Proverbios 19 - Quechua Ayacucho Bible 1987

¹ Tikranpa rimaq sonso runamantaqa wakcha kaspapas mana culpayoq kawsakuymi aswan allinqa.

² Mana sumaqta piensarispa afanakuyqa manam valenchu. Hawanpa-ukunpi imapas rurayqa manam valenchu.

³ Mana tanteoyoq runapa rurasqankunaqa pantayllamanmi pusan. Chaywanpas rabiaruspanmi Tayta Diostaraq acusan.

⁴ Apu runapa qori-qollqenmi paypa amigonkunata achkayachin. Wakcha runatam ichaqa wakcha kaynin amistadninkunamantapas rakinachin.

⁵ Llullakuq testigoqa castigasqapunim kanqa. Llulla rimaq runaqa castigasqapunim kanqa.

⁶ Allin sonqoyoq runapa favornintam achkallaña maskanku. Qokuq runataqa llapallankum amistadnin kanankupaq maskanku.

⁷ Wakcha runataqa cheqninmi llapallan wawqenkunapas. Paymantaqa karunchakurunmi amistadninkunapas. Manam pipas kanñachu rimapayaptinpas.

⁸ Yachay tariq runaqa kikillantam kuyakun. Entiendey kuyaq runaqa allin kaqtam tarikun.

⁹ Llullakuq testigoqa castigasqapunim kanqa. Llulla rimaq runaqa chinkachisqapunim kanqa.

¹⁰ Sonso runapa kusisqalla kawsakuyninqa manam valenchu. Munaychakuq runakunapi sirvientepa gobiernasqanpas manataqmi valenchu.

¹¹ Anaq piñakuq runam yachayniyoq runaqa. Ofiendeqkunata pampachaspanmi alabasqa kanqa.

¹² Malta leonpa qapariynin hinaraqmi reypa piñakuyninqa. Pastopi sulla hinaraqmi reypa favorninqa.

¹³ Taytantam llakichin sonso runaqa. Sutupayamuq para hinaraqmi atipanakuq warmiqa.

¹⁴ Herencia riquezataqa tayta-mamankumantam chaskinku. Yachayniyoq warmitam ichaqa Tayta Diosmanta chaskinku.

¹⁵ Qellakuyninmi runataqa miskillataña puñuchin. Qella runataqa yarqachikusqanmi ñakarichin.

¹⁶ Kawsakunqam Diospa kamachikuynin kasukuq runaqa. Diospa munasqanta despreciaqmi ichaqa wañunqa.

¹⁷ Tayta Diosmanmi prestan wakcha runaman qoykuq runaqa. Chayna rurasqanmantam paymanpas Tayta Dios pagapunqa.

¹⁸ Warmallaraq kachkaptinyá churikitaqa corregiy. Wañuyman ama rinanpaqyá paytaqa corregiy.

¹⁹ Anchallaña piñakuq runataqa castigasqa kananpaqmi saqenki. Castigomanta libraspaykiqa wakin castigomantapas chaylla-chayllam libranki.

²⁰ Kasukuy consejasusqaykita. Chaskiy corregisusqaykita. Chaynapim tarinki yachayta.

²¹ Runaqa imataña ruraytapas tanteanmanmi, aswanqa rurasqaqa kanqa Tayta Diospa munasqallanmi.

²² Apuyaruy munasqanmi runataqa penqayman churarunqa. Wakcha runa kaymi llulla runamanta aswan allinqa.

²³ Respetaqnin runataqa Tayta Diosmi kawsachin. Mana allinmanta harkaspanmi tukuy imayoqta kawsachin.

²⁴ Qella runaqa makintam haywarin platoman. Ichaqa manam imatapas apaykunchu siminman.

²⁵ Pisi experienciayoq runapas yuyaytam hapinqa burlakuq runata castigaptikiqa. Imatapas entiendenqam entiendeq runata qaqchaptikiqa.

²⁶ Penqayman churaspan llakichiq churim taytanta maqaq runaqa. Penqayman churaspan llakichiq wawam mamanta qarqoq runaqa.

²⁷ Churilláy, corregisqa kayta manaña munaspaykiqa yachay palabrakunamantam pantachkanki qamqa.

²⁸ Llulla rimaq testigoqa allin arreglo ruraymantam burlakun. Mana allin ruraq runaqa mana allinkunallawanmi contentakun.

²⁹ Burlakuq runakunapaqmi castigokunaqa chaylla kachkan. Sonso runapa wasanpaqtaqmi azotekunapas chaylla kachkan.