Números 8 - Quechua Ayacucho Bible 1987

Candeleropa mecheronkunata ratachinankumanta

^1-2 Aaronman ninanpaqmi Moisesta Tayta Dios nirqa: —Mecherokunata ratachiptikiqa candeleropa ñawpaqninmanmi qanchisnintin mecherokuna kanchanqaku —nispa.

³ Aaronqa chaynata ruraspanmi candeleropa ñawpaqninman chay mecherokunata kanchachirqa, chaynataqa rurarqa Moisesman Tayta Diospa kamachisqanpi hinam.

⁴ Chay candeleroqa qorimanta martillasqam karqa, tiyananmanta qallarispa waytankunakamam karqa martillasqa, chaynaqa rurasqa karqa Moisesman Tayta Diospa qawachisqanpi hinam.

Leviy aylluqa Diosllapaqña rakisqa kasqankumanta

⁵ Tayta Diosmi Moisesta nirqa:

⁶ —Israelpa mirayninkunamanta Leviy aylluta rakispayá paykunata chuyanchay.

⁷ Paykunata chuyanchaspaykiqa kaynatam ruranki: Paykunapa hawanmanmi challanki hucha limpiana yakuta hinaptinmi tukuy cuerponkuta afeitakunqaku, taqsakunqakutaqmi pachankutapas chaynapim ñoqamanqa asuykuwanmankuña.

⁸ Chaymantam apamuwanqaku malta torota chaynataq fino harinamanta aceitewan chapusqa kawsay ofrendatapas. Qampas apamuwankitaqmi hucharayku wañuchisqa kananpaq huk malta torota.

⁹ Asuykuwanaykichik karpapa ñawpaqninmanmi asuykachinki Leviy ayllu runakunataqa, huñunankitaqmi Israelpa llapallan mirayninkunatapas.

¹⁰ Leviy ayllu runakunata ñoqa Tayta Diospa qayllayman asuykachimuptikim Israelpa mirayninkuna makinkuta churanqa paykunapa hawanman.

¹¹ Hinaptinmi Aaronñataq ñoqa Tayta Diospa qayllaypi ofrendata hina presentawanqa Leviy ayllu runakunata, paykunataqa presentawanqa Israelpa mirayninkunapa ofrendanta hinam, chaynapim Leviy ayllu runakunaqa ima ruraypipas ñoqa Tayta Diosta serviwanqaku.

¹² Chaymantañam Leviy ayllu runakunaqa makinkuta churanqaku malta torokunapa umanman hinaptinmi qam Moisesñataq hucharayku wañuchinki huknin torota, huknintañataqmi wañuchispa lliwta kañanki Leviy ayllu runakunapa huchankunata pampachanaypaq.

¹³ Chaymantam Leviy ayllu runakunataqa sayachinki Aaronpa hinaspa churinkunapa ñawpaqninpi chaynapi ñoqa Tayta Diosman presentawanaykipaq.

¹⁴ Chaynatamá Leviy ayllu runakunataqa Israelpa mirayninkunamanta rakipuwanki chaynapim Leviy ayllu runakunaqa ñoqallapaña kanqa.

¹⁵ Hinaptinñam Leviy ayllu runakunaqa asuykuwanaykichik karpaman asuykunqaku chaypi ruranankupaq. Qanmá paykunataqa chuyanchaspa ofrendata hina presentamuwanki.

¹⁶ Leviy ayllu runakunaqa Israelpa mirayninkunamantam regalo hina ñoqallapaqña kachkanku. Paykunataqa Israelpa mirayninkunapa llapallan punta kaq wawa churinkupa rantinpim ñoqallapaqña akllakuykuni.

¹⁷ Egipto nacionniyoq runakunapa piwi wawa-churinkunata wañurachispaymi Israelpa mirayninkunapa piwi wawa-churintaña ñoqapaq sapaqchakurqani. Paykunaqariki ñoqapañam, ñoqapataqmi animalkunapa punta kaq criankunapas.

¹⁸ Chayraykum Leviy ayllu runakunataña akllakurqani Israel mirayninkunapa punta kaq wawa-churinkunapa rantinpi.

¹⁹ Chaynaqa Leviy ayllu runakunataqa Israelpa mirayninkunamantam regalota hina qorqani Aaronman chaynataq churinkunamanpas. Paykunataqa qorqani Israelpa mirayninkunapa rantinpi asuykuwanaykichik karpapi imam ruranankupi serviwanankupaqmi. Chaynata ruraptinkum Israelpa mirayninkunapa huchanta pampachasaq. Chaynaqa Israelpa mirayninkunaqa manam santuarioymanqa asuykunmankuñachu chaynapi peste onqoy paykuna ukupi mana kananpaq —nispa.

²⁰ Moiseswan Aaronmi Israelpa llapallan mirayninkunapiwan tukuy chaykunata rurarqaku Leviy ayllu runakunawan, chaynataqa rurarqaku imaynam Moisesman Tayta Diospa kamachisqanpi hinam.

²¹ Chaynapimá Leviy ayllu runakunaqa chuyanchakuspa pachankutapas taqsakurqaku hinaptinmi Aaronñataq ofrendata hina Tayta Diosman presentarqa. Aaronqa rurarqataqmi Leviy ayllu runakunapa huchan pampachasqa kananpaq imam ruranantapas. Chaynatamá chuyancharqa.

²² Chaymantañam Leviy ayllu runakunaqa yaykurqaku Diosman asuykuna karpaman chaynapi Aaronpa hinaspa churinkunapa qayllanpi ruranankupaq. Chaynatamá rurarqaku Leviy ayllu runakunawan imam ruranankupaq Tayta Diospa Moisesman kamachisqanpi hina.

Leviy ayllu runakunaqa hayka watam llamkanankumanta

²³ Tayta Diosmi Moisesta nirqa:

²⁴ —Leviy ayllu runakunaqa iskay chunka pichqayoq watanmanta hanaymanmi yaykunqaku asuykuwanaykichik karpaman, yaykunqakuqa imam ruranankupi serviwanankupaqmi.

²⁵ Pichqa chunka watayoqña kaspankuqa chay serviwananku llamkayninmantam samakunqakuña. Amañamá chaypiqa mastaqa servikunqakuchu.

²⁶ Chaywanpas asuykuwanaykichik karpapiqa yanapanmankuraqmi Leviy ayllumasinkuta ichaqa amañam ruranqakuñachu imam ruranankuman hinaqa. Qam Moisesmá chaynata ruranki Leviy ayllu runakuna serviwananpaq.