Proverbios 3 - Quechua Ayacucho Bible 1987

Yuyayniyoq kanapaq imaynam ruranamanta

¹ Churilláy, amayá qonqaychu yachachikuyniykunata. Churilláy, sonqoykipiyá waqaychay kamachikuyniykunata

² hinaptinqa unay watakunam kawsakunki, hinaptinqa hawkallañam kawsakunki.

³ Ama qonqaspamá kuyapayakuq kanki. Ama qonqaspamá cheqapllata rimanki. Chaykunataqa kunkaykimanyá collarta hina wallqakuruy. Chaykunataqa tablapi qellqachkaq hinayá sonqoykipi qellqaruy.

⁴ Hinaptinqa Diospa chaynataq runakunapa favorecesqanmi kanki. Hinaptinqa Diospa chaynataq runakunapa reqsisqanmi kanki.

⁵ Tayta Diosllapiyá confiakuy tukuy sonqoykiwanqa. Amayá confiakuychu kikikipa entiendesqallaykipiqa.

⁶ Tukuy kawsasqaykipiyá yuyariy Tayta Diosta. Paymi munasqanman hina kawsachisunki qamta.

⁷ Amayá ancha yuyayniyoq kasqaykipaqchu hapikuy. Tayta Diosta respetaspaykiyá mana allinmanta asurikuy.

⁸ Chaynata ruraptikiqa cuerpoykipas hampisqaraqmi kanqa. Chaynata ruraptikiqa cuerpoykipas kallpachasqaraqmi kanqa.

⁹ Tayta Diosta alabay tukuy kapuqnikikunawan. Tayta Diosta alabay llapallan kawsaynikipa punta kaq rurunkunawan.

¹⁰ Hinaptinqa kawsaykuna taqenaykipas astawanmi huntarinqa. Hinaptinqa uvas sarunayki uvaspa zumonwanmi llimparinqa.

¹¹ Churilláy, amayá despreciaychu Tayta Diospa castigontaqa. Churilláy, amayá hukmanyaychu Tayta Diospa anyasusqaykiwanqa.

¹² Tayta Diosqa kuyasqan runatam corregin. Taytapas kuyasqan churinta castigachkaq hinam payqa corregin.

¹³ ¡Mayna kusisqam yachayta tariq runaqa! ¡Mayna kusisqam allin entiendeq runaqa!

¹⁴ Yachay chaskisqanmi mastaqa valen qollqemantapas. Entiendeq kayninmi mastaqa valen qorimantapas.

¹⁵ Coral alhaja rumimantapas mastaraqmi valen yachayniyoq kayqa. Kuyayllapaq kaq tukuy imapas manam igualanchu yachayniyoq kaymanqa.

¹⁶ Yachayqa *f**alleq makinwanmi unay kawsakuyta qosunki. Yachayqa *f**ichoq makinwanmi apuyachisuspayki reqsisqata rurasunki.

¹⁷ Yachaypa yachachisqanwanqa runapas kusisqam kawsakunqa. Yachaypa yachachisqanwanqa runapas hawkallam kawsakunqa.

¹⁸ Yachayqa kawsay qokuq sacha hinam hatalliqninkunapaq. Yachayqa kusikuy qokuqmi hapiqnin runakunapaq.

¹⁹ Tayta Diosqa chay yachaywanmi kay pachata cimientarqa. Tayta Diosqa chay entiendeywanmi cielokunatapas takyachirqa.

²⁰ Yachayninwanmi toqyachimurqa uku-uku lamar qochata. Yachayninwanmi sullatapas sullachimurqa puyukunamanta.

²¹ Churilláy, allin kanaykipaq yachayniyoq kaytaqa amayá qonqaychu. Yachaywan allin kaqkuna akllaytaqa amayá qonqaychu.

²² Chaykunaqa qamtam kawsachisunki. Chaykunaqa kunkaykipi collar hinam adornasunki.

²³ Chaynaqa segurom purikunki ñannikipipas. Chaynaqa manam mitkanqachu chakikipas.

²⁴ Siriykuspapas mana manchakuspam puñunki. Siriykuspapas miskillatañam puñukunki.

²⁵ Qonqaymanta hamuq mancharikuypaq kaqkunamantaqa manam manchakunkichu. Mana allin runakunaman hamuq desgraciamantapas manataqmi manchakunkichu.

²⁶ Tayta Diosmi kanqa anchallataña confiakunaykiqa. Toqllawan hapisqa kanaykimantapas paymi waqaychasunkiqa.

²⁷ Ama recelaspayá qoykuy mañakusuqnikimanqa. Qoykuypuniyá qoykunaykipaq kachkaptinqa.

²⁸ Kunan qonaykipaq kachkaptinqa amayá dejaychu paqarin punchawpaqqa.

²⁹ Runamasiki qampi confiakuchkaptinqa amayá contranpiqa tanteaychu mana allintaqa.

³⁰ Yanqamantaqa amayá piwanpas churanakuychu. Mana ofiendesuchkaptikiqa amayá churanakuychu.

³¹ Daño ruraq runamantaqa amayá enviadiakuychu. Amayá paypa kawsasqanman hinaqa kawsaychu.

³² Malvado runataqa Tayta Diosqa millakunmi. Ichaqa munasqanman hina ruraqkunapiqa confiakunmi.

³³ Tayta Diosqa ñakanmi mana allin ruraqpa wasinta. Tayta Diosqa bendecinmi allin ruraqkunapa *f**yachanantaqa.

³⁴ Burlakuqkunataqa paypas burlakunmi. Humildekunataqa paypas favorecenmi.

³⁵ Yachayniyoq runakunaqa herencia chaskichkaq hinam allin reqsisqa kanqaku. Mana yachayniyoqkunañataqmi penqayman churasqa kanqaku.