Oseas 7 - Quechua Ayacucho Bible 1987

¹ Israelpa castankunata hampiykuyta munaptiymi Efrain castakunapa mana allin rurasqanqa sutichalla kachkan. Samaria runakunapa mana allin rurasqankuqa sutichallam kachkan. Paykunaqariki llapallankum llullakunku. Paykunaqa suwakunankupaqmi wasikunaman yaykunku. Paykunaqa runakunatam callekunapipas salteanku.

² Manam musyakunkuchu llapa mana allin rurasqanku yuyasqaytaqa. Kunanqa tukuy ima mana allin rurasqankum muyuriykun paykunataqa. Rikuchkanipunim chay tukuy ima mana allin rurasqankutaqa.

Reypa contranpi kamachikuqkuna tanteasqankumanta

³ Mana allinta ruraspankum reyninkuta kusichinku. Llullakunata rimaspankum kamachiqninkuta kusichinku.

⁴ Llapallankum hukwan-hukwan tupakurunku. Llapallankum rupachkaq horno hina rikurirunku. Chayna rupachkaqtam saqeykun tanta ruraq. Masa poqonankamam saqeykun tanta ruraq.

⁵ Reyninchiktam fiesta rurasqan punchawpi onqorachirqaku. Kamachikuqkunam llumpayta tomachispanku onqorachirqaku. Reyqa paykunatam hapiykurqaraq. Burlakuqkunatam payqa hapiykurqaraq.

⁶ Rupachkaq horno hinaraqmi kachkan paykunapa sonqonqa. Traicionaq sonqoyoqmi reyman asuykunku paykunaqa. Tutan puñukuq tanta ruraq hinaraqmi kachkan paykunapa jefenqa. Tukuy tuta kañasqa horno hinaraqmi traicionpas kununununqa.

⁷ Paykunaqa llapallankum horno hinaraq rupachkanku. Kamachiqninkutapas horno hinaraqmi chinkachichkanku. Llapallan reyninkum wichiykun chaynataqa. Manam hukllapas mañakuwankuchu paykunamantaqa.

Diosninkumanta karunchakuq runakunamanta

⁸ Efrainpa castankunaqa sapaq runakunawan taqrunasqam kachkanku. Efrainpa castankunaqa huklawllan chayasqa tortilla hinam kachkanku.

⁹ Forastero runakunam paykunapa kallpantaqa tukurun. paykunam ichaqa mana musyakunkuchu. Paykunapaqa umankupas soqollañam rikurirun. paykunam ichaqa mana musyakunkuchu.

¹⁰ Hatun tukuyninkum Israelpa castanpa contranpi sayarirun. Ichaqa manam yupaychasqanku ñoqa Tayta Diosman kutirikuwankuchu. Ichaqa manam yupaychasqanku ñoqa Tayta Diosta maskawankuchu.

¹¹ Efrainpa castankunaqa mana yuyayniyoq paloma hinam kanku. Efrainpa castankunaqa mana entiendeq paloma hinam kanku. Paykunaqa Egipto naciontam yanapananpaq mañakunku. Paykunaqa Asiria nacionmanmi yanapananpaq rinku.

¹² Ichaqa chay nacionman pasaptinkum paykunapa hawanman mallayta wischuykusaq. Ichaqa chay nacionman pasaptinkum alton pasaqkunata hina wichiykachisaq. Huñunakuyninkupi rimasqankuman hinam paykunataqa hapirusaq.

¹³ ¡Ay ñoqamanta karunchakuq runakunaqa imaynaraq kanqaku! ¡Ay, mana kasuwaqniykunaqa qonqayllatam puchukarunqaku! Libraykuyta munaptiypas paykunaqa contraypim llullallata rimanku.

¹⁴ Paykunaqa manam sonqomantachu mañakuwanku. Paykunaqa camankupa hawanpim qaparkachanku. Trigopaqwan vinopaqmi heridapakunku. Paykunaqariki ñoqatam qepanchakuruwanku.

¹⁵ Ñoqamiki yachachirqani paykunataqa. Ñoqamiki kallpancharqani paykunataqa. Ichaqa contraypim mana allinta piensarqaku paykunaqa.

¹⁶ Kutirispapas paykunaqa manam alto-altopi Diosmanchu kutirirqaku. Paykunaqa mana imapaq serviq flechana arco hinam kachkanku. Kamachiqninkunapas hatun tukuspa rimasqankuraykum guerrapi wañurunqaku. Egipto nacionpim paykunamantaqa burlakunqaku.