Oseas 8 - Quechua Ayacucho Bible 1987

Taytacha-mamachakunarayku qaqchachikusqankumanta

¹ Cornetatayá tocay, enemigom hamuchkan. Enemigoqa anka hinaraqmi hamuchkan. Paykunaqa temploypa contranpim hamuchkan. Runakunam contratoyta mana kasukunkuchu. Runakunam yachachikuyniyta mana kasukunkuchu.

² Chaywanpas Israel runakunam qayakuwanku: “Diosniykupaqñam reqsikuykiku” nispanku.

³ Israelpa castankunaqa allin kaqtam wischupakurunku. Chayraykum paykunataqa enemigonkuna qatikachanqaku.

⁴ Paykunaqa mana “arí” nichkaptiymi reykunata churakuykunku. Paykunaqa mana yachachkaptiymi kamachikuqkunata churakuykunku. Paykunaqa qori-qollqenkumantam taytacha-mamachakunata rurakuykunku. Chayraykum paykunaqa puchukarunqaku.

⁵ Samaria llaqtayoqkuna, millakunim malta toroman rikchakuq taytachaykichiktaqa. Chay taytachakunapa contranpim llumpa-llumpayta piñakuruni ñoqaqa. ¿Haykapikamamá huchayoqllaqa kankichik?

⁶ Israel castakunamá chaynaqa kachkankichik. Manam Dioschu Samaria lawpi malta toroman rikchakuq taytachaqa. Imagenkuna ruraqllamiki rurarun chaytaqa. Chayqariki pasaypaq chinkachisqam kanqa.

⁷ Paykunaqa tumpalla pukumuq wayrata hinam tarpuypaq-tarpunku. Ichaqa llumpa-llumpay pukumuq vientota hinam cosechanqaku. Manam espiganqachu wiñaq trigonkupas. Chayraykum harinankupas mana kanqachu. Ichaqa trigota cosecharuptinkupas forasterokuna mikuruptinkum mana takyanqachu.

⁸ Millpurusqa hinam rikurirun Israelpa castankunaqa. Mana valeq manka paki hinañam rikurirun nacionkunapa qawasqanman hinaqa.

⁹ Asiria nacionman risqankuraykum chaynaqa kachkanku. Yanqa puriq purun asno hinaraqmi paykunaqa kachkanku. Efrainpa castankunaqa amigonman pagachkaq hinam yanapaqnin soldadokunaman pagachkanku.

¹⁰ Nacionkunapi soldadokunaman pagaptinkum paykunataqa huñunarusaq. Chaywanpas Efrainpa castankunaqa aswan-aswanmi asllayanqaku. Hatun rey ñakarichiptinmi paykunaqa asllayanqaku.

¹¹ “Efrainpa castankunam huchallikunankupaq altarkunata achkayachirqaku. Paykunaqa huchallikunanpaqmi chay altarkunataqa rurakurqaku.

¹² Efrainpa castankunapaqmi qellqarqani achkallaña yachachikuyniyta. Aswanqa paykunam mana reqsisqankupaq hapirqaku chaykunata.

¹³ Ofrecewasqanku aychatapas mikukunkum paykunaqa. Ñoqa Tayta Diosmi ichaqa mana kusikunichu paykunawanqa. Paykunapa mana allin rurasqankumantam yuyarisaq. Ñoqaqa paykunapa huchankumantam castigasaq. Egipto nacionman kutirichispaymi castigasaq.

¹⁴ Israelpa castankunaqa unanchaqnintam qonqarun. Paykunaqa palaciokunatañam rurakurun. Judapa castankunaqa murallasqa llaqtakunatam achkallataña rurakurun. Ichaqa llaqtankunataqa ninawanmi ruparachisaq. Ichaqa palacionkunataqa ninawanmi tukurachisaq.