Oseas 9 - Quechua Ayacucho Bible 1987

Castigomantam Oseas willakun

¹ Israelpa castankuna, amayá qamkunaqa kusikuychikchu. Sapaq runakuna hinaqa amayá qamkunaqa kusikuychikchu. Qamkunaqariki hukwan-hukwan tupakuruq warmi hinam kachkankichik. Diosnikichikmanta karunchakuruspam qamkunaqa chayna kachkankichik. Imaynam huchapakuq warmi chaskin pagonta. Chaynam qamkunapas chaskikunkichik erapi kawsaykunata.

² Israelpa castankunapaqqa manam erapi granopas haypanqachu. Israelpa castankunapaqqa manam uvas sarunapi vinopas haypanqachu. Uvas aqankupas manam paykunapaqqa kanqachu.

³ Tayta Diospa allpa qosqanpiqa manam yachanqakuñachu. Efrainpa castankunaqa Egipto nacionmanñam kutirinqaku. Aswanqa Asiria nacionpim mana mikunanku mikuykunata mikunqaku.

⁴ Tayta Diosman ofrecenanku vinotapas manam tallinqakuñachu. Wañuchipusqanku animalwanpas manañam payqa contentakunqachu. Mikusqanku mikuypas aya pampaypi mikuy hinañam rikurirunqa. Chaykunata pipas mikuqqa millakuypaqñam rikurirunqa. Paykunata kawsachinallanpaqñam kanqa chay mikuyqa. Tayta Diospa templonmanqa manam yaykunqachu chay mikuyqa.

⁵ ¿Imatataq rurankichik huñunakunaykichik fiesta punchawpiqa? ¿Imatataq rurankichik Tayta Diospa hatun fiestan punchawpiqa?

⁶ Paykunaqa puchukaymantam ayqekunku. Egipto nacionpim huñunakunqaku. Menfis llaqtapim pampasqa kanqaku. Itanam wiñarunqa sumaqllaña qollqenkupipas. Kichkakunam wiñarunqa paykunapa yachananpipas.

⁷ Ñam chayaramunña castigasqa kananku punchawkunaqa. Ñam chayaramunña pagasqa kananku punchawkunaqa. Israelpa castankunaqa yachanqakumá chaykunataqa. Diosmanta willakuqkunatapas upapaqmi qamkunaqa hapinkichik. Espiritupa yanapakuyninwan rimaqtapas locopaqmi hapinkichik. Huchapa intusqan kasqaykichikraykum chaynataqa piensankichik. Ancha cheqnikuq kasqaykichikraykum chaynataqa piensankichik.

⁸ Efrain castakunaqa Diosniypa contranpim wateqachkanku. Diosmanta willakuqkunapaqmi toqllata churachkanku. Chaynapim Diospa templonpipas cheqnisqaña rikurirullanku.

⁹ Efrain castakunaqa pasaypaqtam pierdekurunku. Gabaa llaqtapi rurasqankuta hinam rurarunku. Ichaqa Tayta Diosmi yuyarinqa chay mana allin rurasqankumanta. Ichaqa Tayta Diosmi castiganqa chay huchallikusqankumanta.

Huchankurayku ñakarisqankumanta

¹⁰ Tayta Diosmi nin kaynata: Israelpa castankunataqa chunniqpi uvasta hinam tarirqani. Ñawpaq abueloykichikkunataqa punta ruruq higosta hinam tarirqani. Ichaqa chay abueloykichikkunaqa Baal-peormanmi chayarurqaku. Chay millakuypaq taytachamanmi paykunaqa qokururqaku. Chaynapim pasaypaq millakuypaq rikurirurqaku. Chay kuyasqanku taytacha hinam rikurirurqaku.

¹¹ Efrain castakunapa ancha reqsisqa kayninqa pawaq animal hinam pawarikunqa. Manañam warmikunapas wiksayakunqañachu. Manañam atrazoyoqpas kanqakuñachu. Manañam wawakunatapas wachakunqakuñachu.

¹² Hatunyanankama uywaruptinkupas qechurusaqmi wawa-churinkutaqa. ¡Ay, imaynaraq kanqaku qepanchakuruptiyqa!

¹³ Efrainpa castankunaqa rikchakapuwarqa palmerakunapa kanan sumaqllaña montemanmi. Paykunaqa rikchakapuwarqa pastokunapa wiñananpi sumaqllaña palmerakunamanmi. Ichaqa cheqaptaqa manam chaynachu kasqa. Runa wañuchiqkunaman churinkunata pusaqmi paykunaqa kasqa.

¹⁴ Dios Taytalláy, imam merecesqankutayá qoykuy. Paykunataqa mana wachakuqtañayá ruraykuy. Ñuñunkupipas mana lecheyoqtañayá ruraykuy.

Efrain castakunapa contranpi Tayta Dios piñakusqanmanta

¹⁵ Tayta Diosmi nin kaynata: Gilgal llaqtapim rurarqaku tukuy mana allinkunataqa. Chaypim qallaykurqani paykuna cheqniytaqa. Mana allinkuna rurasqankuraykum temploymanta wischurusaq paykunataqa. Llapallan kamachiqninkupas mana kasukusqanraykum manaña kuyasaqñachu paykunataqa.

¹⁶ Efrainpa castankunaqa onqosqa sacha hinam kachkanku. Paykunaqa chay sachapa sapin chakisqa hinam kachkanku. Paykunaqa chay sacha hina mana ruruqñam kachkanku. Wawa-churiyoqña kaptinkupas wañurachisaqmi. Kuyasqanku wawa-churinkutaqa wañurachisaqmi.

¹⁷ Diosniymi paykunataqa wischurunqa. Mana kasukusqankumantam wischurunqa. Nacionkunapi yanqa puriqtañam rurarunqa.