Proverbios 6 - Quechua Ayacucho Bible 1987

Mana reqsisqa runamanqa mana garantizanamanta

¹ Churilláy, runamasikita garantizaspaykiqa, mana reqsisqayki runata garantizaspaykiqa

² rimasqaykiwanmi toqllaman hina wichiykunki. Rimasqaykiwanmi preso hina hapirachikunki.

³ Chayna kaptinqa churilláy, runapa makinpiña kasqaykiraykuyá kaynata ruray. Librakunaykipaqyá kaynata ruray: Humillakuspaykiyá amistadnikita chaylla ruegakamuy.

⁴ Chaynaqa amayá puñuywan hapichikuychu. Chaynaqa amayá ratollapas puñuruychu.

⁵ Hapiq runamanta lluptichkaq luwichu hinayá lluptikuy. Pawaq animalta toqllawan hapiqmanta hinayá ayqekuy.

Qellakuna anyanapaq yachachikuymanta

⁶ Yaw qella runa, yachayniyoq kanaykipaqyá sisita qawamuy. Yaw qella runa, yuyayniyoq kanaykipaqyá imaynam kawsasqanta qawamuy.

⁷ Sisipaqa jefenpas manam kanchu. Sisipaqa capatazninpas manam kanchu. Sisitaqa manam pipas kamachinchu.

⁸ Chaywanpas payqa rutuy tiempopim mikuyninta segurakun. Chaywanpas cosecha tiempopim mikunanta huñukun.

⁹ Yaw qella runa ¡ima horakamataq qamqa puñunki! Yaw qella runa ¡ima horañataq qamqa hatarinki!

¹⁰ Puñuywan hapichikuspa puñunaykikamam, makikikunatapas chupqaruspa samanaykikamam

¹¹ yanqa purikuq runa suwarususpayki wakchayarachisunki. Salteaq runam mana imayoqta rikurirachisunki.

Mana allin ruraqkunapa imaynam kasqanmanta

¹² Mana penqakuq runaqa llullakunata willakachakustinmi purin. Mana allin runaqa llullakunata willakachakustinmi purin.

¹³ Chay runaqa ñawinkunatam qemchityachin engañananpaq. Chay runaqa chakinkunawanmi señaschan engañananpaq. Chay runaqa dedonkunawanmi tupqen engañananpaq.

¹⁴ Mana allinllatam tukuy tiempopi piensachkan. Mana allinllatam tukuy tiempopi yuyaymanachkan. Tukuy tiempopim runakunata peleanachichkan.

¹⁵ Chayraykum qonqaymanta desgraciapi rikurirunqa. Huk ñawi qemchiyllapim pasaypaqtaña puchukarunqa.

Tayta Diospa millakusqankunamanta

¹⁶ Soqta huchakunatam cheqnin Tayta Diosqa, qanchis kaqtaqa pasaypaqtam millakun payqa:

¹⁷ Cheqninmi hatun tukuq runata. Cheqninmi llulla rimaq runata. Cheqninmi inocente runa wañuchiqta.

¹⁸ Cheqninmi mana allinkunata rurananpaq yuyaymanaqta. Cheqninmi mana allinta ruramunanpaq chaylla kallpaqta.

¹⁹ Cheqninmi llullakuna rimaq testigota. Millakunmi wawqentinpuralla peleanachiqta.

Hukwan pierdekuy huchamanta

²⁰ Churilláy, kasukuyá taytaykipa kamachisusqaykitaqa. Churilláy, amayá qonqaychu mamaykipa yachachisusqaykitaqa.

²¹ Qasqoykipi adornota hinayá mana qonqaspa apaykachay. Kunkaykipi mana qonqaspa collarta hinayá apaykachay.

²² Chaykunam puriptikipas pusasunki. Chaykunam puñuruptikipas harkasunki. Chaykunam rikchariptikipas rimapayasunki.

²³ Taytaykipa kamachisusqaykiqa mechero hinam. Mamaykipa yachachisusqaykiqa achkiy hinam. Taytaykipa anyakuyninqa wiñay kawsayman pusasuqnikim. Taytaykipa corregisusqaykiqa wiñay kawsayman pusasuqnikim.

²⁴ Chay nisusqaykikunam chuchumika warmimanta waqaychasunki. Sapaq warmipa alabasunaykimantam harkasunki.

²⁵ Buenamoza kaynintaqa amayá sonqoykipi munapayaychu. Sumaqllaña ñawinkunaqa amayá sonqoykita suwachunchu.

²⁶ Chuchumika warmiraykum qariqa rikurirun huk millpuy tanta hinallaña. Hukwan pierdekuq warmiñataqmi hapichkan chay qaripa llumpay precioyoq vidantaña.

²⁷ Pipas marqayninpi ninata apaspanqa pachantam kañarachikun.

²⁸ Pipas sansa hawanpi purispanqa chakintam ruparachikun.

²⁹ Chaynam kanqa runamasinpa warminwan kakuq runaqa. Manam lluptinmanchu castigasqa kananmantaqa.

³⁰ Manam pipas desprecianchu wakcha runa suwakuruptinqa. Manamá pipas desprecianchu yarqaymanta suwakuruptinqa.

³¹ Chaywanpas hapirachikuspanqa qanchis kuti mastam pagapunqa. Chaywanpas hapirachikuspanqa wasinpi lliw kapuqninwanmi pagapunqa.

³² Hukpa warminwan huchallikuq runaqa mana yuyayniyoq runam. Hukpa warminwan huchallikuq runaqa kikillan wañuchikuq runam.

³³ Chayna runaqa maqachikuspanmi tukuyta nichikunqa. Manam pipas qonqanqachu penqaypi kasqantaqa.

³⁴ Celoso kayninmi runapa piñakuyninqa. Manam hawkayanqachu vengakunan punchawpiqa.

³⁵ Manam chaskinqachu imataña pagaptinpas. Manam pampachanqachu achkallaña regalokunata qoptinpas.