Oseas 5 - Quechua Ayacucho Bible 1987

Tayta Diosta qepanchakuqkuna castigasqa kanankumanta

¹ Llapallan sacerdotekuna, kay rimasqaykunatayá uyariychik. Israelpa castankuna, kay rimasqaykunatayá uyariychik. Reypa castankuna, kay rimasqaykunatayá uyariychik. Mizpa lawpi toqlla hina kasqaykichikraykum qamkunaqa juzgasqa kankichik. Tabor Moqopi malla hina kasqaykichikraykum qamkunaqa juzgasqa kankichik.

² Sitim Qechwapim uchkuta toqorqankichik. Chayraykum llapallaykichikta corregisqaykichik.

³ Efrainpa castankuna, reqsikichikmi qamkunataqa. Manam pakasqachu Israelpa castankunaqa. Efrainpa castankunaqa huchapakuyllapim kachkankichik. Israelpa castankunaqa huchallikuyllapim kachkankichik.

⁴ Mana allin rurasqaykichikmi mana saqesunkichikchu Diosnikichikman kutirikuwanaykichikpaq. Hukwan-hukwan kakusqaykichikmi mana saqesunkichikchu ñoqa Tayta Diosta reqsiwanaykichikpaq.

⁵ Israelpa castankuna, qamkunapa contraykichikpim sayarirun hatun tukuq kasqaykichik. Israelpa castankunaqa otaq Efraimpa castankunaqa, mana allin rurasqaykichikpim wichiykunkichik. Judapa castankunawan kuskam wichiykunkichik.

⁶ Ovejaykichikwan vacaykichikwanmi ñoqa Tayta Diosta maskawankichik. Qamkunamanta karunchakuruptiymi mana tariyta maskawankichik.

⁷ Qamkunaqa wachapakuq hinam ñoqa Tayta Diosta traicionaruwankichik, Chayraykum chakraykichikpiwan kuska mosoq killa fiestapi tukusqa kankichik.

Israel nacionpiwan Juda nacion castigasqa kanamanta

⁸ Gabaa llaqtapiyá guerrapaq cornetata tocaychik. Rama llaqtapiyá guerrapaq cornetillata tocaychik. Bet-aven llaqtapiyá guerrapaq qapariychik. Benjaminpa castankunaqa guerramanyá puntaychik.

⁹ Israelpa ayllunkunamanmi willakuni cheqaptapuni imam pasananmanta. Castigasqay punchawqa tukuparusaqmi Efrainpa castankunata.

¹⁰ Chakrakunapi linderokunata miraykachikuq hinam kanku Juda nacionpi kamachikuqkunaqa. Ichaqa piñakuyniytam lloqllata hinaraq kachaykusaq paykunamanqa.

¹¹ Efrainpa castankunaqa ñakarichisqam kachkanku. Paykunaqa juiciopi sarupasqañam kachkanku. Paykunaqa yanqakunata qatiyllapim kachkanku.

¹² Efrainpa castankunataqa pacha mikuq puyu hinam tukurusaq. Judapa castankunataqa ismuypaqmi-ismurachisaq.

¹³ Efrain castakunapa onqosqanta qawakuykuptinmi, Juda castakunapa heridanta qawakuykuptinmi Efraimpa castankuna Asiria nacionta rinqaku. Yanapachikunankupaqmi hatun reyman kachanqaku. Yaw Efrain castakuna, chay reyqa manam sanoyachiyta atisunkichikchu. Yaw Efrain castakuna, chay reyqa manam heridaykichiktaqa hampisunkichikchu.

¹⁴ Efrainpa castankunataqa leon hinam llikiparusaq. Judapa castankunataqa malta leon hinam llikiparusaq. Paykunata aparikuspaymi pasakusaq ñoqaqa. Manam pipas librayta atinqachu paykunataqa.

¹⁵ Huchankuta reqsikunankukamam maymi kasqayman kutikusaq. Maskaqniy hamunankukamam maymi kasqayman kutikusaq. Ñakaristin maskawanankukamam ñoqaqa kutikusaq.