Proverbios 10 - Quechua Ayacucho Bible 1987

Rey Salomonpa rimarisqan rikchanachiykunamanta

¹ Salomonmi rimarirqa kay rikchanachiykunata: Yachayniyoq churiqa taytan kusichiqmi. Mana yachayniyoq wawaqa maman llakichiqmi.

² Yanqapaqmi mana allinta ruraspa apuyayqa. Wañuymantam librakun allin rurayqa.

³ Allin ruraq runataqa Tayta Diosqa manam dejanqachu yarqaymantaqa. Mana allin ruraq runataqa manam saksachinqachu imama munasqanwanqa.

⁴ Qellapakuspa llamkaq runaqa wakchayanqam. Ganasllawanña llamkaq runaqa apuyanqam.

⁵ Cosechapi huñukuq runaqa allin yachayniyoq churim. Cosechapi puñukuq runaqa penqayman churakuq churim.

⁶ Allin ruraq runaqa bendecisqam kanqa. Mana allin runapa rurasqanmi ichaqa siminta taparunqa.

⁷ Allin runaqa yuya-yuyarisqam kanqa. Mana allin ruraq runapa sutinmi ichaqa qonqasqaña kanqa.

⁸ Kamachikuykunatam kasukun yachaywan tanteaq runaqa. Desgraciapim rikurirunqa yanqakuna rimaq runaqa.

⁹ Manam imatapas manchakunchu mana huchallikuspa kawsakuq runaqa. Huchallikuspalla kawsakuq runam ichaqa hapirachikunqa.

¹⁰ Dañotam rurachkan runamasinta qemchiq runaqa. Desgraciapim rikurirunqa yanqakuna rimaq runaqa.

¹¹ Toqyachkaq yaku hina kawsachikuqmi allin ruraq runapa rimasqanqa. Mana allin runapa rurasqanmi ichaqa siminta taparunqa.

¹² Cheqnikuq runaqa peleollatam qosnirichin. Kuyakuq runaqa runamasinpa faltantam chinkachin.

¹³ Yachaywan rimasqam allin entiendeq runapa rimasqanqa. Mana tanteoyoq runaqa wasanpi kaspiwan waqtapasqam kanqa.

¹⁴ Yachayniyoq runakunaqa rimarinanku punchawkamam upallalla kakunku. Mana yachayniyoqkuna rimaspankuqa desgraciallatam apamunku.

¹⁵ Apu runapaqa kapuqninkunam llaqtapa murallan hina amparaqnin. Wakcha runapaqa mana imayoq kasqanmi desgraciaman wichichiqnin.

¹⁶ Allin ruraq runapa pagonqa cheqap kawsakuymi. Mana allin ruraq runapa cosechasqanqa huchanpa castigonmi.

¹⁷ Corregisqa kasqanta kasukuq runaqa cheqap kawsaymanmi richkan. Qaqchasqa kasqanta mana chaskiq runaqa pantaymanmi richkan.

¹⁸ Llulla runaqa cheqnikuyllatam sonqonpi hatallichkan. Sonso runaqa cuento qepillam purichkan.

¹⁹ Rimaysapa runaqa huchallikuqllañam. Pisi rimaq runaqa yachaysapallañam.

²⁰ Akllasqa qollqe hinam allin ruraq runapa rimasqanqa. Mana imapaq valeqmi mana allin ruraq runapa piensasqanqa.

²¹ Allin ruraq runapa rimasqanqa achkaqpa sonqontam saksaykachin. Mana yachayniyoq runataqa mana yachayniyoq kayninmi wañuchin.

²² Tayta Diospa bendicioninmi apuyachin runataqa. Tayta Diospa bendicionninqa manam apamunchu llakikuytaqa.

²³ Mana yachayniyoq runaqa kusikunmi mana allin rurasqanmanta. Allin entiendeq runaqa kusikunmi yachayniyoq kasqanmanta.

²⁴ Imapas manchakusqanraqmi mana allin runataqa sucederun. Allin ruraq runakunam ichaqa munasqankuta chaskirun.

²⁵ Sinchi wayra pasaruptinmi mana allin ruraq runaqa chinkarun. Allin ruraq runam ichaqa wiña-wiñaypaq takyarun.

²⁶ Kachaqnin runakunapaqqa kirupas mancharichiq vinagre hinam qella runaqa. Kachaqnin runakunapaqqa ñawipas waqachiq qosni hinam qella runaqa.

²⁷ Tayta Diosta respetaq runaqa unaymi kawsakunqa. Mana allin runakunapa watankunam ichaqa pisilla kanqa.

²⁸ Allin ruraq runakunapa suyasqanqa kusikuyllam kanqa. Mana allin ruraq runakunapa suyasqanqa chinkachisqam kanqa.

²⁹ Tayta Diospa munasqanman hina kawsaq runataqa paymi amparachkan. Mana chayna kawsaqkunatam ichaqa puchukachichkan.

³⁰ Allin ruraq runaqa manam haykapipas tampikachanqachu. Mana allin ruraq runakunam ichaqa kay pachapipas mana takyanqachu.

³¹ Yachaywan palabrakunatam riman allin ruraq runaqa. Mana allinlla ruraq runapa qallunmi ichaqa kuchusqa kanqa.

³² Allin ruraq runaqa yachaywanmi riman agradopaq kaqkunata. Mana allin ruraq runam ichaqa riman mana allinllata.