Oseas 11 - Quechua Ayacucho Bible 1987

Mana kasukuq runankunapaq Diospa kuyakuyninmanta

¹ Israel runakunatam warmallaraq kaptin kuyarqani. Churiytam Egipto nacionmanta qayamurqani.

² Aswan-aswan qayaptiymi aswan-aswanraq karunchakurqaku. Baal sutiyoq taytachakunapaqraqmi animalkunata wañuchipurqaku. Taytacha-mamachakunapaqraqmi inciensokunata kañarqaku.

³ Ñoqam yachachirqani Efrain castakuna puriytaqa. Marqayniypi apachkaptiypas manam entienderqakuchu paykunaqa. Manam entienderqakuchu ñoqapuni waqaychasqaytaqa.

⁴ Paykunataqa waskawan hinam chutaykurqani. Paykunataqa kuyakuyllawanñam chutaykurqani. Paykunataqa toropa yugonta uraykachichkaq hinam samaykachirqani. Ñoqaqa kurkuykuspaymi paykunata mikuchirqani.

⁵ Egipto nacionman mana kutiqñam kanqaku. Asiria nacionpa reyninmi kanqa reyninku. Mana wanakusqankuraykum chaynaqa kanqaku.

⁶ Yachananku llaqtakunapas guerrapa tukusqanmi kanqa. Chay llaqtakunapa punkunpas pakipasqam kanqa. Kikinkupuni tanteasqankuraykum kanqaku puchukachisqaqa.

⁷ Hinallaraqmi ñoqamanta karunchakuchkanku runaykunaqa. Alto-altopi kaq Diosta qayakuwaptinkupas manam hoqarisaqchu ñoqaqa.

⁸ Efrainpa castankunataqa ¿imaynataq saqeruykichikman? Israelpa castankunataqa ¿imaynataq qoykuykichikman? Adma llaqtata hinaqa ¿imaynataq qoykuykichikman? Zeboim llaqtata hinaqa ¿imaynataq ruraykiman? Piensaylla-piensaptiypas sonqollaymi tukukun. Tanteaylla-tanteaptiypas ukullaymi llakirikun.

⁹ Manam llumpay piñakuyniyman hinachu rurasaq ñoqaqa. Manañam puchukachisqaykichikchu Efrainpa castankunataqa. Ñoqaqa manam runachu kani aswanqa Diosmi. Ñoqaqa kani chawpikichikpi kaq Chuya Diosmi. Manam piñakuywanchu hamusaq qamkunamanqa.

¹⁰ Qamkunaqa ñoqa Tayta Diostam qatiwankichik. Leon hina ñawrawyaptiymi qatiwankichik. Chaynata qapariptiymi qamkunapa miraynikichikqa katkatatastin intipa qespimunan lawmanta hamunqa.

¹¹ Alton pawaqkuna hinam katkatatastin Egiptomanta pawamunqaku. Palomakuna hinam katkatatastin Asiria nacionmanta hamunqaku. Yanapaptiymi wasinkupi huktawan yachanqaku. Ñoqa Tayta Diosmi nini chaynata.

Israel castakunapa huchallikusqanmanta

¹² Efrainpa castankunaqa llullallata rimaspam intuypaq-inturuwan. Israelpa castankunaqa engañollata rimaspam muyuypaq-muyuruwan. Judapa castankunaqa ñoqa Diosninkumantam karunchakurunku. Confiakunapaq kachkaptiypas ñoqa Chuya Diosmantam karunchakurunku.