Oseas 4 - Quechua Ayacucho Bible 1987

Israelpa mirayninkunata Tayta Dios qaqchasqanmanta

¹ Israelpa mirayninkuna, uyariychikyá Tayta Diospa nisqanta. Payqa kay nacionpi yachaqkunatam acusachkan kaynata: Kay nacionpiqa manam pipas rimanñachu cheqap kaqtaqa. Kay nacionpiqa manam pipas yachanñachu kuyapayakuytaqa. Manam pipas reqsinchu paypuni cheqap Dios kasqantaqa.

² Mana penqakuspañam runamasinkutapas ñakanku, llullakunku, wañuchinku hinaspa suwakunku, hina chaynallataqmi hukwan-hukwanpas kakunku. Manaña tukuytam aswan-aswan wañuchinakunku.

³ Chayraykum kay nacionqa lutoyoq hinaña kachkan. Kay nacionpi *f**yachaqkunaqa mana kallpayoqñam kachkan. Purun animalkunapas, alton pawaqkunapas wañuchkanmi. Lamar qochapi kawsaq challwakunapas wañuchkanmi.

Sacerdotekunata Tayta Dios qaqchasqanmanta

⁴ Runaqa amayá atipanakuchunchu runamasinwanqa. Huk runaqa amayá juzgachunchu runamasintaqa. Sacerdotewan churanakuq hinam runaykikunaqa.

⁵ Punchawraq kachkaptinpas wichiykunkimá qamqa. Ñoqamanta willakuqpas tutanmi qanwantaq wichiykunqa. Qampa mamaykitapas wañurachisaqmi ñoqaqa.

⁶ Mana yachayniyoqmi kachkanku runaykunaqa. Chayraykum chinkachisqa kachkan paykunaqa. Yachayniyoq kayta wischupakusqaykiraykum qarqorusqayki sacerdote kaynikimanta. Kay Diosnikipa yachachikuyninta qonqarusqaykiraykum ñoqapas qonqarusaq miraynikikunata.

⁷ Aswan achkayasqankuman hinam huchallikurqaku. Contraypim paykunaqa chaynata huchallikurqaku. Chay alabasqallaña kasqankutam tikrarusaq. Llumpay penqaymanñam chaytaqa tikrarusaq.

⁸ Runaykunapa huchallikusqanwanmi paykunaqa mikunku. Runaykuna mana allin ruranankutam paykunaqa munanku.

⁹ Chayraykum runakunatapas castigasaq. Llapa sacerdotekunata hinam castigasaq. Imaynam kawsasqankuman hinam castigasaq. Imam rurasqankuman hinam pagapusaq.

¹⁰ Ñoqa Tayta Diosta mana kasuwasqankuraykum mikuspankupas mana saksanqakuchu. Ñoqa Tayta Diosta mana kasuwasqankuraykum huchapakuspankupas mana miranqakuchu.

Taytacha-mamachakunata yupaychasqankumanta

¹¹ Pipas hukwan-hukwan kakuspanqa mana entiendeqñam rikurirun. Vinolla aqalla upyakuq runaqa mana entiendeqñam rikurirun.

¹² Runaykunaqa imapas yachayta munaspam tapukunku kullumanta taytacha-mamachakunata. Runaykunaqa imatapas adivinaspam munachkanku tawnakunapas contestananta. Hukwan-hukwan kakuspam paykunaqa pantaypiña kachkanku. Diosninkumanta karunchakuruspam hukwan-hukwanña kakurunku.

¹³ Runaykunaqa orqokunapa puntankunapim chaykunapaq animalkunata wañuchinku Runaykunaqa moqokunapa puntanpim chaykunapaq inciensota kañanku. Chaynallatam ruranku allin llantuq roble sachakunapa ukunpipas. Chaynallatam ruranku Kiswar sachapa hinaspa encina sachapa ukunpipas. Chayraykum warmi churikichikkunapas huchapakuyllapiña kakunku. Chayraykum llumchuynikichikkunapas hukwan-hukwanña kakunku.

¹⁴ Ichaqa huchapakusqankumantaqa manam castigasaqchu warmi churikichikkunataqa. Ichaqa hukwan-hukwan kakusqankumantaqa manam castigasaqchu llumchuynikichikkunataqa. Qarikunapas chaynallamiki huchapakuq warmikunawan tupakurunkichik. Taytacha-mamachakunata serviq huchapakuq warmikunawanmi huñunakunkichik. Paykunawanmi qamkunaqa animalkunata ofrecenkichik. Mana entiendeq runakuna kaspaykichikmi urmaypaq-urmachkankichik.

¹⁵ Hukwan-hukwanñam tupakurunkichik Israelpa castan runakunaqa. Ichaqa amayá huchallikuchunchu Juda casta runakunaqa. Gilgal llaqtamanqa amayá riychikchu. Bet-aven llaqtamanqa amayá seqaychikchu. Tayta Diosraykuqa amayá juraychikchu.

¹⁶ Chukaru vaquilla hinam Israelpa castankunaqa. ¿Hatun pampakunapiraqchum michinman Tayta Diosqa? ¿Malta ovejakunata hinaraqchum michinman paykunataqa?

¹⁷ Taytacha-mamachakunatañam adorachkan Efrainpa mirayninkunaqa. Chaynaqa saqeruyñayá paykunataqa.

¹⁸ Upyakuyta tukuruspapas hinallam huchapakuchkanku. Kamachiqninkupas penqaypaq kaqtam kuyarunku.

¹⁹ Rapranpi apachkaq muyuq wayram aparunqa paykunataqa. Penqakunqakum taytacha-mamachakunaman ofrecesqankumantaqa.