Oseas 6 - Quechua Ayacucho Bible 1987

Yanqallapaq wanakuy munasqankumanta

¹ Llaqtamasillaykuna, Tayta Diosmanyá kutirikusunchik. Paymi ñoqanchiktaqa llikiparuwarqanchik, hina paytaqmi sanoyachiwasunchikpas. Paymi ñoqanchiktaqa heridaruwarqanchik, hina paytaqmi hampiwasunchikpas.

² Iskay punchawllapim payqa kawsarichiwasun. Kimsa kaq punchawpim payqa hatarichiwasun. Paypa qayllanpiña ñoqanchikqa kawsasun.

³ Hakuwá Tayta Diosta reqsimusunchik. Tayta Diosta reqsiypiyá risunchik. Intiqa mana samaykuspam sapa punchaw lloqsimun. Chaynam Tayta Diospas ñoqanchikman lloqsimunqa. Paraqa siemprepunim kay pachaman chayamun. Chaynam Tayta Diospas ñoqanchikman chayamunqa. Poqoy parapas allpa nuyuykunanpaqmi chayamun. Chaynam Tayta Diospas ñoqanchikman chayamunqa.

Tayta Diospa imam nisqanmanta

⁴ Efrainpa castankuna ¿imatataq qamkunawanqa ruraykusaq? Judapa castankuna ¿imatataq qamkunawanqa ruraykusaq? Qamkunapa kuyakuynikichikqa achikyayta chinkaruq waspiy hinallam. Qamkunapa kuyakuynikichikqa achikyayta chakiruq sulla hinallam.

⁵ Chayraykum qamkunataqa tisapachkaq hina ñoqamanta willakuqkunawan qaqcharachikichik. Chayraykum ñoqapa sentencia rimasqayqa achkiy hina lloqsipusunkichik.

⁶ Animalkuna wañuchipuwanaykichikmantapas aswanqa munani kuyapayakuynikichiktam. Animalkuna lliwta kañapuwanaykichikmantapas aswanqa munani reqsiwanaykichiktam.

⁷ Adan hinam runaykunapas mana kasukunchu contratoyta. Chaypim paykunaqa traicionawanku ñoqata.

⁸ Galaad lawqa kachkan mana allin runakunapa *f**yachanan llaqta hinañam. Galaad lawqa kachkan yawarllaña yupikunapa kanan llaqta hinañam.

⁹ Runakuna wateqachkaq suwakuna hinam huñunakurun sacerdotekunaqa. Siquem llaqtaman riq ñanpim runakunata wañuchinku paykunaqa. Siquem llaqtaman riq ñanpim penqaypaq kaqkunata ruranku paykunaqa.

¹⁰ Israelpa castankunapim millakuypaq kaqkunata rikurqani. Efrainpa castankuna chaypi huchapakusqantam rikurqani. Israelpa castankuna chaypi waqllikusqantam rikurqani.

¹¹ Judapa castan runakuna, qamkunapaqpas cosecha hinam preparasqa kachkan. Castiganaypaq punchawmi qamkunapaqpas preparasqaña kachkan. Runaykunapa suertenta tikraykuyta munaptiymi,