Oseas 12 - Quechua Ayacucho Bible 1987

¹ Efrainpa castankunaqa wayrallataña saksaykuq hinam kachkanku. Paykunaqa llullallaña hinaspa daño ruraqllañam kachkanku. Intipa qespimunan lawmanta hamuq wayrata tukuy punchaw qatikachachkaq hinam kachkanku. Paykunaqa Asiria nacionwanmi contratota rurakuykunku. Paykunaqa aceitekunatam Egipto nacionman apakunku.

² Judapa castankunataqa Tayta Diosmi pleitowan hapirunqa. Jacobpa castankunataqa mana allin kawsasqankumantam castiganqa. Paykunamanqa imam merecesqankuman hinam pagapunqa.

³ Jacobqa mamanpa wiksallanpiraqmi wawqenta talonninmanta hapirurqa. Jacobqa hatun runaña kaspanmi Dioswan peleaspan takyarqa.

⁴ Angeltapas takyaspam payqa vencerurqa. llakipayarikunanpaqmi waqaspan mañakurqa. Diosmi paytaqa Betel lawpi tarirurqa. Hinaspanmi paytaqa chaypi parlapayarqa.

⁵ Llapallan Kamachiq Tayta Diosmi parlapayarqa. Ancha reqsisqa sutiyoq Tayta Diosmi parlapayarqa.

⁶ Israelpa castankuna, qamkunaqa Diosnikichikmanyá kutirikuychik. Qamkunaqa kuyakuywanyá allinta ruraychik. Diosnikichikpi hapipakuspayá mana pisiparuspa suyaychik.

⁷ Negocianteqa suwakuq balanzatam hatallichkan. Chay runaqa runamasin engañayllatam gustachkan.

⁸ Efrain castakunam nin kaynata: “Ñoqaqa mayna apullañam rikuriruni. Ñoqaqa llumpay qori-qollqeyoqmi rikuriruni. Manam pipas musyanqachu mana allin rurasqaytaqa. Manam pipas musyanqachu huchallikusqaytaqa.”

⁹ Yupaychasqaykichik Tayta Diosmi ñoqaqa kani. Egiptopi kasqaykichikmantaraqmi Diosnikichik kani. Tupasqanchik punchawkunapiqa karpakunapim *f**yacharqankichik. Kunanpas karpakunapim kawsachisqaykichik.

¹⁰ Ñoqamanta willakuqkunamanmi ñoqaqa rimapayarqani. Revelacionninkupim aswan-aswanraq rimapayarqani. Ñoqamanta willakuqkunawanmi rikchanachiykunata rimachirqani.

¹¹ ¿Yanqakunalla kaqchu Galaad lawpi runakunaqa? Arí, yanqakunallam Galaad lawpi runakunaqa. Torokunatam wañuchipunku Gilgal llaqtapiqa. Altarninkupas paykunapaqqa kanqa montonasqa rumikunallam. Chakrankupa surconpipas kanqa montonasqa rumikunallam.

¹² Jacobmi Aram lawman ayqekurqa. Israelmi warmirayku llamkarqa. Warmiraykum oveja michiq karqa.

¹³ Tayta Diosqa paymanta willakuqwanmi Egipto nacionmanta horqochimurqa. Tayta Diosqa paymanta willakuqwanmi Israelpa castankunata cuidachirqa.

¹⁴ Efrainpa castankunaqa llumpaytam piñarachinku chayraykum runa wañuchisqankumanta culpanqa Señorninku. Chayraykum insultasqankumanta kutichipunqa Señorninku.