Proverbios 23 - Quechua Ayacucho Bible 1987

-6-

¹ Munaychakuq runawan mikunaykipaq tiyaspaykiqa qawarikuyá pipa qayllanpim tiyasqaykita.

² Mikuysapa kasqaykitam aguantankipuni. Mana chayqa cuchillowanyá wañurachikuypuni.

³ Ama munapayaychu mesanpi miski mikuyninkunataqa. Engañollam kanman chay mikuyninkunaqa.

-7-

⁴ Amayá apuyaruyllapiqa afanakuychu. Entiendespayá amaña afanakuychu.

⁵ Qawarikuptikiqa manañam kanqachu qori-qollqeqa. Anka hina rikuriruspam pawakunqa qori-qollqeqa. Cieloman anka pawachkaq hinam pawakunqa qori-qollqeqa.

-8-

⁶ Maqlla runawanqa ama mikuychu. Amataq miski mikuynintapas munapayaychu.

⁷ Chay mikuypa precionpi tanteaspanmi payqa nisunki: “Mikuy, tomay” nispa aswanqa manam allin sonqowanchu nisunki.

⁸ Aslla mikusqaykitapas vomitarunkim. Miskillaña rimasqaykimantapas pesakurunkim.

-9-

⁹ Ama allinninpaq rimapayaychu sonso runataqa. Payqa desprecianqam tanteowan rimapayasqaykitaqa.

-10-

¹⁰ Amayá asurichiychu ñawpaqmantaraq churasqa linderokunataqa. Amataqyá hapikuykuychu mana tayta-mamayoqpa allpantaqa.

¹¹ Paykunapaq reclamaq Diosqa ancha atiyniyoqmi. Qampa contraykipi paykunapa asunton valechiqqa Diosmi.

-11-

¹² Sonqoykipiyá hatalliy corregisusqaykitaqa. Uyarispaykiyá kasukuy yachachisusqaykitaqa.

-12-

¹³ Warma corregiytaqa amayá recelaychu. Payta azoteptikiqa manam wañurunqachu.

¹⁴ Paytam azotewan correginki hinaspaqa wañunanmantam libranki.

-13-

¹⁵ Churilláy, yachayniyoq kaptikiqa sonqoymantam kusikusaq ñoqaqa.

¹⁶ Diospa munasqanman hina rimaptikiqa tukuy sonqoywanmi kusikusaq ñoqaqa.

-14-

¹⁷ Huchallikuq runakunamantaqa amayá envidiakuychu. Sapa punchaw Tayta Dios respetaytaqa amayá qonqaychu.

¹⁸ Chayna kaptinqa hamuq punchawnikikunam allinlla kanqa. Suyasqaykipas manataqmi yanqapaqchu kanqa.

-15-

¹⁹ Churilláy, sumaqta uyarispaykiyá allin yachayniyoqña kakuy. Diospa munasqanman hinayá tukuy sonqoykiwan kawsakuy.

²⁰ Tomakuq runakunawanqa ama hukllawakuychu. Llumpay aycha mikuqkunawanpas amataq hukllawakuychu.

²¹ Wakchayanqam tomakuyllapi-mikukuyllapi kakuq runakunaqa. Puñunayachikuq kaspankum lata pachawanña churakunqa paykunaqa.

-16-

²² Taytayki kasqanrayku kasukuy taytaykita. Mamayki payayaruptinqa amataq despreciaychu payta.

²³ Cheqaptawan yachaytaqa rantichkaq hinayá armay. Amayá chaykunataqa *f**rantikuruychu. Corregisqa kaytawan entiendeytaqa rantichkaq hinayá armay. Amayá chaykunataqa rantikuruychu.

²⁴ Allin ruraq runapa taytanmi payrayku anchata kusikun. Allin yachayniyoqpa taytanmi payrayku anchata kusikun.

²⁵ Qamraykuyá tayta-mamayki kusikuchun. Qamraykuyá wachakusuqniki kusikuchun.

-17-

²⁶ Ñoqallapiyá tukuy sonqoykiwan piensay churilláy. Imaynam kawsasqaytayá qawariy churilláy.

²⁷ Uku-uku pozo hinam pierdekuq warmiqa. Kichki pozo hinataqmi chuchumika warmiqa.

²⁸ Suwa hinam payqa wateqan runata. Payqa pierderachinmi achka runata.

-18-

²⁹ ¿Pitaq: “Ay, ay” nispa nin? ¿Pitaq: “Nanawanmi” nispa nin? ¿Pitaq atipanakuypi purin? ¿Pitaq quejanakuypi purin? ¿Pitaq mana imamanta maqachikun? ¿Pitaq anta-antallataña qawakun?

³⁰ Chayna ruraqkunaqa vino upyaypi demoraqkunam. Chayna ruraqkunaqa preparasqa vino maskaqkunam.

³¹ Ama munapayaychu vinotaqa pukayariptin. Ama munapayaychu copapi kanchariptin. Ama munapayaychu llampullaña millpusqa kaptin.

³² Qepatañam kachukuq culebra hina kachurusunkiman. Venenosapa culebra hinam nanarachisunkiman.

³³ Ñawikikunam hukmankunata qawanqa. Sonqoykimantam mana allin rimaykuna lloqsimunqa.

³⁴ Lamar qochapa chawpinpi puñuchkaq hinam rikurirunki. Buquepa hatun kaspinpa puntanpi puñuchkaq hinam rikurirunki.

³⁵ Mallaqyaruspañataqmi ninki: “Maqawarqakum ichaqa manam nanawanchu” nispa. “Takawarqakum ichaqa manam musyanichu” nispa. Chaywanpas ninkiraqmi: “Mallaqyaruspayqa yapatawanmi vinota upyamusaq” nispa.