Oseas 1 - Quechua Ayacucho Bible 1987

Oseaspa warminmantawan churinkunamanta

¹ Juda nacionpa reyninmi karqa Uzias, paypa qepantañataqmi karqa Acaz, chaymantañataqmi karqa Ezequias. Israel nacionpi reyñataqmi karqa Joaspa churin Jeroboam. Paykunapa gobiernasqan watakunapim Beeri sutiyoq runapa churin Oseasta Tayta Dios rimapayarqa.

² Tayta Diosmi Oseaswan rimayta qallarispan nirqa: —Israel nacionpi runakunaqa hukwan-hukwan kakuq warmi hinam ñoqamanta karunchakurunku. Chaynaqa qampas rispaykiyá casarakamuy hukwan-hukwan kakuq warmiwan. Paypi churikikuna kaqpas maman hinam kanqa —nispa.

³ Oseasmá casarakurqa Diblaim sutiyoq runapa churin Gomerwan. Paymá wiksayakuruspan wachakurqa qari wawata.

⁴ Hinaptinmi Oseasta Tayta Dios nirqa: —Jezreel nispayá sutichay chay wawataqa. Manapas unaymantam castigasaq Rey Jehupa castanta. Chaynataqa rurasaq Jezreel llaqtapi runakunata Rey Jehu wañuchisqanmantam. Chaynapim puchukachisaq Israel nacionta.

⁵ Chay punchawmi flechana arcota pakipachkaq hina Israel tropakunata tukuparusaq, chaynataqa rurasaq Jezreel sutiyoq qechwapim —nispa.

⁶ Gomermi huktawan wiksayakuruspan wachakururqa warmi wawata. Chaymi Oseasta Tayta Dios nirqa: —Paytaqa sutichay Lo-ruhama nispayá. Manam llakipayasaqñachu Israel nacionpi runakunataqa. Manam pampachasaqñachu paykunataqa.

⁷ Ichaqa Juda nacionpi runakunataqa llakipayarisaqmi. Paykunapa yupaychasqanku Tayta Diosmi ñoqaqa kani, chaynaqa paykunataqa ñoqapunim salvasaq. Salvasaqqa manam flechawanchu nitaq espadawanchu nitaq guerrawanchu nitaq caballokunawanchu nitaq caballokunapi silladakunawanchu —nispa.

⁸ Gomermi Lo-ruhama sutiyoq wawanta anukarurqa hinaspanmi huktawan wiksayakuruspan qari wawata wachakururqa.

⁹ Hinaptinmi Oseasta Tayta Dios nirqa: —Chay wawataqa sutichay Lo-ami nispaykiyá. Qamkunaqariki manam kankichik runaykunañachu, ñoqapas manataqmi kani Diosnikichikñachu.

Israelpa castankuna huktawan alli-allin kasqankumanta.

¹⁰ Israelpa castankunaqa kanqa lamar qochapa patanpi aqo hinañam. Paykunaqa kanqa pipapas mana yupay atinanñam. Maypim nisurqankichik: “Qamkunaqa manam runaykunachu kankichik” nispa. Chaypim nisunkichik: “Qamkunaqa kawsachkaq Diospa churiñam kankichik” nispa.

¹¹ Chayraqmi Judapa mirayninkunaqa, chayraqmi Israelpa mirayninkunaqa hukllaman huñunasqa kanqaku. Huk kamachikuqllatañam akllanqaku. Tukuy hinastinmantam kutiykunqaku. Chay Jezreel sutiyoq punchawqa ancha hatun punchawmi kanqa.