Proverbios 13 - Quechua Ayacucho Bible 1987

¹ Yachayniyoq churiqa kasukunmi taytanpa correqisqanta. Burlakuq runam ichaqa mana kasunchu anyaqninta.

² Rimasqankunapa ruruntam cosechanqa runaqa. Daño rurayllatam munanku traicionaq runakunaqa.

³ Rimasqanta cuidakuq runaqa kikillantam cuidakun. Rimaysapa runam ichaqa kikillanta dañakun.

⁴ Qella runaqa munaspapas manam tarinchu imatapas. Allin llamkaq runam ichaqa chaskin tukuy imatapas.

⁵ Llulla rimaykunataqa cheqninmi allin ruraq runaqa. Cheqnipaymi hinaspa penqaypaqmi mana allin ruraq runaqa.

⁶ Allinkuna rurasqanmi harkan mana culpayoq runataqa Mana allin rurasqanmi wichichin huchallikuq runataqa.

⁷ Kanmi apu tukuq runakuna mana imankupas kachkaptin. Kantaqmi wakcha tukuqkunapas tukuy imankupas kachkaptin.

⁸ Qori-qollqenmi wañunanmanta libran apu runataqa. Pipa amenazakuyninpas manam imapas qokunchu wakcha runataqa.

⁹ Allin ruraqkunapa kawsasqanqa kusikuyta apamuq kanchay hinaraqmi. Mana allin ruraqkunapa kawsasqanqa wañuruq mechero hinaraqmi.

¹⁰ Atipanakuyllatam hatarichin orgulloso runaqa. Yachayniyoq runakunam allin consejo chakiqkunaqa.

¹¹ Engañowan apuyaruqqa chayllam menosyarunqa. As-asllamanta apuyaruqqa kapuqnintam mirachinqa.

¹² Runapa imapas suyasqan unamuptinmi sonqon hukmanyarun. Suyasqan rikurimuptinmi ichaqa kawsay qokuq sacha hinaraq rikurirun.

¹³ Kamachikuyta despreciaq runaqa despreciasqanmantam paganqa. Kamachikuyta respetaq runam ichaqa premiasqa kanqa.

¹⁴ Yachayniyoq runapa yachachikuyninqa kawsachikuq yaku hinam. Paypa yachachikuyninqa wañuchiq toqllamanta lluptichiqnin hinam.

¹⁵ Pipapas favorecesqanmi tantearispa ruraq runaqa. Sasallañam traicionaq runakunapa kawsasqanqa.

¹⁶ Yachaywanmi ruran yachayniyoq runakunaqa. Sonso kasqantam qawaykachikun sonso runaqa.

¹⁷ Mana allin ruraq runaqa kachaptinkupas sasachakuymanmi wichiykun. Allin willakuq runam ichaqa hampi hinaraq allinyaykachikun.

¹⁸ Corregisqankuta mana chaskiq runaqa wakchayaspam penqaypi kanqa. Qaqchasqankuta kasukuq runam ichaqa reqsisqa kanqa.

¹⁹ Ancha suyasqanta tariruspanmi contentakun runaqa. Sonso runakunam ichaqa mana rakikuyta munanchu mana allin ruraymantaqa.

²⁰ Yachayniyoq runakunawan juntanakuspaykiqa yachayniyoqmi kanki. Sonso runakunawan juntanakuspam ichaqa sasachakuypi kanki.

²¹ Huchallikuq runakunataqa desgraciakunallam qatikachachkan. Allin ruraq runakunaqa allinkunawan premiasqam kachkan.

²² Allin runapa herencianqa kanqa willkankunapaqmi. Huchasapa runapa kapuqninkunaqa kanqa allin ruraq runapaqmi.

²³ Wakcha runapa llamkasqanpiqa achka kawsaymi qespirun. Ichaqa abusakuq runakunam tarpukuyninta qechurunku.

²⁴ Mana kasukuq chunrinta mana latigay munaq runaqa churintam cheqnin. Churin kuyaq runam ichaqa chaylla corregin.

²⁵ Allin ruraq runaqa saksanankamallam mikun. Mana allin ruraq runam ichaqa manaña saksarispa mikuylla-mikun.