Proverbios 1 - Quechua Ayacucho Bible 1987

Rikchanachiykunaqa imapaqmi servisqanmanta

¹ Rikchanachiykunata Rey Salomonpa yachaywan rimasqankuna. Payqa karqa Rey Davidpa churin Israel nacionpa reyninmi.

² Kay yachaywan rimasqankunaqa yachayniyoq kanapaqmi. Kay yachaywan rimasqankunaqa corregisqa kanapaqmi chaynataq yachaywan rimasqankunapa imam ninan entiendenapaqmi

³ chaynapi corregisqa kanapaq, allin tanteaq kanapaq, allin ruraq kanapaq, allin costumbreyoq kanapaq, Diospa munasqanta ruranapaq.

⁴ Kaykunataqa qellqarqa pisi experienciayoqkunapas allinta ruraspa sacre kananpaqmi chaynataq entiendespa yachaywan allinkunata akllanankupaqmi.

⁵ Yachayniyoq runapas uyarispanmi aswan yachayniyoqraq kanqa. Allin entiendeq runapas uyarispanmi allin kaq consejota apakunqa

⁶ chaynapi rikchanachiykunata entiendenanpaq, chaynapi tupanachiykunata entiendenanpaq, chaynapi yachayniyoqkunapa nisqanta entiendenanpaq, chaynapi watuchikunata entiendenanpaq.

⁷ Yachayniyoq kanapaqqa Tayta Diostam respetana tukuymanta puntataqa. Mana yachayniyoq runaqa desprecianmi yachayniyoq kaytapas. Despreciantaqmi corregisqa kaytapas.

Mozokunapaq consejokunamanta

⁸ Churilláy, kasukuyá taytaykipa anyasusqaykitaqa. Churilláy, amayá qonqaychu mamaykipa yachachisusqaykitaqa.

⁹ Chay nisusqaykikunaqa umaykipi sumaq adornokuna hinam kanqa. Chay nisusqaykikunaqa kunkaykipaq collar hinam kanqa.

¹⁰ Churilláy, huchasapakuna engañayta munasuptikiqa amayá munaychu.

¹¹ “Hakuchik ñoqaykuwan runa wañuchiq” nisuptikiqa amayá munaychu. “Hakuchik inocente runata toqllaman urmaykachiq” nisuptikiqa amayá munaychu.

¹² Nisunkimantaqmi: “Ayata sepultura millpuchkaq hinayá inocente runakunata chinkarachimusun. Uku pachaman urmachiq hinayá inocente runakunata urmaykachimusun.

¹³ ¡Chaynapim achka-achka riquezakuna kapuwasun! ¡Chaynapim tukuy qechumusqanchikwan wasinchiktapas huntachisun!

¹⁴ Ñoqaykuwan kuskam partekita chaskinki qamqa” nispa. “Chulla wayqa qollqellam llapanchikpaq kanqa” nispa.

¹⁵ Churilláy, amayá riychu paykunawanqa. Asurikuyá paykunapa ñanninmantaqa.

¹⁶ Huchasapakunaqa chayllam kallpanku mana allinta ruramunankupaq. Huchasapakunaqa utqayllamanñam rinku pitapas wañuchimunankupaq.

¹⁷ Llapa pawaq animalkuna qawachkaptinmi yanqapaq toqllata churanku.

¹⁸ Chaynam huchasapakunapas kikillanku wañunankupaq wateqanku. Vidankupa contranpimiki chaynataqa rurachkanku.

¹⁹ Chaynam runamasinmanta qechuqkunaqa kanqa. Munapayasqankum kikillankuta wañurachinqa.

Yachaypa qayakusqanmanta

²⁰ Yachaymi callekunapi qayakuchkan. Yachaymi plazakunapi qaparichkan.

²¹ Runakunapa huñunakunan esquinakunapim qaparichkan. Llaqtapa punkun plazakunapim kaynata nichkan:

²² “Pisi experienciayoq runakuna, ¿haykapikamataq pisi experienciayoq kayta munankichik? Asipayakuq runakuna, ¿haykapikamataq asipayakuyllata munankichik? Sonso runakuna, ¿haykapikamataq yachayta cheqninkichik?

²³ Anyasqaykunata kasukuptikichikqa sonqoytam kicharisqaykichik. Anyasqaykunata kasukuptikichikqa piensasqaytam yachachisqaykichik.

²⁴ Qayachkaptiymi mana munarqankichikchu. Makiyta haywariptiypas manam atiendewarqankichikchu.

²⁵ Aswanraqmi qamkunaqa consejasqaykunatapas mana chaskirqankichikchu. Aswanraqmi qamkunaqa anyasqaykunatapas mana munarqankichikchu.

²⁶ Chaynaqa ñoqapas asikusaqmi desgracia hamusuptikichik. Chaynaqa ñoqapas burlakusaqmi manchakusqaykichikkuna hamusuptikichik.

²⁷ Manchakusqaykichik wayra-para hina hamuptinmi asikusaq. Desgraciakuna Sinchi viento hina hamuptinmi asikusaq. Sasachakuypi kaptikichikmi asikusaq. Ñakarichisqa kaptikichikmi asikusaq.

²⁸ Chay tiempopiqa qayakamuwaptikichikpas manam contestasqaykichikchu. Tutapaymanta maskawaspaykichikpas manam tariwankichikchu.

²⁹ Chaynatam rurasqaykichik yachayta cheqnisqaykichikrayku. Chaynatam rurasqaykichik Tayta Dios respetaytapas mana akllasqaykichikrayku.

³⁰ Manam munankichikchu consejasqaykunata. Manam chaskinkichikchu tukuy anyasqaykunata.

³¹ Mana allin rurasqaykichikpa ruruntam ñakarinkichik. Mana allin consejasqaykichikpa ruruntam amirunkichik.

³² Pisi experienciayoq runakunatam chay pantarusqan wañurachinqa. Sonso runakunatam mana tanteoyoq kaynin chinkarachinqa.

³³ Aswanqa segurom kawsakunqa pipas uyariwaqniyqa. Mana allinmantapas manam manchakunqachu pipas uyariwaqniyqa.”