakunapiraqmi wateqachkan.

¹³ Chay warmim mozota hapiruspan muchaykurqa. Mana recelaspantaqmi payta niykurqa:

¹⁴ “Tayta Dioswan allin kasqaymantam ofrenday kapuwachkan. Prometesqay ofrendakunam pagasqaña kachkan.

¹⁵ Chayraykum qanwan tupaykuq lloqsimurqani. Qamta qawaykuyta munaspaymi tariramunaykama hamurqani.

¹⁶ Camaytam sumaq colchakunawan qataramuni. Egipto nacionmanta colorniyoq lino colchawanmi qataramuni.

¹⁷ Mirra sutiyoq miski asnaqtam camaymanpas hinaramuni. Aloes sutiyoq miski asnaqtam camaymanpas hinaramuni. Canela sutiyoq miski asnaqtam camaymanpas hinaramuni.

¹⁸ Rispanchikyá aminanchikkama kuyanakamusunchik.

¹⁹ Manam wasipichu qosayqa. Karutam illarun payqa.

²⁰ Wayqapi qollqeta apaspanmi pasarqa. Chawpi killatañam kutimunqa payqa.”

²¹ Hikutaspanmi mozota convencerachirqa. Sumaqllaña rimayninwanmi payta pasachirqa.

²² Chayllataqmi mozopas payta qatirikurqa. Camalman bueyes richkaq hinaraqmi pasakurqa. Toqllaman wichiykuq luwichu hinaraqmi wichiykurqa.

²³ Sonqonta flecha pasarunankamam wañunanta mana yachakunchu. Toqllaman urpitu pawaykuq hinataqmi chay mozopas wañuyman risqanta mana yachakunchu.

²⁴ Chaynaqa uyariykuwaychikyá, churillaykuna. Chaynaqa nisqaykunatayá atiendeychik, churillaykuna.

²⁵ Chay warmipa kawsasqanman hina kawsaytaqa amayá piensayñachu. Chay warmipa pantasqanta hinaqa amayá pantayñachu.

²⁶ Payqa achkaqtañam pantarachispan heridasqata saqerun. Nana-nanaq runakunatañam wañusqata saqerun.

²⁷ Wasinman riq ñanqa wañuqkunapa kasqanmanmi richkan. Wasinman riq ñanqa wañuqkunapa kasqanmanmi chayachkan.