Proverbios 2 - Quechua Ayacucho Bible 1987

Yachayniyoq kayqa runakunapa allinninpaqmi

¹ Churilláy, palabraykunatayá chaskiykuy. Kamachisqaykunatayá sonqoykipi churaykuy.

² Churilláy, yachaytayá uyarispa atiendey. Churilláy, entiendenaykipaqyá piensay.

³ Entiendeq kanaykipaqyá qayakuy. Cuenta qokuq kanaykipaqyá qayakuy.

⁴ Qollqeta hinayá maskay. Pakasqata hinayá maskay.

⁵ Hinaspaqa entiendenkim Tayta Dios respetayta. Hinaspaqa tarinkitaqmi Diospa yachayninta.

⁶ Tayta Diosmi yuyay qokuqqa. Paymi palabranwan yachay qokuqqa. Paytaqmi rimasqanwan entiendechikuqqa.

⁷ Diosqa munasqanman hina ruraqkunamanmi allin kanankupaq yuyayta qoykun. Payqa mana culpayoq kawsaqkunatam imamantapas harkaykun.

⁸ Diospa reglamenton kasukuqkunatam cuidan. Diosqa paypi sonqoyoqkunatam waqaychan.

⁹ Chaynaqa entiendenkim allin rurayta. Chaynaqa entiendenkim reglamenton kasukuyta. Entiendenkitaqmi Diospa munasqanman hina ruraytapas. Entiendenkitaqmi tukuy allinman hina kawsaytapas.

¹⁰ Yuyaymi sonqoykiman huntarinqa. Yachaymi vidaykita kusichinqa.

¹¹ Yuyaymanaspam cuidakunki. Allinta entiendespam waqaychakunki.

¹² Chaynapim mana allin kawsaymanta librakunki. Mana allin rimaqkunamantam librakunki.

¹³ Chayna runakunaqa manam Diospa munasqanman hinañachu kawsachkankupas. Chayna runakunaqa tutayay ñanpi purichkaq hinam kawsachkankupas.

¹⁴ Paykunaqa kusikunkuraqmi mana allin rurasqankumantapas. Anchataraqmi kusikunku mana allin ruraykunamantapas.

¹⁵ Qewi-qewi ñankunapi purichkaq hinam pantarunku. Mana allinta kawsaspam pantarunku.

¹⁶ Yachayniyoq kaspaqa librakunkim mana reqsisqayki mana allin warmimanta. Yachayniyoq kaspaqa librakunkim alabasuqniki pierdekuq warmimanta.

¹⁷ Chayna warmiqa sipas kaptinraq casaraqnin qosantapas saqerunmi. Chayna warmiqa Dioswan contrato rurasqantapas qonqarunmi.

¹⁸ Chay warmipa wasinman riq ñanninta pipas rispaqa wañuymanmi richkan. Paypa wasinman riq ñanninta pipas rispaqa wañusqakunapa kasqanmanmi richkan.

¹⁹ Chay warmiman llapallan yaykuqkunaqa manam kutimunñachu. Chay warmiman llapallan yaykuqkunaqa manam wiñay kawsaymanqa rinqañachu.

²⁰ Chaynaqa allin ñanta richkaq hinayá kawsay. Chaynaqa allin ruraqkunapa kawsasqanta hinayá kawsay.

²¹ Diospa munasqanman hina kawsaqkunaqa kay pachapim *f**yachanqaku. Mana culpayoq kaq runakunaqa kay pachapim hinalla takyanqaku.

²² Mana allin ruraqkunam ichaqa kay pachamanta chinkachisqa kanqaku. Traicionaqkunam ichaqa qora pilarusqa hina kay pachamanta qechusqa kanqaku.