Proverbios 12 - Quechua Ayacucho Bible 1987

¹ Corregisqa kayta munaq runaqa yachaytam munan. Qaqchachikuy mana munaqmi ichaqa asno kayta munan.

² Allin runaqa Tayta Diospa favornintam chaskin. Sacre runam ichaqa Tayta Diospa sentencianta chaskin.

³ Mana allin kawsaq runaqa manam takyanqachu. Allin ruraq runakunam ichaqa mana kuyunqachu.

⁴ Allin warmiqa qosanpa umanpi kaq sumaq corona hinam. Qosan penqachiq warmiqa qosanpa tullunpi onqoy hinam.

⁵ Allin ruraq runakunaqa Diospa munasqanman hinam yuyaymananku. Mana allin ruraq runakunam ichaqa engañollata consejanku.

⁶ Mana allin ruraq runakunapa rimayninqa wañuchinanpaq wateqaq runa hinam. Diospa munasqanman hina ruraq runapa rimayninqa runamasin libraq hinam.

⁷ Mana allin ruraq runakunaqa vencechikuspam chinkanqaku. Allin ruraq runakunapa castanmi ichaqa hinalla seguinqaku.

⁸ Runaqa yachayniyoq kasqanraykum alabasqa kanqa. Huchalla piensaq runam ichaqa despreciasqa kanqa.

⁹ Mana mikunayoq allin reqsisqa runamantaqa despreciasqa kaspapas servienteyoq kaymi aswan allinqa.

¹⁰ Allin ruraq runaqa nanachikunmi animalninkunamanta. Mana allin ruraq runam ichaqa mana yachanchu llakipayakuyta.

¹¹ Chakranpi llamkakuq runaqa saksanankama mikunayoqmi kanqa. Yanqa purikuq runam ichaqa mana ancha yachayniyoq kasqanta reqsichikunqa.

¹² Mana allin runakunapa qechusqantam munapayan mana allin ruraq runaqa. Allin sapichasqa sacha hinam wiñan allin ruraq runakunaqa.

¹³ Mana allin rimasqanmi urmaykachinqa mana allin runakunataqa. Allin ruraq runakunaqa lloqsinqam sasachakuyninmantaqa.

¹⁴ Rimasqankupa rurunwanqa sapakamam saksanqaku. Paykunaqa rurasqankuman hinam pagonkuta chaskinqaku.

¹⁵ Mana tanteoyoq runapaqqa tukuy rurasqankunam allinpaq rikchakun. Yachayniyoq runam ichaqa consejaqninkunata kasukun.

¹⁶ Mana tanteoyoq runaqa piñasqa kasqantam chaylla qawachikun. Yachayniyoq runam ichaqa insultachikusqantapas pakaykun.

¹⁷ Cheqap willakuq testigoqa imam kaqllatam willakun. Llullakuq testigom ichaqa engañollata willakun.

¹⁸ Nanay simikunam rimanku espadawan tuksichkaq hina. Yuyayniyoq runakunapa rimasqanmi ichaqa hampi hina.

¹⁹ Cheqap rimaq runaqa wiñaypaqmi takyanqa. Llulla rimaq runam ichaqa chaylla chinkanqa.

²⁰ Mana allin piensaq runakunapa sonqonpiqa engañollam kachkan. Allin kaqkuna consejaq runapa sonqonpim ichaqa kusikuylla kachkan.

²¹ Manam imapas pasanqachu allin ruraq runataqa. Mana allin ruraqkunam ichaqa ñakarinqa tukuy mana allintaqa.

²² Tayta Diosqa cheqninmi llulla rimaq runakunataqa. Tayta Diosqa favorecenmi cheqap rimaqkunataqa.

²³ Tanteoyoq runaqa manam alabakunchu yachayninmanta. Sonso runam ichaqa sutilla reqsichikun mana yuyayniyoq kasqanmanta.

²⁴ Llamkakuq runaqa munaychakuq runam kanqa. Qella runam ichaqa llamkachisqa kanqa.

²⁵ Preocupasqa kaptinmi runapa sonqon hukmanyasqa kachkan. Kuyakuy palabrakunawanmi ichaqa sonqon kusisqa kachkan.

²⁶ Allin ruraq runaqa runamasintam allinta pusachkan. Mana allin ruraq runam ichaqa pantay ñanninta pusachkan.

²⁷ Hapinan animaltam mana qatipaykunchu qella runaqa Pipaqpas ancha valorniyoqmi allin llamkaq runaqa.

²⁸ Cheqap kawsaymi allinta ruraspa kawsayqa. Manam pipas wañunqachu allinta ruraspa kawsakuqqa.