Proverbios 15 - Quechua Ayacucho Bible 1987

¹ Allin simillawan contestaq runaqa runamasinpa piñakusqantam tanichin. Nanay simiwan contestaq runam ichaqa astawanraq runamasinta piñachin.

² Yachayniyoq runakunapa siminmantam yachay lloqsin. Sonso runakunapa siminmantam ichaqa mana allin rimaykuna lloqsin.

³ Maypi kaq runatapas Tayta Diosqa rikuchkanmi. Mana allin runatapas allin runatapas payqa qawachkanmi.

⁴ Allin ruruq sacha hinam allin simiyoq runaqa. Runamasintam llakichin nina qallu runaqa.

⁵ Taytanpa corregisqantam desprecian mana yachayniyoq runaqa. Corregisqa kasqanta kasukuq runam yachayniyoq runaqa.

⁶ Allin ruraq runapa wasinpiqa achka qori-qollqem kachkan. Mana allin ruraqpa ganasqanpim ichaqa desgracia kachkan.

⁷ Yachayniyoq runakuna rimaspanqa yachaytam cheqechin. Sonso runakunam ichaqa mana chaynatachu cheqechin.

⁸ Mana allin ruraq runakunapa ofrendantaqa Tayta Diosqa millakunmi. Paypa munasqanman hina ruraq runakunapa mañakusqanqa agradonpaqmi.

⁹ Tayta Diosqa millakunmi mana allin ruraqkunapa kawsasqantaqa ichaqa kuyanmi allin ruray munaqkunataqa.

¹⁰ Nisyutam castigana allin kawsay mana munaq runataqa. Wañunqapunim anyasqa kayta cheqniq runaqa.

¹¹ Tayta Diosqa qawachkanmi wañusqakunapa kasqantapas. Tayta Diosqa qawachkanmi uku-pachatapas. Yachachkantaqmi runakunapa imaynam piensasqantapas.

¹² Faltanmanta qaqchaqnintaqa burlakuq runaqa manam kuyanchu. Manataqmi yachayniyoqkunaman hukllawakuytapas munanchu.

¹³ Runapa sonqon kusisqa kaptinqa uyanpas kusisqam kanqa. Sonqon llakisqa kaptinmi ichaqa hukmanyasqa kanqa.

¹⁴ Allin entiendeq runaqa astawan yachaytam munan. Sonso runam ichaqa mana tanteoyoq kayta munan.

¹⁵ Ñakariq runakunapaqqa sapa punchawmi ñakariy punchawkunalla. Kusisqa sonqoyoq runapaqmi ichaqa punchawkunaqa fiesta punchawkuna hinalla.

¹⁶ Achka kapuqniyoq kachkaspa llakisqa kaymantaqa wakchalla kaspapas Tayta Diosta respetaymi aswan allinqa.

¹⁷ Cheqninakuspa wira aychayoq mikuruymantaqa kuyanakuspa yuyu mikuyllapas mikuruymi aswan allinqa.

¹⁸ Chaylla piñakuruq runaqa hatarichinmi churanakuyta. Anaq piñakuq runam ichaqa amachan atipanakuyta.

¹⁹ Qella runapaqqa ñanpas kichka-kichka ñanmanmi rikchakapun. Diospa munasqanman hina ruraq runapaqmi ichaqa carreteraman rikchakapun.

²⁰ Taytantam kusichin yachayniyoq runaqa. Mamantam desprecian sonso runaqa.

²¹ Mana allinta piensariq runaqa mana tanteoyoq kasqanwanmi kusikun. Allin entiendeq runam ichaqa pantaruspanpas allin kawsayman kutirikun.

²² Runapa ruray munasqanmi mana qespinchu mana consultaspa rurasqanrayku. Runapa imapas rurasqanqa qespinmi achka consejaqkunata consultasqanrayku.

²³ ¡Maynatam kusikun allinta contestaruq runaqa! ¡Mayna allintaqmi tiempollanpi rimarisqa palabraqa!

²⁴ Wiñay kawsayman riq ñanqa wichaymanmi richkan yachayniyoq runapaqqa. Chayna kawsasqanmi uku pachaman rinanmanta libran paytaqa.

²⁵ Orgulloso runapa wasintaqa Tayta Diosmi tuñichin. Viudapa linderonkunatam ichaqa Tayta Dios takyachin.

²⁶ Tayta Diosqa millakunmi mana allin runakunapa tanteasqantaqa. Tayta Diospa agradonpaqmi allin sonqoyoqpa palabrankunaqa.

²⁷ Engañowan ganay munaq runaqa familianmanmi desgraciata apaykunqa. Sayniyachikuyta cheqniq runaqa hawkam kawsakunqa.

²⁸ Contestananpaqmi sumaqta piensan allin kawsaq runaqa. Yakuta hichachkaq hinam riman mana allin ruraq runaqa.

²⁹ Mana allin ruraq runakunamantam Tayta Diosqa karupi kachkan. Allin ruraq runakunapa mañakusqantam ichaqa Tayta Dios uyarichkan.

³⁰ Kusisqa ñawiyoq runaqa runamasintam kusichichkan. Allin noticiata willakuq runaqa runamasintam kallpanchachkan.

³¹ Allin kawsananpaq anyasqa kasqanta uyarikuq runaqa yachayniyoq runakunawanmi yachanqa.

³² Corregisqa kasqanta mana kasukuq runaqa kikillantam despreciakuchkan. Anyasqa kasqanta uyarikuq runaqa allin entiendeqñam kachkan.

³³ Tayta Diosta respetaq runaqa yachayniyoq kananpaqmi corregisqa kanqa. Puntataqa humillakunam ancha reqsisqa kanapaqqa.