Proverbios 18 - Quechua Ayacucho Bible 1987

¹ Runamasinmanta rakikuq runaqa kikillanpaqmi imatapas maskachkan. Allin tanteaqkunapa consejasqantam payqa harkakuchkan.

² Sonso runaqa manam munanchu entiendeyta. Aswanqa munanmi piensasqankunalla uyarichikuyta.

³ Penqaymanmi churakun mana allin ruraq runaqa. Penqaypiña kaptinñataqmi runakuna insultanqa.

⁴ Uku-uku yaku hinam runapa rimayninkunaqa. Toqyaq yaku hinam yachaywan rimasqankunaqa. Llimpariq mayu hinam yachaywan rimasqankunaqa.

⁵ Manam valenchu mana allin ruraqman pipas sayapakuyninqa. Manataqmi valenchu allin ruraqpa asuntonta mana allinta arreglaptinqa.

⁶ Sonso runataqa rimayllanmi peleanachin. Rimasqanwantaqmi payqa azoteqninta qayachin.

⁷ Sonso runapa rimasqanqa desgraciamanmi pusachkan. Payqa rimasqallanwanmi kunkanman waskata churakuchkan.

⁸ Cuento qepi runapa rimasqankunataqa miski mikuyta hinam runaqa millpurun. Chay rimasqankunaqa uyariqnin runapa ukunmanmi pasaykurun.

⁹ Imapas rurasqankuna tuñichiqmanmi rikchakun qella runaqa. Wawqentin hinaraqmi kachkanku paykunaqa.

¹⁰ Mana tuñichiy atina torre hinam Tayta Diosqa. Allin ruraq runaqa paymanmi amparakunanpaq kallpaykunqa.

¹¹ Apu runapa kapuqninqa mana vencey atina llaqtamanmi rikchakapun. Apu runapa qori-qollqenqa amparakuna alto-alto perqamanmi rikchakapun.

¹² Pipas alto tukuq karuspanqa chinkachisqam kanqa. Pipas humillakuq kaspanqa allin reqsisqam kanqa.

¹³ Manaraq allinta uyarichkaspan rimaq runaqa mana tanteoyoq kasqantam qawachikun. Mana allinta uyarichkaspan rimaq runaqa penqaypi kasqantam qawachikun.

¹⁴ Onqoq runataqa kallpanchakusqanmi hatarichinman. ¿Pitaqsi hukmanyasqa runataqa kallpanchanman?

¹⁵ Entiendeq runaqa allin yachaytam tarin. Yachayniyoq runaqa allin yachaytam uyarin.

¹⁶ Regalo apasqaqa punkukunapas kicharikunmanmi. Chay regalowanqa munayniyoq runakunawanpas tupanmanmi.

¹⁷ Punta quejakuq runam allin ruraq runaman rikchakunqa. Sapaq runa tapupayaptinmi ichaqa llulla kasqanta hapirachikunqa.

¹⁸ Suerteta choqasqañam pleitoqa taninman. Atiyniyoq runakunatapas suertetaqmi rakinanman.

¹⁹ Piñachisqa wawqeqa mana yaykuy atina llaqta hinam. Pleiteanakuyqa mana yaykuy atina wasipa cerrojon hinam.

²⁰ Runaqa rimasqankunawanmi mikuywan hina saksanqa. Siminmanta lloqsisqankunawanmi mikuywan hina saksanqa.

²¹ Runaqa wañunqapas otaq kawsanqapas rimasqanraykum. Allin rimakuq runaqa imaynapas kanqa rimasqanraykum.

²² Allin kaqtam tarikun allin warmiwan casarakuq runaqa. Tayta Diospa favornintam hayparun chayna warmiwan casarakuq runaqa.

²³ Wakcha runaqa ruegakuspanmi rimapayakun. Apu runam ichaqa qaqcharisparaq contestakun.

²⁴ Kanmi runapa amigon tukuq runakuna. Kantaqmi wawqemantapas aswan confiakunaraq amigokuna.