Números 9 - Quechua Ayacucho Bible 1987

Pascua Fiestata imaynam ruranankumanta

¹ Egipto nacionmanta lloqsiramuspa iskay watamanña yaykuchkaptinkum chay iskay kaq watapa punta kaq killanpi Sinai sutiyoq chunniqpi Moisesta Tayta Dios nirqa:

² —Israelpa mirayninkunam tiempollanpi ruranqaku Pascua Fiestata.

³ Kay punta kaq killapa chunka tawayoq punchawninpim inti seqaykuytaña rurankichik. Chay fiestataqa rurankichik llapallan decretoykunaman hinaspa llapallan reglamentoyman hinam —nispa.

⁴ Chaynaqa Israelpa mirayninkunatamá Moises nirqa Pascua Fiestata ruranankupaq.

⁵ Hinaptinmá paykuna chay Pascua Fiestata rurarqaku punta kaq killapa chunka tawayoq punchawninpi, rurarqakuqa Sinai Chunniqpim inti seqaykuytaña. Moisesman Tayta Diospa tukuy nisqankunaman hinamá Israelpa mirayninkunaqa rurarqaku.

⁶ Ichaqa wakin runakunañataqmi wañuqpa ayanman asuykusqankurayku millakuypaq hina kachkarqaku, chayraykum chay punchawpiqa mana atirqakuchu Pascua Fiesta rurayta hinaspam Moisesmanwan Aaronman asuykurqaku

⁷ kaynata nispanku: —Ñoqaykuqa wañuqpa ayanman asuykurusqaykuraykum millakuypaqña kachkaniku hinaspaqa ¿imanasqataq Israelpa mirayninkunawan kuskaqa mana atiymankuchu tiempollanpi Tayta Diosman ofrendayku presentaytaqa? —nispa.

⁸ Hinaptinmi Moisesñataq nirqa: —Suyaykuychikyá imatas Tayta Dios kamachiwanqa qamkunamanta—nispa.

^9-10 Israelpa mirayninkunaman ninanpaqmi Moisesta Tayta Dios nirqa kaynata: —Qamkunamantapas otaq miraynikichikmantapas wañuqpa ayanman asuykuq runaqa millakuypaqña kachkaspapas ruranmanmi ñoqa Tayta Diospaq Pascua Fiestaytaqa, ruranmantaqmi illaruspan karupi tarikuq runapas.

¹¹ Chay Pascua Fiestataqa ruranqaku iskay kaq killapa chunka tawayoq punchawninpim inti seqaykuytaña. Chay fiestapi mikunanku aychataqa mikunqaku mana qonchuyoq tantayoqtam hinaspapas qatqe verdurapa llaqentawanmi.

¹² Animalpa aychantaqa amam puchunqakuchu paqarin punchawkamaqa nitaqmi tulluntapas pakinqakuchu. Pascua Fiestapaq decretoykunaman hinam tukuy imatapas rurankichik

¹³ Pascua Fiestapaq hina kachkaspan otaq mana illaruchkaspan Pascua Fiestay mana ruraq runaqa runamasinkunamanta chinkachisqam kanqa. Tiempollanpi ñoqa Tayta Diosman ofrendakunata mana ofrecewasqanraykum chay runaqa huchayoq kanqa.

¹⁴ —Qamkunawan *f**yachaq forastero runakunapas ñoqa Tayta Diospaqmi Pascua Fiestayta ruranqaku. Paykunapas ruranqaku Pascua Fiestapaq decretokunaman hinaspa reglamentokunaman hinam. Chulla decretollam kanqa nacionnikichikpi naceqpaqpas chaynataq forastero runakunapaqpas.

Diosman asuykuna karpapa hawanpi puyumanta

¹⁵ Diospa *f**yachanan karpata otaq Chunkantin Kamachikuy waqaychana karpata sayarirachiptinkum chay karpata puyu tapaykurqa. Tutaykuqmanta achikyamuqkamam Diospa yachanan karpapa hawanpi nina kaqlla rikurirurqa.

¹⁶ Chaynallam sapa punchaw karqa: Punchawmi karpata puyu tapaykuq, tutanñataqmi chay nina kaqlla tapaykuq.

¹⁷ Karpapa hawanmanta altoman puyu hoqarikuruptinmi Israelpa mirayninkuna lloqsiqku. Maypipas puyu sayaruptinñataqmi Israelpa mirayninkuna samaruqku.

¹⁸ Tayta Dios kamachiptinmi Israelpa mirayninkunaqa lloqsiqkupas otaq samaruqkupas, Diospa *f**yachanan karpapa hawanpi chay punchaw puyu kanankamam paykunaqa samaqku.

¹⁹ Diospa yachanan karpapa hawanpi chay puyu achka punchawkuna hinalla kaptinqa Israelpa mirayninkunapas hinallapim kaqku Tayta Diosta kasukuspanku.

²⁰ Sichu Diospa yachanan karpapa hawanpi pisi punchawkunalla chay puyu sayaruptinqa Tayta Diospa kamachisqanman hinam samaruqku otaq lloqsiqkupas.

²¹ Wakin kutipiqa chay puyum huk tutalla sayaruspan achikyaqtaqa hoqarikuruqña hinaptinmi paykunapas lloqsiqku. Wakin kutipiqa chay puyum huk punchawlla sayaruspan tutaykuqtaqa hoqarikuruqña hinaptinmi paykunapas lloqsiqku.

²² Diospa yachanan karpapa hawanpi iskay punchawpas otaq huk killapas otaq huk watapas chay puyu samananpaq sayaruptinqa Israelpa mirayninkunapas samaruqkum. Hoqarikuruptinmi ichaqa paykunapas chaylla lloqsiqku.

²³ Tayta Dios kamachiptinmi samaruqku, pay kamachiptintaqmi lloqsiqkupas. Paykunaqa imatapas ruraqku Moisesman Tayta Diospa kamachisqanpi hinam.