Oseas 3 - Quechua Ayacucho Bible 1987

Hukwan tupakuruq warminmantawan Oseasmanta

¹ Tayta Diosmi huktawan niwarqa: —Hukwan tupakuruchkaptinpas rispaykiyá kuyamuy kuyasqayki warmita. Chaynatam Tayta Diospas kuyan Israelpa mirayninkunataqa. Mana reqsisqanku dioskunata qatichkaptinkupas ñoqaqa paykunataqa kuyanim. Chaykunata adoranankupaq ñapupasqa uvas pasaskunata munachkaptinkupas paykunataqa kuyanim —nispa.

² Hinaptinmi chay warmitaqa ñoqapaq rantirqani yaqa soqta onza qollqewan, pagarqanitaqmi kimsa pachak kimsa chunkan kilo cebadatapas.

³ Chay warmitam ñoqa nirqani: Qamqa ñoqawanmi *f**yachanki achka watakuna. Amayá huchapakuychu. Amayá hukwan-hukwanqa tupakuruychu, ñoqapas qamllawantaqmi kasaq —nispa.

⁴ Achka watakunam Israelpa mirayninkuna kanqa mana reyniyoq hinaspa mana kamachiqniyoq, Diosta adoranankupaqpas manam animalkunata wañuchinqakuchu, manataqmi kanqachu adoranankupaq pilarkunapas nitaq *f**efodwan pachakuq sacerdotepas nitaq taytacha-mamachakunapas.

⁵ Chaymanta Israelpa mirayninkuna kutiramuspakum maskanqaku yupaychasqanku Tayta Diosta. Maskanqakutaqmi reyninku Davidtapas. Tukupay punchawkunapiqa Tayta Diostañam respetanqaku, respetanqakutaqmi allin kaqkuna qosqantapas.