Proverbios 14 - Quechua Ayacucho Bible 1987

¹ Familianmantam nanachikun yachayniyoq warmiqa. Familiantam pierdechin mana yuyayniyoq warmiqa.

² Diospa munasqanman hina kawsaq runaqa Tayta Diostam respetan. Pantaypi kawsaq runam ichaqa Tayta Diosta desprecian.

³ Mana yuyayniyoq runaqa hatun tukuspa rimasqamantam castigasqa kanqa. Yachayniyoq runam ichaqa rimasqanwan waqaychasqa kanqa.

⁴ Taqepas vaciorayanmi bueyeskuna mana kaptinqa. Bueyeskunapa kallpanwanmi ichaqa achka kawsaykuna kanqa.

⁵ Cheqap rimaq testigoqa mana llullakuspanmi riman. Llullakuq testigom ichaqa llullallata riman.

⁶ Yachayta maskaspapas burlakuq runaqa manam tarinchu. Allin entiendeq runapaqmi ichaqa yachay tariypas mana sasachu.

⁷ Karunchakuyá sonso runamantaqa. Paypa rimayninpiqa manam tarinkichu yachaykunataqa.

⁸ Yachayniyoq runaqa entiendenmi imaynam kawsakuyta. Sonso runakunam ichaqa engañakuspa piensan yachayniyoq kasqanta.

⁹ Mana tanteoyoq runakunaqa culpayoq kasqankumantam asikunku. Diospa munasqanman hina kawsaqkunam ichaqa allin sonqoyoq kawsakunku.

¹⁰ Runaqa sonqollanpim yachan llakisqa kasqantaqa. Paypa kusikuyninwanqa Manam kusikunmanchu sapaq runaqa.

¹¹ Mana allin ruraqkunapa wasinqa chinkachisqam kanqa. Diospa munasqanman hina kawsaqkunapa yachananmi ichaqa takyanqa.

¹² Kanmi allin ñanman rikchakuq ñan. Ichaqa chay ñanpa tukupayninqa wañuyllam.

¹³ Asikuspanpas runaqa sonqonpim llakisqa kanman. Kusikuyninñataqmi llakikuyman tikrakunman.

¹⁴ Piensasqanpi pantaruq runaqa mana allin kawsasqanwanmi contentakun. Allin runam ichaqa allin kawsasqanwan contentakun.

¹⁵ Pisi experienciayoq runaqa creerunmi tukuy imapas nisqankuta. Yachayniyoq runam ichaqa entienden imaynam kawsananta.

¹⁶ Yachayniyoq runaqa mana allinmantam manchakuspan karunchakun. Sonso runam ichaqa atrevido kaspan kikillanpi confiakun.

¹⁷ Imatapas loco hinam ruran chaylla piñakuruq runaqa. Sacre runam ichaqa cheqnisqa kanqa.

¹⁸ Pisi experienciayoq runakunaqa mana tanteoyoqmi kanqaku. Yuyaysapa runakunam ichaqa yachaywan coronasqa kanqaku.

¹⁹ Mana allin runakunam allin runakunapa ñawpaqninpi humillakunqaku. Mana allin ruraq runakunam allin ruraqkunapa punkunpi humillakunqaku.

²⁰ Amistadninkunapas cheqninmi wakcha runataqa. Achkallaña runakunam kuyan apu runataqa.

²¹ Huchallikunmi runamasin despreciaq runaqa. Mayna kusisqam ñakariqta llakipayaq runaqa.

²² Mana allinllapi yuyaymanaq runakunaqa pantayllapim kachkanku. Allin kaqkunapi yuyaymanaq runakunam ichaqa kuyapayasqa kachkanku. Allin kaqkunapi yuyaymanaqkunapas confianza runakunam kachkanku.

²³ Imapipas llamkaq runaqa allin kaqkunatam tarin Rimaylla-rimaq runaqa wakchayayllatam tarin.

²⁴ Yachayniyoq runakunataqa qori-qollqenmi corona hina adornan. Sonso runakunataqa mana tanteoyoq kayninmi adornan.

²⁵ Cheqap rimaq testigoqa runamasintam libran. Llulla rimaq testigoqa engañokunallatam riman.

²⁶ Tayta Dios respetaq runaqa confianzallawanñam kawsakunqa. Payta respetasqanraykum mirayninkunapas allin amparasqa kawsakunqa.

²⁷ Tayta Diosta respetayqa kawsachikuq yaku hinam. Chayqa kanqa wañuchiq toqllamanta lluptichiqnin hinam.

²⁸ Achka runata gobiernaq reyqa allin reqsisqam kanqa. Pisi runakunallata gobiernaspanmi ichaqa penqaypi kanqa.

²⁹ Anaq piñakuq runaqa ancha entiendeq runam. Chaylla piñakuruq runaqa mana tanteoyoq runam.

³⁰ Allinlla piensaq runaqa cuerpontam kawsachin. Envidioso kayninmi ichaqa tullunpi onqoy hina ñakarichin.

³¹ Mana imayoq runata ñakarichiq runaqa unanchaqnintam insultan. Wakcha runa llakipayaq runam ichaqa unanchaqninta hatunchan.

³² Mana allin ruraq runaqa desgracia hamuptinmi wichirunqa. Allin ruraq runaqa wañuruspanpas amparaqniyoqmi kanqa.

³³ Entiendeq runapa sonqonpiqa yachaymi kachkan. Sonso runakunapa kasqanpipas yachayqa reqsisqam kachkan.

³⁴ Allin ruraq runakunaqa nacionnintam hatunchan. Huchalla ruraq runakunam ichaqa nacionninta penqayman churan.

³⁵ Reymi favorecen yuyaywan serviqnin runataqa. Piñakuyninpi castigasqam kanqa penqayman churaqnin runaqa.