Proverbios 25 - Quechua Ayacucho Bible 1987

Salomonpa wakin rimasqankuna

¹ Juda nacionpa reynin Ezequiasmi serviqnin runakunawan qellqachirqa Rey Salomonpa rikchanachiyninkunata:

² Imatapas pakasqanmantam Diostaqa yupaychana. Imatapas entiendesqankumantam reykunataqa hatunchana.

³ Manam pipas entiendenmanchu cielokunapa alto-alto kayninta. Manam pipas entiendenmanchu kay pachapa uku-uku kayninta. Manam pipas entiendenmanchu reykunapa piensayninta.

⁴ Qollqeta chullurachiptikim qollqe chuyayarun. Plateroñataqmi kuyayllapaq alhajata rurarun.

⁵ Mana allin runata reypa servicionmanta qarqoruptikiqa allin rurasqanwanmi hawkalla gobiernanqa.

⁶ Ama alabakuychu reypa qayllanpiqa. Amataq sayaychu reqsisqa runakunapa kasqanpiqa.

⁷ “Kay ñawpaq sitioman hamuy” nispa reypa nisusqaykim aswan allinqa, ancha reqsisqa runapa qayllanpi humillachisunaykimantaqa. Imapas rikusqaykimantaqa ama

⁸ chaylla juezkunaman willaramuychu. Yanqañataqmi nisqaykipa contranpi huk kaqnin rimaruptin manaña ima rurayta atiwaqchu.

⁹ Defiendekuy acusasuqniki runamasikimanta. Ichaqa amam willakunkichu huk kaqninpa secretonta.

¹⁰ Yanqañataqmi pipas uyariruspan penqayman churasunkiman. Mala famayoq runa rikuriruptikiqa mana chinkaqmi kanman.

¹¹ Qollqewan hapichisqa qorimanta manzanam sumaqllaña, chaynam terminonpi rimarisqa palabrapas sumaqllaña.

¹² Qorimanta anillo hinaraqmi kasukuq runata yachayniyoqpa anyaykusqanqa. Qori-puromanta alhaja hinaraqmi kasukuq runata yachayniyoqpa anyaykusqanqa.

¹³ Imaynam rupay tiempopi runata riti frescaykachin, chaynam confianapaq kaq runaqa kachaqninpa sonqonta kawsarichin.

¹⁴ Mana parayoq puyukuna hinam mana imallantapas qokuykuchkaspa yanqa alabakuq runaqa. Mana parayoq wayra hinam mana imallatapas qokuykuchkaspa yanqa alabakuq runaqa.

¹⁵ Pacienciawanmi munaychakuq runataqa convencechina. Llampu simiwanmi contrakuqtaqqa upallachina.

¹⁶ Saksanaykikamalla mikuy avejapa miskinta tarispaykiqa. Yanqañataqmi aqturuwaq aminaykikama mikuruspaykiqa.

¹⁷ Ama ancha kutinyaychu amistadnikipa wasinman. Yanqañataqmi amirususpayki cheqnipakurusunkiman.

¹⁸ Maqanapas otaq espadapas hinam runamasinpa contranpi llullakuq runaqa. Ñawchi flecha hinam runamasinpa contranpi llullakuq runaqa.

¹⁹ Sasachakuy punchawpi kachkaspa traicionero runapi confiakuq runaqa utusqa kirunwan kachuchkaq hinam. Sasachakuy punchawpi kachkaspa traicionero runapi confiakuq runaqa weqrustin puriq runa hinam.

²⁰ Llakisqa runata takipayaq runaqa chiri punchawpi pachanta llatanaq hinam. Llakisqa runata takipayaq runaqa vinagrewan jabonta tupachichkaq hinam.

²¹ Cheqnisuqniki runata yarqaptinqa mikuykachiy. Cheqnisuqniki runata yakunayaptinqa tomaykachiy.

²² Chaynata paywan ruraptikiqa penqakuymantam uyan pukayarunqa. Tayta Diosmi kutichipusunki chaynata paywan ruraptikiqa.

²³ Norte lawmanta wayra pukumuspanmi parata apamun. Cuento qepi runapa rimasqanwanmi pitapas piñarachimun.

²⁴ Wasipa qatan cuartochapi *f**yachakuymi aswan allinqa atipanakuq warmiwan hatun wasipi *f**yachaymantaqa.

²⁵ Imaynam chiri yaku ancha yakunayasqa runata kawsarichin, chaynataqmi karumanta hamuq noticiapas runata kawsarichin.

²⁶ Putkachasqa yakuyoq pukyu hinam allin ruraq runaqa mana allin ruraq runapa qayllanpi katkatatan. Qanrachasqa yakuyoq pukyu hinaraqmi allin ruraq runaqa mana allin ruraq runapa qayllanpi katkatatan.

²⁷ Avejapa miskin achka mikuyqa manam allinchu. Alabasqa kanapaq maskayqa manam allinchu.

²⁸ Imaynam murallasqa llaqta tuñiriruspan mana defensayoqña rikurirun, chaynam mana controlakuq runapas mana defensayoqña rikurirun.