Proverbios 22 - Quechua Ayacucho Bible 1987

¹ Qori-qollqeyoq kaymantapas aswan allinqa allin reqsisqa kaymi. Qori-qollqeyoq kaymantapas aswan allinqa kuyasqa runa kaymi.

² Apupas-wakchapas chullallam kanku. Iskayninkum Tayta Diospa unanchasqan kanku.

³ Tanteoyoq runaqa desgracia sucedenanta qawarispanmi asurikun. Pisi experienciayoq runañataqmi chayninta pasaykuspan ñakarikun.

⁴ Tayta Diospa qayllanpi humillakuspa respetaqnin runaqa kapuqniyoqmi kanqa. Reqsisqa kaspataqmi unaypaq kawsakunqa.

⁵ Pantaypi kawsaq runaqa kichkakunapa, toqllakunapa kasqanpi purichkaq hinam. Vidan cuidaq runaqa chaykunamanta karunchakuq hinam.

⁶ Imaynam kawsananpaqyá yachachiy warmataqa. Yuyaqña kaspapas manam pantanqachu payqa.

⁷ Apu runam munaychakun wakcha runakunapi. Prestaq runañataqmi munaychakun prestakuqninpi.

⁸ Ñakarichiq runaqa desgraciallatam cosechanqa. Tukurunqam paypa varanqa.

⁹ Runamasin llakipayaq runaqa paypa bendecisqanmi kanqa. Wakchakunaman mikuykachisqanraykum bendecisqa kanqa.

¹⁰ Burlakuq runata qarqoruptikiqa churanakuykunapas tukurunqam. Pleiteanakuypas chaynataq insultanakuypas tanirunqam.

¹¹ Limpio sonqoyoq kayta munaq runaqa reypa amistadninmi. Miskillaña rimaq runaqa reypa amistadninmi.

¹² Cheqap yachaytaqa Tayta Diosmi cuidan. Engañaq runapa rimasqantaqa mana kaqmanmi churan.

¹³ Qella runam nin: “Leonqa hawapim kachkan” nispa. “Callepim wañurachiwanman” nispa.

¹⁴ Uku-uku pozo hinam pierdekuq warmipa rimayninqa. Tayta Diospa ñakasqan runaqa chay pozomanmi wichiykunqa.

¹⁵ Yanqakunallapim piensan warmaqa. Latigowan corregisqam ichaqa chaymanta karunchakunqa.

¹⁶ Apuyananrayku wakchata ñakarichiq runaqa wakchayanqapunim. Apu runaman qoq runapas wakchayanqapunim.

Yachayniyoq runakunapa nisqankunamanta

¹⁷ Atiendespayki sumaqta uyariy yachayniyoq runakunapa rimasqankunata. Sumaqta atiendey ñoqapa yachachisqaykunata.

¹⁸ Sonqoykipi waqaychaptikim kusichisunki. Chaylla rimanaykipaqmi simillaykipi kapusunki.

¹⁹ Tayta Diospi confiakunaykipaqmi kunanqa kaykunata yachachisqayki.

²⁰ Kimsa chunka yachachikuykunatam qellqarqani qampaq. Kaykunatam qellqarqani qamta consejaspay yachachinaypaq

²¹ chaynapi cheqap palabrakunapa cheqap kasqanta yachanaykipaq, chaynapi kachasuqnikimanqa cheqap palabrakunata willanaykipaq.

-1-

²² Wakcha kasqanraykuyá wakchamantaqa ama suwakuychu. Humilde runataqa amayá juzgadopi ñakarichiychu.

²³ Tayta Diosmi paykunataqa chay asuntonpi defiendenqa. Chay qechuqninkunamantam Tayta Diospas qechunqa.

-2-

²⁴ Ama amigo kaychu chaylla piñakuq runawan. Ama puriychu chaylla rabiakuq runawan.

²⁵ Mana allin vidantam yacharuwaq. Hinaspam toqllaman hina urmaykuwaq.

-3-

²⁶ Ama garantizaychu pitapas debekuq runataqa. Amataq qoychu paymantaqa prendatapas.

²⁷ Mana chayqa paganaykipaq mana kaptinmi qechusunkiman puñunayki camatapas.

-4-

²⁸ Amayá asurichiychu ñawpaqmantaraq churasqa linderokunataqa. Amayá asurichiychu abueloykikunaparaq churasqan linderokunataqa.

-5-

²⁹ Reykunatam servinqa empeñowan llamkaq runaqa. Manam servinqachu mana ancha reqsisqa runakunataqa.