Proverbios 11 - Quechua Ayacucho Bible 1987

¹ Tayta Diosqa millakunmi mana cabal pesaq balanzataqa. Tayta Diospa agradonpaqmi cabal pesakunaqa.

² Hatun tukuq runakunaqa penqaypim kanqaku. Humillakuq runakunaqa yachayniyoqmi kanqaku.

³ Diospa munasqanman hina ruraq runaqa chayna rurasqanpa pusasqanmi. Traicionaq runaqa mana allin rurasqanpa chinkachisqanmi.

⁴ Qori-qollqeqa manam pitapas libranqachu Diospa piñakuynin punchawpiqa. Allin ruraymi ichaqa wañuymanta libranqa.

⁵ Mana huchayoq kayninmi runataqa allinta kawsachin. Mana allin ruraq runatam ichaqa mana allin rurasqankuna wichichin.

⁶ Diospa munasqanman hina kawsaqkunataqa allin rurasqanmi libranqa. Traicionaq runakunatam ichaqa mana allin munasqankuna munaychakunqa.

⁷ Mana allin ruraq runa wañuruptinqa tukuy ima suyasqankunapas chinkarunmi. Mana allin ruraq runa wañuruptinqa kallpanpi hapipakusqanpas chinkarunmi.

⁸ Allin ruraq runataqa Tayta Diosmi sasachakuyninmanta libraykun. Mana allin ruraq runatam ichaqa chay sasachakuyman churaykun.

⁹ Dios mana yupaychaq runam rimayninwan runamasinta dañarun. Allin ruraq runakunam ichaqa yachayninwan runamasinta librarun.

¹⁰ Allin ruraq runakunapa imankunapas miraptinqa llaqtamasinkunam kusikunku. Mana allin ruraq runakuna wañuruptinmi ichaqa kusikuymanta qaparinku.

¹¹ Diospa munasqanman hina ruraqkuna bendecisqa kaptinmi llaqtapas hatunchasqa kanqa. Mana allin ruraqkunapa rimayninwanmi ichaqa llaqtapas tuñichisqa kanqa.

¹² Mana yuyayniyoq runaqa runamasinta despreciaspanmi insultakun. Allin entiendeq runam ichaqa mana insultaspa upallakun.

¹³ Cuento qepi runaqa pakananpaq kaqkunatam willakachakun. Confianapaq runam ichaqa pakananpaq kaqkunata waqaychaykun.

¹⁴ Allin consejaqkuna mana kaptinqa nacionmi vencerachikunqa. Achka consejaqkuna kaptinmi ichaqa nacion salvakunqa.

¹⁵ Mana reqsisqanta garantizaq runaqa llakipim rikurinqa. Mana garantizay munaq runam ichaqa mana sasachakuypichu rikurinqa.

¹⁶ Kuyapayakuq warmiqa alabasqallañam kanqa. Daño ruraq runam ichaqa apuyayllata gananqa.

¹⁷ Kuyapayakuq runaqa kikintapas allintam rurakun. Mana kuyapayakuq runam ichaqa kikillanta dañakun.

¹⁸ Mana allin ruraq runaqa mana kaqllatam gananpas. Allin kaqta ruraq runam ichaqa cheqap pagonta gananpas.

¹⁹ Allin kawsaq runaqa cheqaptam kawsachkan. Mana allin kawsaq runam ichaqa wañuyman richkan.

²⁰ Tayta Diosqa millakunmi huchallapi yuyaymanaqkunataqa. Ichaqa kusikunmi mana huchallikuspa kawsaqkunawanqa.

²¹ Mana allin ruraq runaqa chaskinqapunim castigonta. Allin ruraq runapa castanmi ichaqa lluptinqa castigomanta.

²² Imaynam qorimanta anillo kuchipa senqanpi rikurirun, chaynam buenamoza warmipas mana allinta piensaspanqa rikurirun.

²³ Allin ruraq runakunaqa allin kaqkunallatam munanku. Mana allin ruraq runakunam ichaqa Diospa castigasqan kanqaku.

²⁴ Imallantapas qokuykuq runaqa qosqanmantapas mastaraqmi chaskikunqa. Paganantapas mana cabal pagakuq runam ichaqa aswanraq pisirachikunqa.

²⁵ Imallantapas qokuykuq runaqa tukuy imayoqmi kanqa. Yakuta saksaykachiqpas saksasqam kanqa.

²⁶ Kawsaykuna pakaruq runataqa runakunam ñakanqaku. Kawsaykuna *f**rantikuq runapaqmi ichaqa Diospa bendicionninta mañapunqaku.

²⁷ Allin kaqkunata maskaq runaqa favortam tarirunqa. Mana allin maskaq runatam ichaqa mana allin hayparunqa.

²⁸ Qori-qollqenpi confiakuq runaqa chakisqa rapi hinam wichirunqa. Allin ruraq runakunam ichaqa iklliriq rapi hina wiñarunqa.

²⁹ Wasinpi kaqkunata desgraciaman churaq runaqa mana imayoqmi rikurirunqa. Mana entiendeq runaqa yachayniyoq runatam servinqa.

³⁰ Allin ruraq runapa vidanqa sachapa rurun hina kawsachikuqmi. Yuyayniyoq runaqa runamasin convencechiqmi.

³¹ Allin ruraq runaqa kay pachapim pagonta chaskinqa. Mana allin ruraq runapas huchallikuqwan kuskam pagonta chaskinqa.