Oseas 10 - Quechua Ayacucho Bible 1987

Altarkuna tuñichisqa kananmanta

¹ Israelpa castankunaqa sumaqllaña wiñaruq uvas hinam. Paykunaqa kikillanmanta ruruq uvas sacha hinam. Aswan-aswan ruruchkaq hina kaspankum aswanraq altarkunata perqakurqaku. Chakrankuna sumaqllataña ruruptinmi taytachankupa pilarninkunataraq allicharqaku.

² Iskayrayachkanmi Israel castakunapa sonqonqa. Kunanmi chay culpankumanta paganqaku paykunaqa. Tayta Diosmi paykunapa altarnintaqa taqmarunqa. Tayta Diosmi paykunapa pilarnintaqa pakiparunqa.

³ Kunanmi chayraq ninqaku: Tayta Diostaqa manam respetarqanchikchu. Chayraykum reyninchikqa mana kapuwanchikchu. Reyninchik kaspaqa ¿imallatapas rurapuwachwanchikchu?

⁴ Paykunaqa rimaspapas yanqakunatam rimanku. Paykunaqa juraspapas yanqamantam juranku. Yanqallapaqmi contratotapas ruranku. Chayraykum paykunaqa kikinkupura pleitokunapi hatarichkanku. Chakrapa surconkunapi venenosapa qora hinam hatarichkanku.

⁵ Bet-aven llaqtapi malta tororaykum Samaria llaqtayoqkuna mancharisqa kachkanku. Chay taytachapa sacerdotenkunapiwan llapa runakunam chaynata waqachkanku. Chay taytachapa ancha reqsisqa kayninpi kusikuqkunam waqanqaku. Paykuna ukumanta huklawman apasqa kaptinmi llakisqallaña kanqaku.

⁶ Chay malta toro taytacham Asiria nacionman apasqa kanqa. Hatun reyman regalanankupaqmi chay taytachaqa apasqa kanqa. Efrainpa castankunam penqaypi kanqaku. Israelpa castankunam penqaypi kanqaku. Consejo chaskisqankuraykum penqaypi kanqaku.

⁷ Samaria llaqtapa reyninqa chinkachisqam kanqa. Yakupa hawanpi kaspicha muyuq hinam payqa chinkarunqa.

⁸ Mana allin rurananku alto moqokunapi capillakunapas chinkachisqam kanqa. Israel castakunapa huchallikunan moqomiki karqa chaykunaqa. Altarninkupa hawanpipas kichkakunañam wiñanqa. Altarninkupa hawanpipas cardo santokunañam wiñanqa. Runakunam orqokunata ninqaku: “Ñoqaykutayá taparuwayku” nispa. Runakunam moqokunata ninqaku: “Hawaykumanyá wichiykuy” nispa.

Tayta Diosmi Israelpa castankunata sentencian.

⁹ Tayta Diosmi nin kaynata: Israelpa castankuna, Gabaapi imam pasakusqanmantaraqmi mana dejankichikchu huchallikuytaqa. Mana vencey atina kachkaptinkupas Gabaa llaqtapim guerra hayparurqa chay mana allin runakunataqa.

¹⁰ Qamkunataqa castigasqaykichikmi munarisqay punchawpi. Achka-achka runakunam huñunakunqa contraykichikpi. Iskay kutipi mana allin rurasqaykichikmantam castigasqaykichik.

¹¹ Efrainpa castankunaqa yachachisqa vaquilla hinam kachkankichik. Erainpa castankunaqa trillay gustoyoq vaquilla hinam kachkankichik. Kunanqa sumaqllaña kunkaykichikmanmi yugota wataruni. Qamkunamanqa carretata chutanaykichikpaqmi wataruni. Judapa castankunapas takllatam chutankichik. Jacobpa castankunapas kurpa ñutuqtam chutankichik.

¹² Qamkunaqa tarpuchkaq hinayá allin kaqkunata ruraychik. Kuyakuq kasqaykichikman hinayá chaskiychik. Mana yapusqa chakrakunapiyá yapukuychik. Tiempoñam kasqanraykuyá ñoqa Tayta Diosta maskawaychik. Para chayamuchkaq hina allin kaqkunata apamunaykamayá ñoqata maskawaychik.

¹³ Qamkunaqa yapuspa tarpuchkaq hinam mana allinllata rurarqankichik. Qamkunaqa cosechachkaq hinam mana allin rurayllata chaskirqankichik. Qamkunaqa kawsaykuna mikuchkaq hinam llullallata rimarqankichik. Qamkunaqariki guerrapaqmi kikillaykichikpi confiakurqankichik. Qamkunaqariki guerrapaqmi nana-nanaq tropaykichikpi confiakurqankichik.

¹⁴ Chayraykum runaykikuna ukupiqa chaqwallaña kanqa. Llapallan murallasqa llaqtakunapas tuñichisqam kanqa. Bet-arbel llaqtatam Rey Salman guerrawan puchukarachirqa. Payqa wawakunatapas mamantintam tisaparurqa.

¹⁵ Betel llaqtayoqkunatapas chaynapunim pasarusunkichik. Llumpay mana allin kasqaykichikraykum chaynapuni pasarusunkichik. Israel nacionpa reyninqa pasaypaqtam chinkarunqa. Payqa achikyamuqtam pasaypaq chinkarunqa.