Proverbios 21 - Quechua Ayacucho Bible 1987

¹ Reypa piensasqanqa Tayta Diospa atiyninpim kachkan *f**parqona yaku hina. Tayta Diosmi munasqanman hina reyta piensachin parqona yaku pusachkaq hina.

² Runamanqa allinpaqmi rikchakapun tukuy ima rurasqanqa ichaqa Tayta Diosmi tupun runapa piensasqantaqa.

³ Animal wañuchipunamantapas mastaqa Tayta Diosqa munan allin ruranatam. Animal wañuchipunamantapas mastaqa Tayta Diosqa munan allin arreglo ruranatam.

⁴ Hatun tukuspa apuyaruy munayqa hucham. Mana allin ruraqkunapa kawsasqanqa hucham.

⁵ Ganaswan llamkakuq runapa yuyaymanasqanqa apuyachinqam. Mana tanteaq runapa chaylla rurasqanqa wakchayachinqam.

⁶ Imaynam wañuy munaq runapa samaynin chinkarun, chaynam llullakuywan huñusqa riquezapas chinkarun.

⁷ Mana allin ruraq runakunapa daño rurasqanqa castigomanmi aysan paykunata. Paykunaqa manam munanchu Diospa munasqanman hina rurayta.

⁸ Qewi-qewi ñan hinam huchasapa runapa vidanqa. Chuya yaku hinam Diospa munasqanman hina rurayqa.

⁹ Wasipa qatan cuartochapi *f**yachakuymi aswan allinqa atipanakuq warmiwan hatun wasipi *f**yachaymantaqa.

¹⁰ Mana allin rurayllatam munan mana allin ruraq runaqa. Chayna runaqa manam llakipayanchu runamasintaqa.

¹¹ Pisi experienciayoq runapas burlakuq runata castigaptinkuqa yachayniyoqñam rikurirunqa. Yachayniyoq runata anyaptinkuñataqmi astawan yachaysaparaq rikurirunqa.

¹² Allin ruraq Diosqa qawarayanmi mana allin ruraq runapa familiantaqa. Desgraciamanmi qaykun mana allin ruraq runakunataqa.

¹³ Wakchakunapa ruegakusqanta mana uyariy munaq runataqa qayakuptinpas manam pipas contestanqachu paytaqa.

¹⁴ Pakasqallapi regalo qosqanmi runapa piñakuyninta tanichin. Secretollapi pagaykuypas runapa anchallaña rabiakuynintam tanichin.

¹⁵ Allin arreglo rurayqa kusichinmi allin ruraq runata. Ichaqa mancharichinmi mana allin ruraq runata.

¹⁶ Allin tanteowan kawsasqanmanta pantaruq runaqa wañuqkunapa kasqanpim samanqa.

¹⁷ Kusikuyllata kuyaq runaqa wakchallam kanqa. Vinotawan fiestakunalla kuyaq runaqa manam haypanqachu apuyaymanqa.

¹⁸ Mana allin ruraq runaqa Allin ruraq runapa rantinpim ñakarinqa. Traicionaq runaqa Diospa munasqanman hina ruraqkunapa rantinpim ñakarinqa.

¹⁹ Chunniqpi *f**yachakuymi kanman allinqa atipanakuq lisa warmiwan *f**yachaymantaqa.

²⁰ Yachayniyoq runapa wasinpiqa kapunmi qori-qollqewan tukuy imankunapas. Sonso runam ichaqa yanqachan tukuy kapuqninkunatapas.

²¹ Allin rurayta munaspa kuyapayakuq runaqa cheqap kawsaytam tarinqa. Payqa allinta ruraspanmi allin reqsisqa kanqa.

²² Yachayniyoq runam vencen valeroso runakunapa defiendesqan llaqtata. Tuñirachinmi confiakusqanku mana yaykuy atina murallata.

²³ Imam rimasqan cuidakuq runaqa sasachakuykunamantam librakunqa.

²⁴ Runa tukuspa ancha piñakuruq runatam tratanku: “Qamqa kanki runa tukuqllaña, orgulloso, burlakuq runam” nispanku.

²⁵ Qella runataqa munapayasqanmi wañurachinraq. Mana llamkay munasqanmi paytaqa wañurachinraq.

²⁶ Payqa tukuy punchawmi munaylla-munan imatapas. Allin ruraq runam ichaqa qokuykun imallantapas.

²⁷ Mana allin ruraqkunapa animal ofrecesqantaqa Tayta Diosmi millakun. Mana allin sonqonwan ofrecesqankuraykum Tayta Diosqa millakun.

²⁸ Llullakuq testigoqa chinkachisqam kanqa. Allin uyariq runam ichaqa rimarikunqa.

²⁹ Mana allin ruraq runaqa hawka tukuq runam. Diospa munasqanman hina ruraq runaqa hawkalla kawsakuq runam.

³⁰ Runapa yachayninwan entiendeq kayninqa manam valenchu Tayta Diospa contranpiqa. Runapa allin consejaq kayninqa manam valenchu Tayta Diospa contranpiqa.

³¹ Guerrapaqmi alistana caballotaqa. Chaywanpas Tayta Diosmi vencechin guerrapiqa.