Proverbios 5 - Quechua Ayacucho Bible 1987

Chuchumika warmimanta waqaychakunapaq

¹ Churilláy, uyariy yachaywan nisqaykunata. Churilláy, atiendey entendimientowan nisqaykunata

² chaynapi allin kaqkunata akllanaykipaq, chaynapi yachaywan rimanaykipaq.

³ Miel hina miskillañam chuchumika warmipa rimayninqa. Aceitemantapas aswan llampuraqmi chuchumika warmipa rimayninqa.

⁴ Chaywanpas rurayninqa ajenjopa qatqen hinaraqmi llakichikun. Iskay filoyoq espadapa filonmantapas aswanraqmi kachukun.

⁵ Chay warmiqa wañuymanmi richkan. Payqa wañuqkunapa kasqanmanmi richkan.

⁶ Chayna warmiqa wiñay kawsaytapas manam maskanchu. Pantaypi kawsasqantapas manam cuentata qokunchu.

⁷ Churillaykuna, chaynaqa uyariwaychikyá nisqaykunata. Churillaykuna, amayá rakikuychikchu nisqaykunamanta.

⁸ Karunchakuyá chay warmiman riq ñanmantaqa. Amayá asuykuychu paypa wasinpa punkunmanqa.

⁹ Mana chayqa kallpaykitam qowaq hukkunaman. Mana chayqa vidaykitam qowaq hukkunaman.

¹⁰ Mana chayqa mana reqsisqayki runakunam imaykikunawanpas saksarunmanku. Mana chayqa llamkasqaykipa ruruntam mana reqsisqaykipa wasinpi saksarunmanku.

¹¹ Chayna kaptinqa cuerpoyki tukunayaptinmi qepataña waqawaq. Chayna kaptinqa aychayki tukunayaptinmi qepataña waqawaq.

¹² Yanqataq niwaq: “Yanqam aburrikurqani corregiwaptinku. Manam tukuy sonqoywanchu chaskirqani anyawaptinku.

¹³ Yachachiwaqniykunapa niwasqantapas manam kasukurqanichu. Maestroykunapa niwasqantapas manam uyarikurqanichu.

¹⁴ Yaqallamya tukuy desgraciapi rikuriruni. Llaqtamasiykunapa qayllanpim yaqalla tukuy desgraciapi rikuriruni.”

¹⁵ Yakunayasuptikiqa kikikipa pozoykimantayá tomay. Pozoykimanta pullpumuq yakutayá tomay.

¹⁶ Pukyuykipi yakuqa amayá callekunaman usuchunchu. Kallpaq yakuykipas amataqyá plazakunamanqa usuchunchu.

¹⁷ Qamllapaqyá kachun pozoykipi yakuqa. Amayá qoychu mana reqsisqayki runakunamanqa.

¹⁸ Kapusuqniki pukyuyki hina warmikiqa Diospa bendecisqanyá kachun. Mozo kasparaq kasarasqayki warmikiwanyá sonqoykiqa contentakuchun.

¹⁹ Payqa kachun kuyayllapaq luwichu hinayá. Payqa kachun kuyayllapaq monte cabra hinayá. Paypa ñuñullanwayá tukuy tiempopi contentakuy. Paypa kuyakuynillanwanyá tukuy tiempopi wañurinaykikama contentakuy.

²⁰ Churilláy ¿imapaqtaq mana reqsisqayki warmiwanqa kusikuwaq? Churilláy ¿imapaqtaq runapa warmintaqa abrazawaq?

²¹ Runapa vidantaqa Tayta Diosmi sumaqta yachan. Paykunapa kawsasqantapas paymi qawarayan.

²² Mana allin ruraq runataqa mana allin rurasqanmi presocharun. Mana allin ruraq runaqa waskawan chaqnasqa hinam huchankunawan rikurirun.

²³ Mana corregikusqanraykum wañurunqa. Loco hina rurasqanraykum pantarunqa.