Proverbios 16 - Quechua Ayacucho Bible 1987

¹ Runaqa sonqonpiqa tantean munasqanman hinam. Ichaqa rimaspaqa-rimanqa Tayta Diospa munasqanman hinam.

² Runamanqa limpiopaqmi rikchakapun tukuy ima rurasqanqa. Ichaqa Tayta Diosmi tupun runapa piensasqantaqa.

³ Tayta Diospa makinmanyá churay imapas ruray munasqaykikunataqa. Paymi qespichinqa tukuy imapas ruranaykipaq piensasqaykikunataqa.

⁴ Tayta Diosqa tukuy imatam rurarqa kikinpa tanteasqanta rurananpaq. Mana allin ruraq runatapas paymi rurarqa castiganan punchawpaq.

⁵ Llapa orgulloso runakunaqa Tayta Diospa millakusqanmi kachkanku. Cheqaptapunim paykunaqa castigasqa kanqaku.

⁶ Cheqap kuyapayakuq kasqanraykum Tayta Diosqa runata huchanmanta pampachaykun. Tayta Diosta respetaspam runaqa mana allinmanta karunchakun.

⁷ Runapa allin kawsasqan Tayta Diosta agradaykuptinqa. Paymi enemigonkunata hawkayaypi kawsachinqa.

⁸ Allinta ruraspa asllapas ganasqanmi aswan allinqa runamasinta engañaspa runa apuyasqanmantaqa.

⁹ Runam tantean mayninmi puriyta ichaqa Tayta Diosmi pusan mayninmi rinanta.

¹⁰ Reyqa Diospa rantinpim riman sentenciaspanqa. Manam traicionanmanchu arreglota ruraspanqa.

¹¹ Cabal balanzawan cabal pesoqa Tayta Diosmantam hamun. Wayqapi pesakunapas paypa rurasqan kaspanmi paymanta hamun.

¹² Reykunaqa mana allin ruraykunatam millakunku. Paykunaqa gobiernontam allin ruraykunawan takyachinku.

¹³ Reykunapa agradonpaqmi imam kaqllata rimaq runakunaqa. Diospa munasqanman hina rimaqtaqa kuyanmi reykunaqa.

¹⁴ Rey piñakuruptinqa huk kaqninmi wañurunqa. Yachayniyoq runam ichaqa reypa piñakuyninta amachanqa.

¹⁵ Reypa uyan kusisqa kaptinqa runam kawsanqa. Paypa favorninñataqmi tiempollanpi para hina kanqa.

¹⁶ Qori-puro tariymantapas aswan allinqa yachay tariymi. Akllasqa qollqe tariymantapas aswan allinqa entiendey tariymi.

¹⁷ Diospa munasqanman hina ruraqkunaqa sutillam mana allinmanta rakikunku. Cuidakuq runakunaqa vidankutam waqaychakunku.

¹⁸ Runaqa alto tukuq rikuriruspanmi chinkarun. Runaqa orgulloso rikuriruspanmi wichirun.

¹⁹ Ñakariq runakunawan humillasqa kaymi aswan allinqa orgulloso runakunawan qechusqanku qori-qollqe rakinakuymantaqa.

²⁰ Tayta Diospa palabranta kasukuq runaqa tukuy imapim allin kanqa. Tayta Diospi confiakuq runaqa ancha kusisqam kanqa.

²¹ Allin tanteaq runataqa entiendeqpaqmi hapinqaku. Allin simi runa rimaptinqa runakunam convencekunqaku.

²² Kawsachikuq yaku hinam yachayniyoq runapaq yachayniyoq kayninqa. Mana tanteoyoq runata corregiyqa mana kaqllam kanqa.

²³ Allin yachayniyoq runaqa yachanmi imaynam rimayta. Chayna rimasqanwanmi pitapas convencechin allinta.

²⁴ Miel hina miskillañam kuyakuywan pipapas rimasqanqa. Runapa sonqonpaqpas chaynataq tullunkunapaqpas hampi hinaraqmi chaykunaqa.

²⁵ Kanmi allin ñanman rikchakuq ñan ichaqa chay ñanpa tukupayninqa wañuyllam.

²⁶ Yarqaymanta kasqanmi llamkachin llamkaq runataqa. Mikunanayasqanmi llamkananpaq ganaschan paytaqa.

²⁷ Mana penqakuyniyoq runaqa mana allinllatam tanteachkan. Rimasqankunapas ratarichkaq nina hinaraqmi kachkan.

²⁸ Mana allinllata ruraq runaqa runamasinkunatam peleanachin. Cuento qepi runapas kuyanakuqkunatam rakinachin.

²⁹ Daño ruraq runaqa engañanmi amigonta. Mana allinta kawsananpaqmi pantarachin amigonta.

³⁰ Ñawinkuna qemchityachiq runaqa mana allinkunata rurananpaqmi tanteachkan. Simin kachupakuruq runaqa mana allin rurasqanmantam willakuchkan.

³¹ Kawsayninpi allinta ruraspa machuyaruq runapaqqa umanpi sumaq corona hinam soqonkunaqa.

³² Kallpasapa soldadomanta aswan allinqa anaq piñakuq runam. Llaqta venceq runamantapas aswan allinqa kikillan controlakuq runam.

³³ Runaqa Diospa munayninta yachananpaqmi choqan suerteta. Iman rurananmi ichaqa hamun Tayta Diosllamanta.